KIAနှင့် စစ်ကောင်စီတပ် မြစ်ကြီးနားမြို့နယ်တိုင်လွမ့်ရွာအနီး တိုက်ပွဲဖြစ်

ကချင်ပြည်နယ်၊ မြစ်ကြီးနားမြို့နယ်၊တိုင်လွမ့်ရွာအနီး၌ ကချင်လွတ်လပ်ရေးတပ်မတော်(KIA)နှင့် စစ်ကောင်စီတပ်တို့ ယနေ့ တိုက်ပွဲဖြစ်ပွားခဲ့ကြောင်း KIA သတင်းပြန်ကြားရေးဌာနက ယနေ့ ညပိုင်း၌ ဖော်ပြသည်။

KIA အမှတ်(၂)တပ်မဟာ အမှတ်(၁၁) တပ်ရင်း နယ်မြေ ဖြစ်သည့် အဆိုပါဒေသသို့ စစ်ကောင်စီတပ်ကစစ်​ကြောင်းထိုးလာ၍ KIAက စောင့်ကြို တိုက်ခိုက်ခဲ့ရာ မတ်လ ၁ရက်နေ့ နံနက် ၁၀နာရီ ခန့်တွင်တိုက်ပွဲစတင်ဖြစ်ခဲ့သည်ဟု​ဖော်ပြထားသည်။

မနက်ပိုင်းတိုက်ပွဲမှာမိနစ် (၂၀ )ဝန်းကျင်ကြာပြီးနှစ်ဖက် လက်နက်ကြီး အပြန်အလှန် ပစ်ခတ်ခဲ့ကြောင်းသိရသည်။ တိုက်ပွဲတွင် နှစ်ဖက်ထိခိုက်ကျဆုံး အခြေအနေကို ဖော်ပြမထားပေ။

မွန်းလွဲပိုင်း၌ စစ်ကောင်စီတပ်ကထပ်မံထိုးစစ်ဆင်လာ၍ တိုက်ပွဲထပ်ဖြစ်ခဲ့သည်ဟုသိရသည်။

ထိုအပြင်စစ်​ကောင်စီတပ်က စစ်​ကြောင်းထိုးရာအနီးတစ်ဝိုက်ရှိပြည်သူများကို ဖမ်းဆီးခေါ်​ဆောင်သွား​ကြောင်း​ဒေသခံသတင်းရင်းမြစ်များက​ပြောသည်။

တိုက်ပွဲနှင့်ပတ်သပ်၍​မေးမြန်းရန် KIA သတင်းပြန်ကြား​ရေးတာဝန်ခံ ဗိုလ်မှူး​ကြီးနော်ဘူကိုဆက်သွယ်ကြိုးစား​သော်လည်းဆက်သွယ်မရ​သေးပါ။

အဆိုပါဒေသ၌ ဖေဖော်ဝါရီ ၂၈ရက်ကတည်းက စစ်ကောင်စီတပ်က အင်အားတိုးချဲ့ကာ ထိုးစစ်ဆင်လာ၍ KIAက မိုင်းဆွဲတိုက်ခိုက်ခဲ့ရာ ထိတွေ့တိုက်ပွဲဖြစ်ခဲ့​သေးကြောင်းလည်းသိရ သည်။

KIAနှင့်စစ်ကောင်စီတပ်တို့သည် ပြီးခဲ့သည့် ဖေဖော်ဝါရီလအတွင်းက ကချင်ပြည်နယ် မံစီမြို့နယ်နှင့် ရှမ်းမြောက် မူဆယ် – ကွတ်ခိုင်ကြား၌ တိုက်ပွဲများ ပြင်းထန်စွာဖြစ်ပွားခဲ့သည်။