ရပ်ကွက်နှင့် ကျေးရွာများအတွင်းရှိ စီးပွားရေးနှင့်စက်မှုလက်မှုလုပ်ငန်းများအနေဖြင့် ညနေ ၅နာရီမှ နံနက် ၅နာရီအထိ လျှပ်စစ်မီးမသုံးရန် ဧပြီ ၂၃ ရက်က စတင်ပြီး ကန့်သတ် တားမြစ်လိုက်ကြောင်း စစ်ကောင်စီထိန်းချုပ်ထားသည့် ရန်ကုန်လျှပ်စစ်ဓာတ်အားပေးရေး ကော်ပရေးရှင်း(YESC)က ယနေ့ ထုတ်ပြန်သည်။
ဖောက်ဖျက်ကျူးလွန်မှုကို စစ်ဆေးတွေ့ရှိပါက အုပ်ချုပ်မှုနည်းလမ်းအရ အရေးယူဆောင်ရွက်သွားမည်ဟုလည်း စစ်ကောင်စီ၏ YESCက ခြိမ်းခြောက်ထားသည်။
ရပ်ကွက်နှင့်ကျေးရွာအတွင်းရှိ စီးပွားရေးနှင့်စက်မှုလုပ်ငန်းများ ကန့်သတ်ချိန်အတွင်း လျှပ်စစ်မီးသုံးစွဲပါက မီတာပြဂဏန်းများကို ဓာတ်ပုံရိုက်မှတ်တမ်းတင် စစ်ဆေးသွားမည်ဟုလည်း YESCက ဆိုသည်။
“အခုချိန်မှာ မီးပြတ်တာအပြင် ဒီဇယ်ဝယ်ရတာလည်း အရမ်းခက်တဲ့ အချိန်ဖြစ်နေတယ်။ ဒီလို လုပ်ရပ်ကြောင့် လုပ်ငန်းတွေရပ်နားဖို့ပဲ ကျန်တော့တယ်”ဟု ဖိနပ်ချုပ်လုပ်ငန်းဆောင်ရွက်နေသည့် လုပ်ငန်းရှင်တစ်ဦးက ပြောသည်။
အသေးစားစီးပွားရေးလုပ်ငန်းများလည်ပတ်ရန် ကုန်ကျစရိတ်ကြီးမြင့်လာခြင်းကြောင့် ကုန်ဈေးနှုန်းများလည်း ပိုမိုမြင့်တက်လာမည်ဟုလည်း ရန်ကုန်အခြေစိုက်စီးပွားရေးလုပ်ငန်းရှင်တစ်ဦးက သုံးသပ်ပြောဆိုသည်။
ထို့အပြင် ရပ်ကွက်များအတွင်းရှိ စီးပွားရေးလုပ်ငန်းများဟုဆိုသည့်အတွက်ကြောင့် စတိုးဆိုင်များ၊ မီနီမတ်များနှင့် အခြားတပိုင်တနိုင်စီးပွားရေးလုပ်ငန်းများ ပိုမိုခက်ခဲလာမည်ဟုလည်း ၎င်းက ပြောသည်။
ထိုသို့ကန့်သတ်ရခြင်းမှာ နွေရာသီကာလအတွင်း အပူချိန်မြင့်မားလာမှု၊ ဓာတ်အားသုံးစွဲမှု မြင့်တက်ခြင်းနှင့်ဓာတ်အားပေးစက်များ နှစ်စဉ်ပုံမှန် ထိန်းသိမ်းပြုပြင်ရခြင်းကြောင့်ဖြစ်သည်ဟု စစ်ကောင်စီက ဆိုသည်။ ထို့အပြင် လောပိတမဟာဓာတ်အားလိုင်းတာဝါတိုင်များ အကြိမ်ကြိမ်ဖျက်ဆီးခံရခြင်းဖြစ်သည်ဟု စစ်ကောင်စီက အကြောင်းပြထားသည်။
