အင်ဒိုနီးရှား နိုင်ငံက နတ်ဆရာ တစ်ဦးကို အနည်းဆုံး လူတစ်ဒါဇင် သတ်ဖြတ်မှုနဲ့ ရဲတွေက ဖမ်းဆီးလိုက်ကြောင်း သိရပါတယ်။
ကျေးရွာတစ်ခုက နတ်ဆရာရဲ့ ခြံဝင်းထဲမှာ မြှုပ်နှံထားတဲ့ ရုပ်အလောင်းတွေကို ရှာတွေ့ခဲ့တဲ့နောက် ရဲတွေက အသက် ၄၅ နှစ်အရွယ် ဆလာမက် တိုဟာရီကို ဖမ်းဆီးလိုက်တာ ဖြစ်ပါတယ်။ သူကလည်း ခြံထဲမှာ အလောင်းတွေ မြှုပ်နှံထားတဲ့ ကိစ္စကို ဝန်ခံခဲ့ပါတယ်။
အလယ်ပိုင်း ဂျာဗားက ဘန်ဂျာနီဂါရာ ဒေသမှာ နေထိုင်တဲ့ နတ်ဆရာဟာ အခုအခါမှာတော့ လူသတ်မှုတွေအတွက် တရားစွဲဆို ခံထားရပါတယ်။ ရဲတွေရဲ့ အဆိုအရ သူဟာ ကိုးကွယ်သူတွေကို ငွေတွေ တိုးပွားအောင် စောင်မမယ်လို့ လိမ်ညာထားခဲ့ပါတယ်။ လက်တွေ့ ဖြစ်မလာတဲ့အခါ အလိမ်ခံရသူတွေက ဒေါသတကြီး ရန်တွေ့တော့ နတ်ဆရာက အဆိပ်တိုက်ပြီး နှုတ်ပိတ်ခဲ့တာလို့ သိရပါတယ်။
သူ့ရဲ့ နောက်ဆုံးသားကောင် ဖြစ်ခဲ့သူ တစ်ဦးရဲ့ သားက ရဲတွေဆီ တိုင်ကြားခဲ့တဲ့နောက် နတ်ဆရာရဲ့ ခြံဝင်းထဲကို ရှာဖွေရာက ရုပ်အလောင်းတွေ မြှုပ်ထားမှန်း ဖော်ထုတ်နိုင်ခဲ့တာပါ။ သေဆုံးသူဟာ မတ်လ ၂၄ ရက် တိုဟာရီဆီ သွားရောက်တဲ့အကြောင်း သားဖြစ်သူဆီ WhatsAppကနေ ဆက်သွယ် အသိပေးသွားခဲ့ပါတယ်။ တကယ်လို့ ၃ ရက်ကြာတဲ့ထိ သူပြန်မလာရင် ရဲတိုင်ဖို့ပါ မှာခဲ့တယ်လို့ ဆိုပါတယ်။ တကယ်လည်း ဖခင် ပြန်မလာတော့တဲ့အခါ သားဖြစ်သူက ရဲတွေဆီ အကြောင်းကြားခဲ့တာ ဖြစ်ပါတယ်။
ရဲတွေက ခြံထဲမှာ တူးဆွ ရှာဖွေတဲ့အခါ ရုပ်အလောင်း တစ်ဒါဇင်ထက်မနည်း ရှာတွေ့ခဲ့ပြီး တချို့ အလောင်းတွေက ကျင်းတစ်ခုထဲမှာ နှစ်လောင်းသုံးလောင်း စုမြှုပ်ထားတာ ဖြစ်ပါတယ်။ ပြီးတော့ ကျင်းတစ်ခုစီမှာ ရေမန်း သဘောမျိုး ဓာတ်ဆားရည် ပုလင်းတစ်လုံးစီ ထည့်သွင်း ဖျောက်ဖျက်ထားတာကိုလည်း တွေ့ရပါတယ်။
တချို့ အလောင်းတွေဟာ မြှုပ်ထားတာ ၆ လထက်မနည်း ကြာပြီလို့ ယူဆရပြီး သေဆုံးသူတွေက အသက် ၂၅ နှစ်ကနေ ၅၀ ကြား အရွယ်တွေပါ။ အလောင်းတွေဟာ အကြမ်းဖက် ရန်ပြု သတ်ဖြတ် ခံထားရတဲ့ အထောက်အထားတော့ မတွေ့ရဘူးလို့ ဆိုပါတယ်။
နတ်ဆရာ တိုဟာရီဟာ ၂၀၁၉ တုန်းကလည်း ငွေကြေးအတု ပြုလုပ်မှုနဲ့ ထောင်ချ ခံခဲ့ရဖူးပါတယ်။ အခုမှုခင်းအတွက် ပြစ်မှု ထင်ရှားခဲ့မယ် ဆိုရင်တော့ သူဟာ သေဒဏ်ထိ ကျခံရမယ့် အလားအလာ ရှိနေပါတယ်။
သူက ကိုယ့်ကိုယ်ကိုယ် နတ်ဆရာ တစ်ဦးအဖြစ် ကြေညာပြီး ရူပီးငွေ သန်း ၇၀ ကို ၅ ဘီလီယံထိ တိုးပွားအောင် ဖန်ဆင်းနိုင်တယ်လို့ ရွာသားတွေကို ပြောဆိုထားခဲ့ပါတယ်။ သူ့လိမ်ညာမှုကို သိသွားလို့ မကျေနပ်တဲ့ ကိုးကွယ်သူတွေကို နေ့ခင်းအချိန် လာခဲ့ဖို့ပြောပြီး ပိုတက်ဆီယမ် ဆိုင်ယာနိုက်နဲ့ အပြင်းစား အိပ်ဆေးတွေ ရောထားတဲ့ အဆိပ်ရည်ကို ရေမန်းအဖြစ် အယုံသွင်းပြီး တိုက်လေ့ရှိတယ်လို့ ရဲတွေက ဆိုပါတယ်။
ရဲတွေက တိုဟာရီ အနေနဲ့ ငွေတွေ တိုးပွားအောင် တန်ခိုးပြ ဖန်ဆင်းနိုင်တယ်လို့ လူမှုကွန်ရက်မှာ လော်ဘီလုပ် ရေးသားတဲ့ သူ့တပည့် တချို့ကိုလည်း ဖမ်းဆီးထားပေမယ့် နတ်ဆရာက လူသတ်မှုတွေကို သူတစ်ဦးတည်း ကျူးလွန်တာလို့ ထွက်ဆိုထားကြောင်း သိရပါတယ်။
