စစ်ကိုင်းတိုင်း မုံရွာမြို့တွင် လူတစ်ဦးသေဆုံးခဲ့သည့် ဓားပြမှုတစ်ခုဖြစ်ပွားပြီးနောက် နာရီပိုင်းအတွင်း ဓားပြတိုက်မှုတစ်ခု ထပ်မံဖြစ်ပွားခဲ့ကြောင်း ဒေသခံများက ပြောသည်။
ယနေ့ (ဇန်နဝါရီ ၂၁ ရက်)မွန်းလွဲ ၂နာရီခန့်က မုံရွာမြို့၊ ထန်းတောရပ်ကွက်၊ ဘောလုံးကွင်းအနီး၌ ကြယ်နီအမည်ဖြင့် ကွမ်းယာဆိုင်ဖွင့်ထားသည့် နေအိမ်တစ်လုံးအား လက်နက်ကိုင်လူတစ်စုက ရောက်ရှိလာပြီး ဓားပြတိုက်သွားခြင်းဖြစ်ကြောင်း မြို့ခံများက ပြောသည်။
အိမ်ရှင်လင်မယားအား ခေါင်းငုံ့ခိုင်းထားပြီး ကောင်တာနှင့် နေအိမ်ရှိ ကျပ် ၅သိန်းခန့်နှင့် လက်ကိုင်ဖုန်းနှစ်လုံး ယူဆောင်သွားသည်ဟု သတင်းရကြောင်း Chindwin Postက ဖော်ပြသည်။
ယမန်နေ့ (ဇန်နဝါရီ ၂၀ရက်) ည ၇နာရီကလည်းအောင်ချမ်းသာရပ်ကွက်ရှိ “ချမ်းမြေ့သုခ” ကုန်စုံဆိုင်ဓားပြတိုက်ခံရပြီး ဓားဖြင့်ပါအခုတ်ခံရသောကြောင့် ဆိုင်ရှင်လင်မယားနှစ်ဦးလုံး ဆေးရုံရောက်ကာ အမျိုးသားဖြစ်သူ သေဆုံးခဲ့သည်။
“အခုဆိုဆိုင်လည်း အစောကြီးပိတ်နေရပြီ။ မဖွင့်ရဲဘူး။”ဟု မုံရွာမြို့က ဆိုင်ရှင်တစ်ဦးက ပြောသည်။
ဇန်နဝါရီလဆန်းပိုင်းကလည်း တစ်ပတ်အတွင်း မုံရွာမြို့ပေါ်ရှိ နေရာသုံးခု ဓားပြတိုက်ခံခဲ့ရသည်။
မုံရွာမြို့တွင် အာဏာသိမ်းပြီးနောက်ပိုင်း ဓားပြတိုက်လုယက်မှုများဖြစ်ပွားခဲ့ပြီး ယမန်နှစ်လယ်ပိုင်းမှစတင်ကာ ပိုမိုဖြစ်ပွားလာခဲ့ကာ မြို့ပေါ်ရွှေဆိုင်များအထိ ဓားပြမှုအတင့်ရဲလာခဲ့သည်။
