လေကြောင်းတိုက်ခိုက်ခံရသည့် ပဇီကြီးရွာအနီးရွာများကို စစ်ကောင်စီတပ် စစ်ကြောင်းနှစ်ခုဖြင့် ဆက်လက်ထိုးနေ

စစ်ကိုင်းတိုင်း ကန့်ဘလူမြို့နယ် ပဇီကြီးကျေးရွာနှင့် အနီးပတ်ဝန်းကျင်ကျေးရွာများက စစ်ကြောင်းထိုးနေသည့် စစ်ကောင်စီတပ်၏ စစ်ကြောင်းနှစ်ကြောင်းသည် ယနေ့(ဧပြီလ ၂၇ရက်)နံနက်တွင် ‌စကျင်ရွာနှင့်ချောင်းမကြီးကျေးရွာဘက်သို့ ရောက်ရှိနေကြောင်း ဒေသခံများကပြောသည်။

“စစ်ကြောင်းတစ်ကြောင်းက မြေမွန်ရွာရဲ့ အနောက်ဘက် စကျင်ရွာကို ရောက်နေပြီ။ တစ်ကြောင်းကတော့ ချောင်းမကြီးရွာကို မွှေနေတယ်။ကျွန်တော်တို့ အရပ်သားတွေကတော့ပြေးလွှားနေကြတယ်”ဟု ဘေးလွတ်ရာတိမ်းရှောင်နေရသော ဒေသခံတစ်ဦးက ပြောသည်။

စစ်ကောင်စီစစ်ကြောင်းသည် ယမန်နေ့(ဧပြီ ၂၆ရက်)ညက မြေမွန်ကျေးရွာတွင် ညအိပ်ပြီး ယနေ့ နံနက်တွင် စကျင်ရွာနှင့်ချောင်းမကြီးကျေးရွာဘက်သို့ စစ်ကြောင်းထိုးနေခြင်း ဖြစ်သည်။

မြေပြင်စစ်ကြောင်းစတင်ခဲ့သည့် ဧပြီ ၂၀ရက်မှ ဧပြီ ၂၅ရက်အတွင်း ပဇီကြီးရွာ၊ လေးတွင်းစင်ရွာနှင့် ချောင်းသာရွာမှ အရပ်သားပြည်သူများ၏ နေအိမ် ၅၀၀ခန့်ကို စစ်ကောင်စီတပ်က မီးရှို့ဖျက်ဆီးခဲ့ကြောင်း ဒေသခံများက ပြောသည်။

ယခုစစ်ကြောင်းသည် ဧပြီ ၁၁ရက်က ဒေသခံ ၁၆၈ ဦးထက်မနည်းသေဆုံးခဲ့သော ပဇီကြီးရွာ လေကြောင်း တိုက်ခိုက်မှုဖြစ်ပြီးနောက် ဧပြီ ၁၉ရက်မှစတင်၍ ဝက်ရောက်လာသော မြေပြင်စစ်ကြောင်းဖြစ်သည်။

အင်အား ၁၀၀ ခန့်စီဖြင့် စစ်ကြောင်းနှစ်ကြောင်းခွဲထားသည်ကို တွေ့ရကြောင်း စစ်ဘေးရှောင်များက ပြောသည်။

စစ်ကြောင်းတစ်ကြောင်းနှင့် ပြည်သူ့ကာကွယ်ရေးတပ်များသည် ပဇီကြီးရွာနှင့် တစ်မိုင်ခန့်အကွာရှိ လေးတွင်းစင်ရွာတွင် ဧပြီ ၂၂ရက်က တိုက်ပွဲဖြစ်ခဲ့သည်ဟု သိရသည်။ အဆိုပါ တိုက်ပွဲတွင် စစ်ကောင်စီဘက်က ၂၅ဦးထက်မနည်း သေဆုံးပြီး ပြည်သူ့ကာကွယ်ရေးရဲဘော်တစ်ဦး ဒဏ်ရာရခဲ့ကြောင်း ကန့်ဘလူမြို့နယ်၊ မလည်တိုက်နယ် ပြည်သူ့ကာကွယ်ရေးတပ်ဖွဲ့ တာဝန်ခံက ပြောသည်။

ထပ်မံသိရှိရသောသတင်းအရ အဆိုပါတိုက်ပွဲတွင် စစ်ကောင်စီဘက်မှ စစ်ကြောင်းမှူး တစ်ဦး လက်နက်ကြီးစထိမှန်ပြီး ဒဏ်ရာအပြင်းအထန်ရရှိသွားသည်ဟု ပြည်သူ့ကာကွယ်‌ ရေးရဲဘော်တစ်ဦးက ပြောသည်။

စစ်ကောင်စီစစ်ကြောင်းကြောင့် ပဇီကြီး၊လေးတွင်းစင်၊ မဲဇတော်၊ ရွာသာယာ၊ထန်းတော၊စကျင်၊ မြေမွန်၊ ချောင်းသာ၊ ချောင်းမကြီးစသည့် ကျေးရွာ ဒေသခံများမှာလည်း ဘေးလွတ်ရာသို့ထွက်ပြေးနေရကြောင်း သတင်းရရှိသည်။