လက်နက်ကိုင်တပ်တွေအနေနဲ့ အများပြည်သူနေထိုင်ရာကျေးရွာတွေနဲ့ ရပ်ကွက်တွေကိုရှောင်ရှားပြီး တိုက်ပွဲဖော်ကြဖို့ မွန်တိုင်းရင်းသားလက်နက်ကိုင်အဖွဲ့ ဖြစ်တဲ့ မွန်ပြည်သစ်ပါတီက ထုတ်ပြန်ချက် ထုတ်ပြီးတိုက်တွန်းလိုက်ပါတယ်။
ကရင်ပြည်နယ်၊ကော့ကရိတ်မြို့နယ်ထဲက မွန်တိုင်းရင်းသားတွေအများဆုံးနေထိုင်တဲ့ ကမ်းနီရွာနဲ့အနီးတဝိုက်မှာ စစ်ကောင်စီတပ်နဲ့ကော်သူလေးအာမီလက်အောက်ခံ Lion Battalion Commando စစ်ကြောင်းတို့ကြား တိုက်ပွဲဖြစ်ပြီးနောက် မွန်ပြည်သစ်ပါတီဘက်က အခုလိုထုတ်ပြန်လာတာပါ။
အဲဒီတိုက်ပွဲဖြစ်စဉ်အတွင်း ဒေသခံလူထုရဲ့နေအိမ် အလုံး ၄၀ နီးပါး ထိခိုက်ပျက်စီးခဲ့တာရှိတယ်လို့ မွန်ပြည်သစ်ပါတီဘက်ကဆိုပါတယ်။
ဗိုလ်စောအယ်စေးဝါး ဦးဆောင်တဲ့ Lion Battalion Commando အဖွဲ့ က ကမ်းနီရွာက အုပ်ချုပ်ရေးမှူးအိမ်နဲ့ ပြည်သူ့စစ်အိမ်တွေကိုမီးရှို့ရာကနေ ကျေးရွာထဲကနေအိမ်တွေ ကူးစက်လောင်ကျွမ်းခဲ့တယ်လို့ မွန်ပြည်သစ်ပါတီက ထုတ်ပြန်ချက်မှာဖော်ပြပါတယ်။
အလားတူပါပဲ ညောင်ရိပ်သာရွာမှာလည်း တိုက်ပွဲဖြစ်စဉ်ကြောင့် နေအိမ် ၁၈ လုံးမီးလောင်ခဲ့တယ်လို့ မွန်းပြည်သစ်ပါတီက ပြောပါတယ်။
စစ်ကောင်စီရဲ့လက်နက်ကြီးကျည်ကြောင့်လည်း ကမ်းနီနဲ့ညောင်ရိပ်သာရွာက နေအိမ်တွေ ပျက်စီးထိခိုက်တာရှိတယ်လို့ မွန်ပြည်သစ်ပါတီက ထုတ်ပြန်ချက်မှာထည့်သွင်းထားတာတွေ့ရပါတယ်။
ဒီဖြစ်စဉ်တွေကြောင့် လက်နက်ကိုင်အဖွဲ့တွေအနေနဲ့ စစ်ဘက်ဆိုင်ရာကျင့်ဝတ်တွေလိုက်နာပြီး လူနေကျေးရွာတွေ ၊ရပ်ကွက်တွေအနီး တိုက်ပွဲမဖော်ဖို့ မွန်ပြည်သစ်ပါတီက တိုက်တွန်းပါတယ်။
Lion Battalion Commando စစ်ကြောင်းရဲ့ ပြန်ကြားရေးတာဝန်ခံက နေအိမ်တွေကို သူတို့စစ်ကြောင်း မီးမရှို့ကြောင်းနဲ့ စစ်ကောင်စီဘက်ကပစ်တဲ့ လက်နက်ကြီးကျည်ကြောင့် နေအိမ်တွေမီးလောင်ပျက်စီးခဲ့တာလို့ရှင်းထားပါတယ်။
ဒီလိုအခြေအနေတွေ ထပ်မံကြုံတွေ့ရရင်ဒေသတွင်းနေထိုင်ကြတဲ့ မွန်တိုင်းရင်းသားတွေအနေနဲ့လုံခြုံရေးအစီအမံတွေကြိုတင်ပြင်ဆင်ထားကြဖို့နဲ့ မွန်ပြည်သစ်ပါတီနဲ့ပူးပေါင်းဆောင်ရွက်ကြဖို့ထုတ်ပြန်ချက်မှာ အသိပေးတာတွေ့ရပါတယ်။
မွန်ပြည်သစ်ပါတီဟာအပစ်ရပ် NCA လက်မှတ်ထိုးထားတဲ့အဖွဲ့ပြီး အာဏာသိမ်းစစ်ကောင်စီနဲ့ နေပြည်တော်မှာ တွေ့ဆုံဆွေးနွေးမှုပြုလုပ်ထားပါတယ်။
