ထန်တလန်တစ်မြို့လုံးကို မီးလောင်တိုက်သွင်းခဲ့သည့် စစ်အုပ်စုဆီမှ ဘာမှမျှော်လင့်စရာမရှိဟု အသိပေး
မင်းအောင်လှိုင်ဦးဆောင်သည့် စစ်ကောင်စီကို တူမီးဖြင့် စတင်တော်လှန်တိုက်ခိုက်ခဲ့သည့် ချင်းလူမျိုးများအနေဖြင့် ယခုနွေဦးတော်လှန်ရေးကို ဆက်လက်ဦးဆောင်မှုပေးရန် အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက တိုက်တွန်းလိုက်သည်။
ယနေ့ (ဖေဖော်ဝါရီ ၂၀ရက်)ကျရောက်သည့် (၇၅)နှစ်မြောက် ချင်းအမျိုးသားနေ့သို့ ယာယီသမ္မတက တက်ရောက် မိန့်ခွန်းပြောကြားခဲ့ခြင်းဖြစ်သည်။
ချင်းလူမျိုးသည် ခေတ်အဆက်ဆက်ကပင် ကိုယ့်မြေကိုယ့်ရေကို ကာကွယ်ရန်အတွက် ကိုယ့်လူမျိုးကို ကာကွယ်ရန်အတွက် ရရာလက်နက်ဖြင့် အသက်ပေးစွှန့်လွှတ်စွန့်စားခဲ့ကြသည့် လူမျိုးများဖြစ်ပြီး ယခု ၂၀၂၁ စစ်တပ်အာဏာသိမ်းမှုဖြစ်စဉ်တွင်လည်း မင်းအောင်လှိုင်ဦးဆောင်သည့် အကြမ်းဖက် စစ်ကောင်စီကို ချင်းလူမျိုးများက ရိုးရာဓလေ့အရ အမဲလိုက်ရာ၌ အသုံးပြုသည့် တူမီးသေနတ်များကို ကိုင်ပြီး မောင်းပြန် ကိုင်ဆောင်သည့် စစ်အာဏာရှင်များကို ပထမဆုံး စတင်တိုက်ခိုက်ခဲ့ကြောင်း ယာယီသမ္မတက ပြောသည်။
ချင်းလူမျိုးများသည် ဒီမိုကရေစီကို အလွန်မြတ်နိုးကြသူများဖြစ်ကြောင်း၊ လက်ရှိ အခြေအနေတွင် ချင်းပြည်နယ်၏ နယ်မြေအားလုံးနီးပါးကို ချင်းအမျိုးသားတပ်ဦး(CNF)၊ချင်းအမျိုးသားတပ်မတော်(CNA)နှင့် CJDC ဦးဆောင်သည့် ချင်းပြည်ကာကွယ်ရေးတပ်ဖွဲ့ (CDF)များက ထိန်းချုပ်ထားသည်ကို တွေ့ရမည်ဖြစ်ကြောင်း ယာယီသမ္မတက ပြောသည်။
“ချင်းလူမျိုးတွေအနေနဲ့ ဆက်လက်ပြီး နွေဦးတော်လှန်ရေးရဲ့တပ်ဦးမှာဆက်လက် ဦးဆောင် ပေးကြပါလို့ တိုက်တွန်းလိုပါတယ်။ တစ်ပြိုင်တည်းမှာ စစ်အာဏာရှင်ကို ဖြုတ်ချပြီး အနာဂတ် ဖက်ဒရယ်ပြည်ထောင်စု သစ်ကို တည်ဆောက်ရာမှာလည်း ချင်းလူမျိုးတွေ ဆက်လက်ပါဝင်နိုင်ကြဖို့ လိုအပ်ပါတယ်”ဟု ၎င်းက ဆိုသည်။
သို့မှသာ ချင်းလူမျိုးများ၊ ချင်းအမျိုးသားခေါင်းဆောင်များလိုလားသည့် ကိုယ်ပိုင်ပြဌာန်းခွင့် အပြည့်အ၀ရသည့် ချင်းပြည်ကို ရရှိလာမည်ဖြစ်ကြောင်း ယာယီသမ္မတက ပြောသည်။
ပြည်သူလူထုကို အကြမ်းဖက်သည့် ရွာများကို မီးရှို့သည့် အရပ်သားနေအိမ်များကို ဗုံးကြဲတိုက်ခိုက်နေသည့် စစ်ကောင်စီထံမှ ဘာမှ ရမည်မဟုတ်ကြောင်းလည်း ၎င်းက ပြောသည်။
“ထန်တလန်တစ်မြို့လုံးကို မီးလောင်တိုက်သွင်းခဲ့တဲ့ စစ်အုပ်စုဆီက ဘာမှ မျှော်လင့်စရာမရှိပါဘူး။ ဒါကို ချင်းလူမျိုးတွေလည်း ကောင်းကောင်းသိပါတယ်။ ဒါကြောင့် ချင်းလူမျိုးတွေက တော်လှန်ရေးမှာ တပ်ဦးကနေတိုက်နေကြတာဖြစ်တယ်” ဟု ယာယီသမ္မတက ပြောသည်။
စစ်အာဏာရှင်ပြုတ်ကျပြီး ချင်းပြည်ငြိမ်းချမ်းသွားသည့်အခါ၌ လက်တွေ့မြေပြင်တွင် ချင်းအမျိုးသားနေ့ ခြိမ့်ခြိမ့်သဲ ကျင်းပ နိုင်လိမ့်မည်ဖြစ်ပြီး ထိုနေ့မျိုးသို့ ရောက်လာရန် ယနေ့ ကျရောက်သည့် ချင်းအမျိုးသားနေ့မှ အားယူရမည်ဖြစ်ကြောင်း ယာယီသမ္မတက ပြောကြားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)