ကော်သူးလေအုပ်ချုပ်နယ်မြေ ဆောထိနှင့် လယ်ဒိုမြို့နယ်တွင် စစ်တပ်၏ လေကြောင်းတိုက်ခိုက်မှုကြောင့် စာသင်ကျောင်းနှင့် နေအိမ်များ မီးလောင်ပြာကျခဲ့ပြီး ဒေသခံ (၃၀၀၀)ကျော် ဘေးလွတ်ရာကို ထွက်ပြေးတိမ်းရှောင်နေရသည်ဟု ကေအဲန်ယူ-ကရင်အမျိုးသားအစည်းအရုံးက ထုတ်ပြန်သည်။
ကေအဲန်ယူ ခလယ်လွီထူ(ညောင်လေးပင်) ခရိုင် တပ်မဟာ(၃)နယ်မြေ ဆောထိ(ရွှေကျင်)နှင့် လယ်ဒို(ကျောက်ကြီး)မြို့နယ်တွင် မတ်လ(၂၀)ရက် ညနေပိုင်းက တိုက်လေယာဉ်နှင့်(၉)ကြိမ်ခန့် လာရောက်ခဲ့ပြီး ဗုံး(၂၈)လုံးထက်မနည်း ကြဲချခဲ့သည်ဟု ထုတ်ပြန်ချက်တွင် ဖော်ပြထားသည်။
![ကော်သူးလေအတွင်းရှိ ကျေးရွာနှစ်ဆယ်ကျော် လေကြောင်းတိုက်ခိုက်မှုဆိုးဆိုးရွားရွားခံနေရ](https://i0.wp.com/www.ludunwayoo.com/wp-content/uploads/2023/03/337255904_881013843182264_9007578835425389603_n.jpg?resize=450%2C600&ssl=1)
![ကော်သူးလေအတွင်းရှိ ကျေးရွာနှစ်ဆယ်ကျော် လေကြောင်းတိုက်ခိုက်မှုဆိုးဆိုးရွားရွားခံနေရ](https://i0.wp.com/www.ludunwayoo.com/wp-content/uploads/2023/03/337286085_605095568137451_918460021892477921_n.jpg?resize=576%2C768&ssl=1)
ကေအဲန်ယူ-ဆောထိမြို့နယ် အုပ်ချုပ်နယ်မြေ တကက်ပူကျေးရွာတွင် လည်း တိုက်လေယာဉ်နှစ်စီးနှင့် (၅)ကြိမ်လာရောက်ခဲ့ပြီး ဗုံးအလုံး (၂၀) ထက်မနည်း ကြဲချတိုက်ခိုက်ခဲ့ရာ တကက်ပူးကျေးရွာနှင့် အနီးအနားရှိ ကျေးရွာများဖြစ်သည့် သေခိုစယ်ဒဲ၊ ကော်မူးဒဲနှင့် ထီးမော်ကွယ်ခီးကျေးရွာများမှ ဒေသခံပြည်သူလူထုများသည် ဘေးလွတ်ရာသို့ ထွက်ပြေးတိမ်းရှောင်နေခဲ့ရသည်။
ထို့အတူ ကေအဲန်ယူ-လယ်ဒိုမြို့နယ် တကော်ဒဲကျေးရွာတွင်လည်း စစ်ကောင်စီတပ်၏ တိုက်လေယာဉ်နှစ်စီးသည် ဗုံး(၈)လုံးခန့် ကြဲချတိုက်ခိုက်ခဲ့ရာ ဒေသခံပြည်သူလူထုနေအိမ်(၅)လုံးနှင့် မူလတန်းကျောင်းတစ်ကျောင်း မီးလောင်ပြာကျသွားခဲ့ရပြီး သက်ကြီးရွယ်အိုတစ်ဦး ထိခိုက်ဒဏ်ရာရရှိသွားခဲ့သည် ကေအဲန်ယူက ထုတ်ပြန်ပြောကြားသည်။
![ကော်သူးလေအတွင်းရှိ ကျေးရွာနှစ်ဆယ်ကျော် လေကြောင်းတိုက်ခိုက်မှုဆိုးဆိုးရွားရွားခံနေရ](https://i0.wp.com/www.ludunwayoo.com/wp-content/uploads/2023/03/337255237_1543310316162362_3494279485122867690_n.jpg?resize=768%2C576&ssl=1)
![ကော်သူးလေအတွင်းရှိ ကျေးရွာနှစ်ဆယ်ကျော် လေကြောင်းတိုက်ခိုက်မှုဆိုးဆိုးရွားရွားခံနေရ](https://i0.wp.com/www.ludunwayoo.com/wp-content/uploads/2023/03/337152039_891487822060244_678347049088878229_n.jpg?resize=768%2C576&ssl=1)
ထို့သို့ စစ်ကောင်စီတပ်၏ ဗုံးကြဲတိုက်ခိုက်မှုများကြောင်း ကေအဲန်ယူ-ဆောထိမြို့နယ်နှင့် လယ်ဒိုမြို့နယ်အတွင်းရှိ ကျေးရွာပေါင်း(၂၀)ခန့်က ဒေသခံပြည်သူလူထု(၃၁၅၉)ဦးသည် ဘေးလွတ်ရာသို့ ထွက်ပြေးတိမ်းရှောင်နေခဲ့ရကြောင်း ထုတ်ပြန်ထားချက်အရ သိရသည်။
ကေအဲန်ယူ-ဆောထိမြို့နယ်နှင့် လယ်ဒိုမြို့နယ်တွင် စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော်(KNLA)တပ်မဟာ(၃) လက်အောက်ခံတပ်ဖွဲ့ဝင်များ ယခု မတ်လအတွင်း တိုက်ပွဲများ ဆက်လက်ဖြစ်ပွားနေပြီး အရပ်သားအပေါ် ပစ်မှတ်ထားတိုက်ခိုက်သည့် စစ်တပ်၏ လူ့အခွင့်အရေးချိုးဖောက်မှုနှင့် ထိုးစစ်ဆင်မှုကြောင့် အရပ်သားပြည်သူသောင်းချီ ထွက်ပြေးတိမ်းရှောင်နေခဲ့ရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)