ဒီနေ့မှာကျရောက်တဲ့ မြန်မာနှစ်ဆန်းတစ်ရက်နေ့မှာ နိုင်ငံတဝှမ်းအကျဉ်းထောင်တွေက အကျဉ်းသူ ၊အကျဉ်းသား ၃,၀၀၀ ကျော်ကို လွှတ်ပေးမယ်လို့ စစ်ကောင်စီက ကြေညာပါတယ်။
လွှတ်ပေးမယ့်သူတွေဟာ နောက်တစ်ကြိမ် ပြစ်မှုကျုးလွန်ရင် ကြွေးကျန်ပြစ်ဒဏ်ပါ ထပ်ပေါင်းကျခံရမယ့်ခံဝန်နဲ့စစ်ကောင်စီက လွှတ်ပေးမှာပါ ။
စစ်ကောင်စီ လွှတ်ပေးမယ့် အကျဉ်းသား ၃,၀၀၀ ကျော်ထဲမှာ နွေဦးတော်လှန်ရေးကာလအတွင်း ဖမ်းဆီးခံရတဲ့ နိုင်ငံ ရေးအကျဉ်းသူ ၊အကျဉ်းသား ဘယ်လောက်ပါဝင်မလဲဆိုတာ မသိရသေးပါဘူး။
အင်းစိန်ထောင်အကျဉ်းဦးစီးအသိုင်းအဝိုင်း က သတင်းရင်းမြစ်တစ်ဦးရဲ့ပြောပြချက်အရအင်းစိန်ထောင်က လွတ်မြောက်မယ့်အကျဉ်းသားတွေထဲ နိုင်ငံရေးအကျဉ်းသားပါဝင်မှု မရှိသလောက်ဖြစ်မယ်လို့သိရပါတယ်။
ပြီးခဲ့တဲ့ ၂၀၂၂ ခုနှစ် နှစ်ဆန်းတစ်ရက်နေ့မှာ လည်း အကျဉ်းသား ၁,၅၀၀ ကျော် လွှတ်ပေးခဲ့ပေမယ့် နိုင်ငံရေးအကျဉ်းသားတွေ မပါဝင်ခဲ့ပါဘူး။
လက်ရှိနိုင်ငံတဝှမ်းအကျဉ်းထောင်တွေထဲမှာ ဆက်လက် ဖမ်းဆီးခံထားရသူ နိုင်ငံရေးအကျဉ်းသူ ၊အကျဉ်းသား ၁၇,၄၆၀ ဦးရှိနေတယ်လို့ နိုင်ငံရေးအကျဉ်းသားကူညီစောင့်ရှောက်ရေးအသင်း (AAPP) ရဲ့စာရင်းအရသိရပါတယ်။
