စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်ရှိ တရုတ်ဝမ်ပေါင်ကြေးနီးစီမံကိန်း ရဲကင်းဂိတ်အား တစ်ပတ်အတွင်း နှစ်ကြိမ်မြောက် သွားရောက်ပစ်ခတ်တိုက်ခိုက်ရာ စစ်သား နှစ်ဦးသေဆုံးကြောင်း ယင်းမာပင်ခရိုင် တပ်ရင်း (၂၈) ဓားမဆိုင်းတပ်မတော် D.M.S.A အဖွဲ့က သတင်းထုတ်ပြန်သည်။
ယမန်နေ့ (မေလ ၃၁ ရက်) ညနေ ၆ နာရီ ၄၅ မိနစ်ခန့်က ဆားလင်းကြီးမြို့နယ်ရှိ ဝမ်ပေါင်ကြေးနီးစီမံကိန်း ရဲကင်းဂိတ်ကို သွားရောက်ပစ်ခတ်တိုက်ခိုက်ခဲ့ခြင်းဖြစ်ပြီး စစ်ကောင်စီတပ်ဖွဲ့ဝင် နှစ်ဦးသေဆုံးကာ သုံးဦးထိခိုက်ဒဏ်ရာ ရရှိကြောင်း ဓားမဆိုင်းတပ်မတော် D.M.S.A အဖွဲ့က ဆိုသည်။
စီမံကိန်းဝင်းအတွင်းရှိ စစ်ကောင်စီဘက်ကလည်း လက်နက်ကြီး၊ ငယ်များဖြင့် ပြန်ပစ်ခတ်ခဲ့ပြီး ရဲဘော်များ အထိအခိုက်မရှိဟု ဆိုသည်။
ဓားမဆိုင်းတပ်မတော် D.M.S.Aအဖွဲ့သို့ ဆက်သွယ်မေးမြန်းခဲ့သော်လည်း ပြန်လည်ဖြေကြားခြင်းမရှိသေးပေ။
စစ်ကောင်စီတပ်၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
ဓားမဆိုင်းတပ်မတော် D.M.S.A အဖွဲ့သည် ပြီးခဲ့သည့် မေလ ၂၅ ရက်ကလည်း ဝမ်ပေါင်ကြေးနီးစီမံကိန်း ရဲကင်းဂိတ်ကို သွားရောက်ပစ်ခတ်တိုက်ခိုက်ခဲ့ပြီး တစ်ပတ်အတွင်း ဒုတိယအကြိမ်သွားရောက်ပစ်ခတ်တိုက်ခိုက်ခဲ့ခြင်းဖြစ်သည်။
ယနေ့(ဇွန်လ၁ ရက်)တွင် မုံရွာမြို့မှ စစ်ကောင်စီတပ်သည် ညောင်ပင်ကြီးဆိပ်မှတဆင့် ဝမ်ပေါင်ကြေးနီစီမံကိန်းဘက်သို့ ဝင်ရောက်လာ၍ ကျေးရွာ ငါးရွာထက်မနည်း ထွက်ပြေးတိမ်းရှောင်ခဲ့ရကြောင်း ဒေသခံများက ပြောသည်။
“ပြေးရတာမနည်းဘူး။ ညနေပိုင်းမှာတော့ မုံရွာဘက်ပြန်ကူးသွားတယ်။”ဟု ဒေသခံတစ်ဦးက ဆိုသည်။
ဓားမဆိုင်းတပ်မတော်သည် မေလ ၃၀ ရက် ညကလည်း ဆားလင်းကြီးမြို့မရဲစခန်းကို လက်နက်ကြီးဖြင့် သွားရောက်ပစ်ခတ်တိုက်ခိုက်ခဲ့သေးသည်။
