မန္တလေးမြို့ပေါ် မှာရှိတဲ့ NLD ပါတီရုံး ဆိုင်းဘုတ်တွေ ကို ပြီးခဲ့တဲ့ ရက်ပိုင်းတွေအတွင်း လူတစ်စုက လိုက်လံပြီး ဖျက်ဆီး ဖြုတ်ချတာတွေ လုပ်နေတယ်လို့ ဒေသခံအချို့ဆီက စုံစမ်းသိရပါတယ်။
ပါတီ ဆိုင်းဘုတ်ဖြုတ်ချတာတွေဟာ ချမ်းအေးသာစံမြို့နယ်မှာ ရှိတဲ့ NLD ပါတီ တိုင်းရုံး နဲ့ ပုသိမ်ကြီးမြို့နယ် က ပါတီရုံးတွေမှာဖြစ်ပွားခဲ့တာပါ။
NLD ပါတီ ဆိုင်းဘုတ်ကို ဖျက်ဆီးဖြုတ်ချရာမှာ စစ်ကောင်စီတပ်ဖွဲ့ တွေနဲ့အတူ အရပ်ဝတ်တွေပါ ပါလာကြတယ်လို့ ဒေသခံအချို့ က ပြောပြပါတယ်။
ချမ်းအေးသာစံမြို့နယ် ၊၆၂ လမ်းပေါ်မှာရှိတဲ့ NLD ပါတီ ရုံးဆိုင်းဘုတ်ဖြုတ်ချခံရတဲ့ ရုပ်သံဖိုင် ကို ဧပြီလ ၄ ရက်က စစ်ကောင်စီလော်ဘီ လူမှုကွန်ရက်တွေမှာ စတင်ပျံနှံလာပါတယ်။
အဲဒီရုပ်သံဖိုင်အရ ပါတီရုံးအပေါ်ထပ်မှာ တပ်ဆင်ထားတဲ့ ဆိုင်းဘုတ်ကို ဖြုတ်ချပြီး မြေပြင်ပေါ် ပစ်ချလိုက်တာတွေ့ရပါတယ်။
မနေ့ ဧပြီလ ၅ ရက်ညပိုင်းမှာလည်း ပုသိမ်ကြီးမြို့နယ် NLD ပါတီရုံး ဝင်ရောက်ဖျက်ဆီးခံရသလို ပါတီဆိုင်းဘုတ်ပါ ဖြုတ်ချခံလိုက်ရတယ်လို့ NLD ပါတီဝင်အချို့ထံကသိရပါတယ်။
“ပါတီဝင်တွေနဲ့ ထောက်ခံသူတွေကို ဖမ်းဆီးသတ်ဖြတ်နေတော့ ရုံးတွေကိုလည်း မကြည့်နိုင်တော့ဘူး” လို့ အမည်မဖော်လိုတဲ့ NLD ပါတီ ဝင်တစ်ဦးကပြောပြပါတယ်။
ပြီးခဲ့တဲ့ ၂၀၂၁ ခုနှစ်အတွင်းမှာဆိုရင် မန္တလေးက NLD ပါတီရုံးတွေ ဗုံးခွဲခံရတာတွေ ရှိခဲ့ပါတယ်။
