ရှမ်း – ကရင်နီ(ကယား)ပြည်နယ်အစပ် တောင်စလုံးတိုက်ပွဲအတွင်း ကရင်နီအမျိုးသားများကာကွယ်ရေးတပ်(KNDF)တပ်ရင်း – ၁၁မှ တပ်ရင်းမှူး ကျဆုံးကြောင်း အဆိုပါတပ်ရင်းက ထုတ်ပြန်သည်။
ဖယ်ခုံမြို့နယ်နှင့် ပင်လောင်းမြို့နယ်အစပ်ရှိ တောင်စလုံးကျေးရွာတွင် မေလ ၈ရက်က ထိတွေ့တိုက်ပွဲအတွင်း စစ်ကောင်စီအား တိုက်ခိုက်ရင်း KNDF B/11မှ တပ်ရင်းမှူးအန်းဂျလို(လို့)သည် ပြင်းထန်စွာ ဒဏ်ရာရရှိခဲ့ခြင်းဖြစ်သည်။
ထို့နောက် တပ်ရင်းမှူး အန်းဂျလို(လို့)သည် ဆေးကုသမှုခံယူနေစဥ် မေလ ၉ရက် နံနက်ပိုင်းတွင် ကျဆုံးခဲ့သည်။
“တောင်စလုံးရွာဘက်ကို စစ်ကောင်စီဘက်က စစ်ကြောင်းပြန်ထိုးနေတာကို ကရင်နီတပ်ပေါင်းစုအနေနဲ့ ခုခံနေတာ။ ထိတွေ့မှုတိုင်းမှာ စစ်ကောင်စီရဲ့ လေကြောင်းနဲ့ လက်နက်ကြီးပစ်ကူက အဆမတန်များနေတယ်။ဒါကြောင့် ကျဆုံးမှုအချို့ရှိနေတာ”ဟု KNDF တာဝန်ရှိသူက လူထုနွေဦးသို့ ပြောသည်။
စစ်ကောင်စီအား တော်လှန်တိုက်ခိုက်ရင်းကျဆုံးခဲ့ရသော တပ်ရင်းမှူး အန်းဂျလို(လို့)၏ ဈာပနအခမ်းအနားအား မေလ ၁၀ရက်တွင် ပြုလုပ်ခဲ့ကြောင်း KNDF တပ်ရင်း – ၁၁က အသိပေးသည်။
တပ်ရင်းမှူး အန်းဂျလို(လို့)သည် စစ်အာဏာရှင်စနစ်အမြစ်ပြတ်ချေမှုန်းရေး၊ တန်းတူအခွင့်အရေးရရှိရေးနှင့် ဖက်ဒရယ်ဒီမိုကရေစီစနစ်ရရှိရေးတို့အတွက် အစွမ်းကုန်ကြိုးစားရင်း တော်လှန်ရေးအတွက် မြင့်မြတ်စွာအသက်ပေးဆပ်သွားခဲ့သည့်အတွက် KNDF/B-11 မှ အာဇာနည် သူရဲကောင်းအဖြစ် အစဥ်အမြဲမှတ်တမ်းတင်သွားမည်ဖြစ်ပြီး ကျန်ရစ်သူ မိသားစုများနှင့် ထပ်တူထပ်မျှ ဝမ်းနည်းကြေကွဲရကြောင်း ဖော်ပြသည်။
၂၀၂၃ ဖေဖော်ဝါရီ ၂၄ရက်မှစ၍ ယနေ့ထိ (၃)လနီးပါး နေ့စဥ်ရက်ဆက် တိုက်ပွဲများဖြစ်ပွားနေပြီး တိုက်ပွဲကာလ ကြာမြင့်သည်နှင့်အမျှ ခဲယမ်းများ၊ စားနပ်ရိက္ခာများ၊ ဆေးဝါးများနှင့် စက်သုံးဆီများ လိုအပ်လျှက်ရှိသောကြောင့်ပြည်သူများအနေဖြင့် KNDF/B-11ကို အားဖြည့်ကူညီ လှူဒါန်းပေးရန်လည်း မေတ္တာရပ်ခံထားသည်။
