လက်နက်မဲ့ပြည်သူများအား ဗုံးကြဲတိုက်ခိုက်သည့် စစ်ကောင်စီလုပ်ရပ် CNO/CNDF ပြင်းထန်စွာ ကန့်ကွက်
ထန်တလန်မြို့နယ်ရှိ ခွာဖိုကျေးရွာကို အာဏာသိမ်းစစ်ကောင်စီက ယနေ့ လေကြောင်းမှ ဗုံးကြဲတိုက်ခိုက်ခဲ့ရာ ကလေးငယ်နှင့် အမျိုးသမီးများအပါအဝင် အရပ်သား ပြည်သူ ၁၀ဦး အသက်ဆုံးရှုံးခဲ့ရပြီး ၂၀ဦး ကျော်ဒဏ်ရာရခဲ့ကြောင်း ချင်းအမျိုးသားအဖွဲ့ချုပ်/ချင်းအမျိုးသားကာကွယ်ရေးတပ်(CNO/CNDF)က အသိပေးထုတ်ပြန်သည်။
အရပ်သား ပြည်သူများ နေထိုင်ရာ ခွာဖိုရွာအတွင်းသို့ စစ်ကောင်စီက မတ်လ ၃၀ ရက် နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်ပြီး ပြည်သူများ သေဆုံးဒဏ်ရာရခဲ့မှု အပေါ် လွန်စွာ ဝမ်းနည်းကြေကွဲရသည်ဟု ဖော်ပြသည်။
အကြမ်းဖက်စစ်ကောင်စီမှ လက်နက်မဲ့အရပ်သားပြည်သူများအပေါ် တိုက်လေယာဉ်များအသုံးပြုပြီး ရက်စက်ယုတ်မာစွာ ဗုံးကြဲချမှုသည် လူမဆန်သည့် စစ်ရာဇဝတ်မှုဖြစ်ကြောင်း၊ စစ်ကောင်စီ၏ လုပ်ရပ်အပေါ် ပြင်းထန်စွာ ကန့်ကွက်ရှုတ်ချကြောင်း ထုတ်ပြန်သည်။
လူမဆန်သည့် လုပ်ရပ်များ အကြိမ်ကြိမ်ကျူးလွန်နေသော စစ်ကောင်စီနှင့် ၎င်း၏ ထောက်တိုင်များကို နိုင်ငံတကာနှင့် ပြည်တွင်းရှိ ပြည်သူများက ဘုံရန်သူအဖြစ်သတ်မှတ်ပြီး အမြစ်ပြတ်သည်အထိ ချေမှုန်းကြရန် CNO/CNDFက တိုက်တွန်းထားသည်။
ယခု လေကြောင်း တိုက်ခိုက်ခံရ၌ သေဆုံးသူများတွင် အမျိုးသမီးများလည်း ပါဝင်ကြောင်း ချင်းအမျိုးသား တပ်မတော်(CNA) ပြောရေးဆိုခွင့်ရှိသူ ဆလိုင်းထက်နီက ပြောကြားထားပြီး ဒဏ်ရာပြင်းထန်သူများ ထပ်မံအသက်ဆုံးနိုင်ကြောင်း အသိပေးထားသည်။
