ဖက်ဆစ်တော်လှန်ရေးနေ့တွင် စစ်ကောင်စီက လုံခြုံရေးတင်းကျပ်ထားသော်လည်း ဒေါ်အောင်ဆန်းစုကြည်လမ်းမတွင် မြနန္ဒာစစ်ဆင်ရေး စာတန်းချိတ်ဆွဲပြီး မိုင်းခွဲတိုက်ခိုက်ခဲ့ကြောင်း ယင်းစစ်ဆင်ရေးမှ တာဝန်ရှိသူတစ်ဦးက ပြောသည်။
“ ပထမတစ်လုံးကို ကျွန်တော်တို့ခွဲပြီး ခေါ်တာ။ နောက်နှစ်လုံးက တစ်လုံးကို တွေ့သွားပြီး ရှင်းလင်းရေးလုပ်တဲ့ အချိန် နောက်တစ်လုံးကိုခွဲလိုက်တာ ” ဟု ၎င်းက ပြောသည်။
ယင်းစစ်ဆင်ရေးကို မတ်လ ၂၇ ရက် နံနက်က မန္တလေးမြို့ ဒေါ်အောင်ဆန်းစုကြည်လမ်း ၊ ရတနာပုံခန်းမအနီးတွင် လုပ်ဆောင်ခဲ့ခြင်းဖြစ်ပြီး အဖွဲ့သားအားလုံးဘေးကင်းကြောင်း ၎င်းက ပြောသည်။
“ ပေါက်ကွဲပြီးနောက် စခ(စစ်ကောင်စီတပ်)များမှ ရမ်းသမ်းပစ်ခတ်နေပြီး လူနာတင်ကားများလည်းဝင်သွားကြောင်း မြေပြင်သတင်းများအရသိရှိရပါတယ်။ မြနန္ဒာစစ်ဆင်ရေး မှရဲဘော်များ အထိအခိုက်မရှိဆုတ်ခွာနိုင်ခဲ့ကာ စခ ၂ကောင်သေဆုံးကြောင်းအတည်ပြုနိုင်ပြီး ထိခိုက်မှုများနိုင်ကြောင်းသိရပါသည်။” ဟု မြနန္ဒာစစ်ဆင်ရေးက သတင်းထုတ်ပြန်ထားသည်။
ထို့အပြင် မြနန္ဒာစစ်ဆင်ရေးများ အရှိန်မြှင့်လုပ်ဆောင်နိုင်ရန် ပြည်သူများအနေဖြင့် ထောက်ပံ့မှုများပြုလုပ်ပေးရန် ၎င်းက တောင်းဆိုသည်။
လက်ရှိတွင် ၎င်းတို့၏ နေထိုင် စားသောက်စရိတ်မတွက် အဆင်ပြေသော်လည်း မစ်ရှင်များပြုလုပ်ရန် ပစ္စည်းဖိုးလိုအပ်နေကြောင်း ၎င်းက ပြောသည်။
