အပူပိုင်းဆိုင်ကလုန်း မုန်တိုင်းကြောင့် နာမည်ကျော် ငပလီကမ်းခြေ ၊ငွေဆောင်နဲ့ ချောင်းသာ ကမ်းခြေတွေကို မေလ ၁၅ ရက်အထိ ပိတ်ထားမယ်လို့ ခရီးသွားဝန်ဆောင်မှုလုပ်ငန်းတွေထံကသိရပါတယ်။
အဲဒီကမ်းခြေတွေကို ဒီနေ့ မေလ ၁၂ ရက်ကနေ စတင်ပြီး မေလ ၁၅ ရက်အထိ ၄ ရက်ကြာ ပိတ်ထားမှာဖြစ်လို့ ဟိုတယ်တွေ ၊တည်းခိုခန်းတွေအနေနဲ့ လည်း အခန်းဌားရမ်းတာကို ရပ်ဆိုင်းထားပါတယ်။
ငပလီက ကမ်းခြေဟိုတယ်အချို့ကလည်း မုန်တိုင်းကြောင့် ဟိုတယ်ခေတ္တပိတ်ထားမယ်လို့ ဖေ့ဘွတ်ခ်ကနေ ကြေညာလာကြပါတယ်။
ဧရာဝတီတိုင်းထဲက ချောင်းသာ ၊ငွေဆောင်ကမ်းခြေတွေလည်း ငပလီနည်းတူ ပိတ်ထားမယ်လို့ သိရပါတယ်။
” မုန်တိုင်းပြီးလောက်တဲ့အချိန်မှ ပြန်ဖွင့်မယ်” လို့ ချောင်းသာကမ်းခြေ ခရီးသွားဝန်ဆောင်မှု လုပ်ငန်း လုပ်ကိုင်သူတစ်ဦးကဆိုပါတယ်။
ငွေဆောင်ကမ်းခြေမှာလည်း မေလ ၁၁ ရက်ကစတင်ပြီး ဟိုတယ်တွေ ၊တည်းခိုခန်းတွေ ပိတ်ကြပြီလို့ သိရပါတယ်။
မုန်တိုင်းဟာ မေလ ၁၄ ရက်နေ့မနက်ပိုင်းမှာ မြန်မာနိုင်ငံ ကျောက်ဖြူမြို့နဲ့ ဘင်္ဂလားဒေ့ရှ် နိုင်ငံ ကော့ဘဇားမြို့နယ်ကနေ ဖြတ်သန်းမှာပါ။
