ရှမ်း – ကယား(ကရင်နီ)ဒေသအစပ် ဖယ်ခုံမြို့တိုက်ပွဲ၌ စစ်ကောင်စီတပ်သားအလောင်းများနှင့် လက်နက်ခဲယမ်းအချို့အပါအဝင် ဒရုန်းများ သိမ်းဆည်းရမိကြောင်း အလယ်ပိုင်းတိုင်း ဒီးမော့ဆို PDF အမှတ်(၁၁၀၂)တပ်ရင်းက ယနေ့ ထုတ်ပြန်သည်။
စစ်ကောင်စီက အင်အား ရာနှင့်ချီ စစ်ကြောင်းထိုးလာတာကြောင့် ဖယ်ခုံမြို့နယ် လွယ်လုံ၊ ခေါင်အိ၊ လတူးနဲ့ စက်တော်ရာ ကျေးရွာများ၌ မေလ၂၀ ရက်ကစတင်ပြီး တိုက်ပွဲများ ပြင်းထန်ခဲ့သည်ဟု ဆိုသည်။
![(ဖယ်ခုံမြို့တိုက်ပွဲ၌ သိမ်းဆည်းရရှိခဲ့သည့် လက်နက်ခဲယမ်းများနှင့် ရဲဘော်များအား တွေ့ရစဥ်။ ဓာတ်ပုံ - ၁၁၀၂ တပ်ရင်း)](https://i0.wp.com/www.ludunwayoo.com/wp-content/uploads/2023/06/350947689_777352860498947_6265716769512395274_n.jpg?resize=768%2C1024&ssl=1)
“စဖြစ်တဲ့နေ့ ပြီးတော့ နောက်တစ်ရက်မှာ နယ်မြေရှဂ်းလင်းရေးဝင်တဲ့အချိန် စစ်သား အလောင်း ၁၂ လောင်းနဲ့ ခဲယမ်းအချို့ပါ ဒရုန်းတွေပါသိမ်းဆည်းနိုင်ခဲ့တယ်”ဟု ၁၁၀၂ တပ်ရင်း တာဝန်ရှိသူက လူထုနွေဦးသို့ ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
မေလ၂၀ ရက်မှ ၃၁ ရက်အထိ ၁၂ ရက်တာအတွင်း တိုက်ပွဲပေါင်း အနည်းဆုံး ၆ကြိမ်ဖြစ်ပွားခဲ့ကြောင်းလည်း ၁၁၀၂တပ်ရင်းက အသိပေးသည်။
![(ဖယ်ခုံမြို့တိုက်ပွဲ၌ သိမ်းဆည်းရရှိခဲ့သည့် လက်နက်ခဲယမ်းများနှင့် ရဲဘော်များအား တွေ့ရစဥ်။ ဓာတ်ပုံ - ၁၁၀၂ တပ်ရင်း)](https://i0.wp.com/www.ludunwayoo.com/wp-content/uploads/2023/06/350812843_852336339858083_8595799184748174586_n.jpg?resize=880%2C542&ssl=1)
“စစ်ကောင်စီက အင်အားရာကျော်လောက်နဲ့ စစ်ထိုးလာတာ။ဒီကြားထဲမှာ လေကြောင်းကနေ ပစ်ကူပေးပြီး တိုက်ခိုက်ခဲ့တာရှိတယ်။အခုထိလည်း စစ်ရေးတင်းမာနေတုန်းပဲ”ဟု အထက်ပါတာဝန်ရှိသူက ရှင်းပြသည်။
အဆိုပါ စစ်ကောင်စီတပ်ကို တပ်ရင်း (၁၁၀၁)၊ တပ်ရင်း (၁၁၀၂)၊ တပ်ရင်း (၁၁၀၆)၊ တပ်ရင်း (၁၁၀၇) အပါအဝင် မိုးဗြဲ PDF၊ ဖယ်ခုံ PDF တပ်ဖွဲ့များ စုစည်းတိုက်ခိုက်နေသည်။
![(ဖယ်ခုံမြို့တိုက်ပွဲ၌ သိမ်းဆည်းရရှိခဲ့သည့် လက်နက်ခဲယမ်းများနှင့် ရဲဘော်များအား တွေ့ရစဥ်။ ဓာတ်ပုံ - ၁၁၀၂ တပ်ရင်း)](https://i0.wp.com/www.ludunwayoo.com/wp-content/uploads/2023/06/350835688_280368101003597_7883655752709273439_n.jpg?resize=880%2C495&ssl=1)
တိုက်ပွဲများအတွင်း စစ်ကောင်စီတပ်ဖွဲ့ဝင် ၂၀ ထက်မနည်းသေဆုံးကာ ကာကွယ်ရေးပူးပေါင်းတပ်ဖွဲ့များမှ လေးဦး ထိခိုက်ခဲ့ကြောင်းသိရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)