ရန်ကုန်မြို့ ကြည့်မြင်တိုင်မြို့နယ်၊ မယ်ဇလီပင်လမ်းအောက်ထောင့် နှင့် ကမ်းနားလမ်းမပေါ်ရှိ စစ်ကောင်စီလက်အောက်ခံ ကြည့်မြင်တိုင်မြို့နယ်တရားရုံးအား ဗုံးခွဲတိုက်ခိုက်ခဲ့ကြောင်း KMD18 – Hunter Unitက ထုတ်ပြန်သည်။
ယနေ့(မတ်လ ၂၃)နေ့လည် ၁၂ နာရီခန့်တွင် အကြမ်းဖက်စစ်ကောင်စီတပ် လက်အောက်ခံ ကြည့်မြင်တိုင်မြို့နယ်တရားရုံးအား အဝေးထိန်းမိုင်းများ အသုံးပြု၍ ဖောက်ခွဲတိုက်ခိုက်ခဲ့ပြီး ယင်းတိုက်ခိုက်မှုကြောင့် တရားရုံးအပြင်ဘက် အဆောက်အဦးအချို့ ထိခိုက်ပျက်ဆီးခဲ့ကြောင်း KMD18 – Hunter Unit က အသိပေး ဖော်ပြခဲ့သည်။
“ နေ့လည် ၁၂ ကျော်လောက်က ကြည့်မြင်တိုင် ကမ်းနားလမ်းပေါ်က တရားရုံးနားမှာ ဗုံးပေါက်သံအကျယ်ကြီး တချက်ကြားလိုက်ရပါတယ်။ တရားရုံးအပြင်ဘက် အဆောက်အဦးအချို့ ထိခိုက်ပျက်ဆီးသွားတာ တွေ့ရတယ်။ လူထိမထိတော့ မသေချာဘူး။ စစ်ကားတစ်စီးကတော့ တရားရုံးဘက်ကနေ ကုတင် ၅၀၀ဘက်ကို မောင်းထွက်သွားတာ တွေ့လိုက်တယ် “ ဟု ကြည့်မြင်တိုင်မြို့နယ်နေ ပြည်သူတစ်ဦးက ဆိုသည်။
အကြမ်းဖက်စစ်ကောင်စီတပ်၏ လက်ကိုင်တုတ်အဖြစ် အပြစ်မဲ့ပြည်သူကို မတရားဖမ်းဆီးနေသော ရဲများနှင့် မတရားပုဒ်မတပ် ထောင်ချနေသော မတရားသူကြီးများကို ပညာပေးဆုံးမလိုခြင်း၊ စစ်ကိုင်းနှင့် ကရင်နီဒေသများအား မတရားနည်းဖြင့် လက်နက်အားကိုး ထိုးစစ်ဆင်ခြင်း တို့ကို လက်တုံ့ပြန်သည့်အနေဖြင့် တိုက်ခိုက်ခြင်း ဖြစ်ကြောင်း KMD18 – Hunter Unit က ဆိုသည်။
အဆိုပါ ပေါက်ကွဲမှုအပြီးနောက် စစ်ကောင်စီဝင် အများအပြား ရောက်ရှိလာကာ ကမ်းနားလမ်း၊ အထက် ကြည့်မြင်တိုင်လမ်း၊ ဗားကရာလမ်းတို့ကို ပိတ်ဆို့၍ စစ်ဆေးမှုများ ပြုလုပ်ခဲ့ကြောင်း ဒေသခံများက ဆိုသည်။
ထို့အပြင် ယနေ့ညပိုင်းတွင်လည်း ကြည့်မြင်တိုင်မြို့နယ်အတွင်း အကြမ်းဖက် စစ်ကောင်စီတပ်က ဝင်ရောက်ဧည့်စာရင်းစစ်ခြင်းများ ဖြစ်ပေါ်နိုင်သဖြင့် ပြည်သူများ သတိထားနိုင်ကြရန်လည်း ဒေသခံ တော်လှန်ရေးအင်အားစုက အသိပေးထုတ်ပြန်ထားသည်။
