စစ်ကိုင်းတိုင်း၊ ယင်းမာပင်မြို့နယ်၊ ကုန်းကျေးရွာကို စစ်ကောင်စီတပ်က နှစ်ရက်ဆက်တိုက် မီးရှို့ဖျက်ဆီးခဲ့၍ နေအိမ် ၄၀၀ခန့် ပျက်စီးဆုံးရှုံးခဲ့ပြီး ဒေသခံပြည်သူသုံးဦး သတ်ဖြတ်ခံခဲ့ရကြောင်း ဒေသတွင်းသတင်းရင်းမြစ်များက ပြောသည်။
စစ်ကောင်စီတပ်သည် ယင်းမာပင်မြို့နယ် ကုန်းရွာအား ဖေဖော်ဝါရီ ၂၈ရက် ညနေပိုင်းမှစ၍ မီးရှို့ခဲ့ပြီး မတ်လ ၁ရက်တွင်လည်း မီးဆက်ရှို့ခဲ့၍ အိမ်ခြေ ၄၀၀ခန့် လောင်ကျွမ်းပျက်စီးသွားကြောင်း ဒေသခံများက ပြောသည်။
ထို့အပြင် ကျွန်းတောမှ ဖမ်းဆီးခေါ်ဆောင်ခံခဲ့ရသူ အမျိုးသားနှစ်ဦးနှင့် အမျိုးသမီးတစ်ဦးကို သတ်ဖြတ်သွားကြောင်း ဒေသတွင်းသတင်းရင်းမြစ်က ပြောသည်။
“ ညပိုင်းရှို့ပြီး ကျန်နေတဲ့အိမ်တွေကို နံနက်ပိုင်းမှာဆက်ရှို့တာ။ စီးစရာဖိနပ်တောင်မကျန်တော့ဘူး” ဟု ဒေသခံတစ်ဦးက ပြောသည်။
မီးရှို့ဖျက်ဆီးခံခဲ့ရသည့် ကုန်းရွာမှ ပြည်သူများအကူအညီများလိုအပ်နေကြောင်း သိရသည်။
အဆိုပါ ကုန်းရွာအနီးတွင် စစ်ကောင်စီတပ်နှင့် ဒေသတွင်း PDFများ တိုက်ပွဲဖြစ်ပွားခဲ့ပြီး စစ်အုပ်စုဘက်က အထိအခိုက်များသည်ဟုသိရပြီး ဒေသတွင်း PDF များက သတင်းထုတ်ပြန်ခြင်းမရှိသေးပေ။
