အိန္ဒိယနိုင်ငံ ၊ မဏိပူရ်ပြည်နယ် ၊လန်မ်ကားမြို့တွင် ကလေးငယ် ခြောက်ဦးအပါအဝင် စစ်ဘေးရှောင်မြန်မာနိုင်ငံသား ၂၃ဦးကို အိန္ဒိယရဲတပ်ဖွဲ့ကတရားမဝင်ခိုးဝင်သည်ဟုဆိုကာ ဖမ်းဆီးထိန်းသိမ်းခံရကြောင်း သတင်းရရှိသည်။
လန်မ်ကားမြို့ ကွန်ပွီရပ်ကွက်တွင်ယက္ကန်းယက်လုပ်ငန်းလုပ်နေသော မြန်မာနိုင်ငံသားမိသားစုများကို ဧပြီလ ၆ရက် နေ့လယ်တွင် အိန္ဒိယရဲများက ဖမ်းဆီးခဲ့ခြင်းဖြစ်ကြောင်းမီဇိုရမ်တွင် နေထိုင်သောမြန်မာအချို့ကပြောသည်။
“ရဲကားတွေရုတ်တရက်ရောက်လာပြီး ဝင်စီးတာဗျ။ တော်တော်လေး အခြေအနေ ရှုပ်ထွေးသွားတယ်။ သူတို့(ဖမ်းဆီးခံရသောမြန်မာများ)ကို ထိန်းသိမ်းရေးစခန်းကိုပို့လိုက်ကြပြီ”ဟု မီဇိုရမ်မှ မြန်မာတစ်ဦးကပြောသည်။
ဖမ်းဆီးခံရသူများတွင် အမျိုးသားခြောက်ဦး ၊ အမျိုးသမီး ၁၁ဦးနှင့် ကလေးငယ် ခြောက်ဦးပါဝင်သည်ဟု သတင်းရရှိသည်။ဖမ်းဆီးခံမြန်မာများသည် အိန္ဒိယနိုင်ငံသို့ တရားမဝင် ဝင်ရောက်လာသည်ဟုဆိုကာ စစ်ဆေးခံနေရကြောင်းလည်းစုံစမ်းသိရသည်။
အိန္ဒိယနိုင်ငံ ၊ မဏိပူရ်ပြည်နယ် ၊အင်ဖာထိမ်းသိမ်းရေး စခန်းတွင်လည်း မြန်မာနိုင်ငံသား နှစ်ရာခန့်ဖမ်းဆီးထိန်းသိမ်းခံထားရကြောင်း မဏိပူရ်အခအခြေစိုက်Burma Refugee Committee Kabaw Valleyက ထုတ်ဖော်ပြောကြားထားသည်။
စစ်တပ်အာဏာသိမ်းပြီးနောက် မြန်မာ-အိန္ဒိယနယ်စပ်မှတဆင့်မဏိပူရ်ပြည်နယ်ဘက်သို့ ထွက်ပြေးတိမ်းရှောင်ခဲ့သည့် မြန်မာနိုင်ငံသား စစ်ဘေးရှောင် သုံးထောင်ကျော် ဝန်းကျင်ခန့်ရှိနေကြောင်း သတင်းရရှိသည်။ ထိန်းသိမ်းခံထားရသူအချို့ အာမခံဖြင့် ပြန်လွတ်မြောက်လာသော်လည်း အများစုသည် ထိန်းသိမ်းရေးစခန်းများတွင်သာရှိနေဆဲဖြစ်ပြီး လူသားချင်းစာနာထောက်ထားမှုအရ ပြန်လွှတ်ပေးရန် အိန္ဒိယနိုင်ငံမှ မြန်မာလူမှုအဖွဲ့အစည်းများက တောင်းဆိုထားကြသည်။
