စစ်ကိုင်းတိုင်း၊ ချောင်းဦးမြို့နယ်ရှိ ခင်မွန်ကျေးရွာအား စစ်ကောင်စီတပ်က လက်နက်ကြီးဖြင့် ဝင်ရောက်ပစ်ခတ်ခဲ့၍ အမျိုးသမီးတစ်ဦးနှင့် ကလေးငယ်တစ်ဦးသေဆုံးပြီး နေအိမ် ၅၀ခန့်လည်း မီးရှို့ဖျက်ဆီးသွားကြောင်း ဒေသတွင်းသတင်းရင်းမြစ်များက ပြောသည်။
ယနေ့ (မတ်လ ၃ရက်) နံနက်ပိုင်းက မုံရွာမြို့ အနောက်မြောက်တိုင်းစစ်ဌာနချုပ်(နမခ)မှ ယာဥ်နှစ်စီးဖြင့် ထွက်လာသော စစ်ကောင်စီတပ်သည် နံနက်၁၀နာရီခန့်တွင် ခင်မွန်ရွာသို့ စစ်ကြောင်းနှစ်ခုခွဲ ဝင်ရောက်ခဲ့သည်။
![(မီးရှို့ဖျက်ဆီးခံရသော ခင်မွန်ကျေးရွာအား တွေ့ရစဥ်။ ဓာတ်ပုံ-Khin Mon Revolution)](https://i0.wp.com/www.ludunwayoo.com/wp-content/uploads/2023/03/329744012_562585072503886_3769428059891329117_n.png?resize=720%2C542&ssl=1)
ကျေးရွာအား (၆၀)မမ၊ (၄ဝ) မမ လက်နက်ကြီးများအပြင် လက်နက်ငယ်များဖြင့် ပစ်ခတ်ခဲ့၍ အသက် (၆၀)အရွယ် အမျိုးသမီးတစ်ဦးနှင့် ၁၃ နှစ်အရွယ်ကလေးငယ် တစ်ဦးသေဆုံးခဲ့ကြောင်း၊ အမျိုးသားတစ်ဦးလည်း ထိခိုက်ဒဏ်ရာရရှိခဲ့ပြီး စိုးရိမ်ရသည့်အခြေအနေတွင်ရှိကြောင်း Khin Mon Revolution က ဖော်ပြသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ထို့အပြင် ဖမ်းဆီးခံထားရသည့် ပြည်သူများလည်းရှိနေပြီး ဒေသခံထောင်ဂဏန်းခန့် ထွက်ပြေးတိမ်းရှောင်နေရကြောင်းလည်း သိရသည်။
![(မီးရှို့ဖျက်ဆီးခံရသော ခင်မွန်ကျေးရွာအား တွေ့ရစဥ်။ ဓာတ်ပုံ-Khin Mon Revolution)](https://i0.wp.com/www.ludunwayoo.com/wp-content/uploads/2023/03/330166494_245542314468924_5335532782244954601_n.png?resize=720%2C542&ssl=1)
![(မီးရှို့ဖျက်ဆီးခံရသော ခင်မွန်ကျေးရွာအား တွေ့ရစဥ်။ ဓာတ်ပုံ-Khin Mon Revolution)](https://i0.wp.com/www.ludunwayoo.com/wp-content/uploads/2023/03/329258995_601044041476232_2638726242181357437_n.png?resize=720%2C542&ssl=1)
“ ဒီနေ့လေတိုက်တော့ ပိုဆိုးတယ်။ မီးကြွင်းမီးကျန်ကနေ အခုညထိလောင်နေတယ်။ အခုညပိုင်းအိမ်၈ လုံးထပ်ပါတယ်လို့ ပြောတယ်။” ဟု ဒေသခံတစ်ဦးက ပြောသည်။
ထို့အပြင် စစ်ကောင်စီစစ်ကြောင်းသည် ညနေ ၅နာရီခွဲအချိန်ထိ ပြန်မထွက်သေးဘဲ ကားလမ်းမကြီးဘေးက နေအိမ်များတွင် သောက်စားနေကြပြီး သေနတ်များပစ်ဖောက်နေကြောင်း ဒေသခံများက ပြောသည်။
စစ်ကောင်စီတပ်သည် ယမန်နေ့ကလည်း စစ်ကိုင်းမြို့နယ်တာတိုင်ကျေးရွာက ပြည်သူ၁၇ဦးနှင့် ဝက်လက်မြို့နယ်က ဒေသခံ ပြည်သူ ၇ဦးခန့်အား သတ်ဖြတ်သွားခဲ့သေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)