မင်းတပ်မြို့နယ်အတွင်းရှိ အရပ်သားပြည်သူများနေထိုင်ရာနေရာများသို့ စစ်ကောင်စီတပ်က လက်နက်ကြီးဖြင့် ရည်ရွယ်ချက်ရှိရှိ ပစ်ခတ်တိုက်ခိုက်နေ၍ ပြည်သူများအနေဖြင့် လက်နက်ကြီး ဘေးရန်မှကာကွယ်နိုင်ရန်နှင့်ထိခိုက်မှု နည်းပါးစေရန်အတွက် သတိဖြင့်နေထိုင်ပေးကြရန် မင်းတပ် ချင်းကာကွယ်ရေးတပ်(CDF)က ထပ်မံ အသိပေးလိုက်သည်။
ဧပြီ ၂၂ရက်နှင် ၂၃ရက်များက မင်းတပ်မြို့နယ် တိုက်နယ်(၃)၊တိုက်နယ်(၂) ဒေသသို့ စစ်ကောင်စီတပ်က လက်နက်ကြီးများပစ်ခတ်တိုက်ခိုက်ခဲ့သည်ဟု ဆိုသည်။
ဧပြီ ၂၂ရက် တိုက်ခိုက်မှုကြောင့် မင်းတပ်မြို့နယ် တိုက်နယ်အမှတ် (၃)ရှိ စာသင်ကျောင်းနှင့်ပြည်သူ နေအိမ်များထိခိုက်ပျက်စီးခဲ့သည်ဟု အသိပေးသည်။
ယမန်နေ့ ညနေပိုင်းတွင်လည်း တိုက်နယ်အမှတ် (၂)ဖက်သို့ လက်နက်ကြီးများဖြင့် ပြည်သူများအားထိခိုက်စေလိုသည့် ရည်ရွယ်ချက်ရှိရှိ ဖြင့် ရမ်းသမ်းပစ်ခတ်မှုများပြုလုပ်နေသည်ဟု မင်းတပ် CDFက ထုတ်ပြန်သည်။
စစ်ကောင်စီတပ်သည် မင်းတပ်မြို့နယ်အတွင်း တိုက်ပွဲဖြစ်ပွားမှုမရှိဘဲ လေကြောင်း တိုက်ခိုက်မှု၊ လက်နက်ကြီး ပစ်ခတ်မှုများ ယခုလအတွင်း အရှိန်မြှင့်လုပ်ဆောင်လျက်ရှိသည်။ ဧပြီ ၁၇ရက် မင်းတပ်နယ် ပန်းပါရွာလေကြောင်းတိုက်ခိုက်မှုတွင် ကလေးငယ်နှင့် အမျိုးသမီး ၂ဦး အသက်ဆုံးရှုံးခဲ့ရပြီး ဒဏ်ရာရသူများစွာရှိခဲ့သည်။
