တနင်္သာရီမြို့နယ်အတွင်း ယနေ့ တိုက်ပွဲတွင် ပြည်သူ့ကာကွ ယ်ရေးတပ်ဖွဲ့၏ အဝေးထိန်းမိုင်းကြောင့် စစ်ကောင်စီဘက်က ငါးဦးထက်မနည်းသေဆုံးကာ အများအပြားဒဏ်ရာရသွားကြောင်းမြို့နယ်ပြည်သူ့ကာကွယ်ရေးတပ်ဖွဲ့တာဝန်ရှိသူကပြောသည်။
“မောတောင်ဘက်ကိုတက်လာတဲ့ စစ်ကြောင်းကို တပ်ပေါင်းစုက ပြင်းပြင်းထန်ထန်တိုက်တာ။ လောလောဆယ်သိထားသလောက် ဆွဲမိုင်းထိထားတဲ့အဖွဲ့မှာ ငါးယောက် အနည်းဆုံးသေတယ်။ ဒဏ်ရာရတွေများတယ်” ဟုတနင်္သာရီမြို့နယ် ပြည်သူ့ကာကွယ်ရေးတပ်ဖွဲ့တာဝန်ရှိသူက People’s Spring သတင်းဌာနသို့ပြောသည်။
အဆိုပါစစ်ကောင်စီစစ်ကြောင်းသည် မောတောင်ဘက်သို့ သွားရန်အတွက် မတ်လ(၂၈)ရက်နေ့မှစ၍တနင်္သာရီမြို့နယ်၊သဲဖြူရွာသို့ စစ်ကြောင်းထိုးလာသောစစ်ကြောင်းဖြစ်သည်။
တပ်အချိန်းအပြောင်းပြုလုပ်ပြီးသိန်ခွန်းရွာဖက်သို့ပြန်လည်ဆုတ်ခွါလာစဥ်ယနေ့( ဧပြီ ၂၆)နံနက်ပိုင်းတွင် မဟာမိတ်တပ်ပေါင်းစု နှင့် တိုက်ပွဲဖြစ်ပွားခဲ့သည်။တိုက်ပွဲဖြစ်ပြီးနောက် ဆက်လက်ဆုတ်ခွါလာရာ သိန်ခွန်းရွာ နှင့် ချောင်းနှစ်ပေါက်ရွာအနီးတွင် မဟာမိတ်တပ်ပေါင်းစုမှ ဗိုလ်စူပါအဖွဲ့ ကထပ်မံမိုင်းဆွဲတိုက်ခိုက်သဖြင့် ထိခိုက်သေဆုံးမှုများခဲ့ခြင်းဖြစ်ကြောင်းသိရသည်။
“တိုက်ပွဲနှစ်ကြိမ်ဖြစ်တာပါ။ သူတို့ ဆင်းလာတာသတင်းကြိုရလို့ အဝေးထိန်းမိုင်းနဲ့ ချတာမှာ တော်တော် ထိသွားတယ်”ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးကလည်းပြောသည်။
ဒေသခံပြည်သူတစ်ဦးကလည်း “ဒီစစ်ကြောင်းက အရင်လကတုန်း စစ်ကြောင်းထိုးနေလို့ ထိုင်းနယ်စပ်ကိုသွားတဲ့ရွာတွေ ထွက်ပြေးတိမ်းရှောင်နေရတာ။ စစ်တပ်က ရွာသားတွေကို မိရင် ဖမ်းပြီးပစ်သတ်လို့ ရွာသားတွေက ထွက်ပြေးနေကြတာ”ဟုပြောသည်။
ထို့အပြင် သိန်ခွန်းရွာ၊ သဲဖြူရွာနှင့် ချောင်းနှစ်ပေါက်ရွာတို့တွင် မတ် ၂၈ ရက် မှ ဧပြီ ၁၄ ရက်အထိ တိုက်ပွဲများပြင်းထန်စွာဖြစ်ပွားခဲ့သေးပြီး တနင်္သာရီတိုင်း၊ပြည်သူ့ကာကွယ်ရေးအဖွဲ့၏ ထုတ်ပြန်ချက်အရ စစ်ကောင်စီတပ်သား ၂၀ကျော်သေဆုံးခဲ့သေးကြောင်းသိရသည်။
ယနေ့တိုက်ပွဲဖြစ်ရာနေရာသည် တော်လှန်ရေးအင်အားစုများက သွားလာခွင့် ယာယီတားမြစ်ထားသည့် ထုံခါ-မောတောင် နယ်စပ်ကုန်သွယ်ရေးလမ်းပေါ်တွင်ရှိသည်။ မောတောင်နယ်စပ်ကုန်သွယ်ရေးစခန်းတွင် ထိုင်း-မြန်မာနယ်စပ်ကုန်သွယ်ရေးစခန်းတစ်ခုဖြစ်ပြီး နှစ်စဉ် ဒေါ်လာ ၁၀ သန်းမှ ၁၈ သန်းကြား ကုန်သွယ်ရေးပြုလုပ်နေသည့် စခန်းတခုလည်းဖြစ်သည်။
တနင်္သာရီမြို့နယ် ပြည်သူ့ကာကွယ်ရေးတပ်ဖွဲ့ကမြိတ်- တနင်္သာရီ-ဘုတ်ပြင်းလမ်းပိုင်းကိုလည်း ယခင်တားမြစ်ထားသည့်အတိုင်း ခရီးသွားပြည်သူများ အန္တရာယ်မဖြစ်ပေါ်စေရေးအတွက် အသုံးပြုခွင့်မပြုသေးကြောင်းထပ်မံထုတ်ပြန်ထားသည်။
