ညောင်ဦးမြို့နယ်ရှိ တက်မရေနံမှော်ရှိ ရေနံလုပ်သားများကို စစ်ကောင်စီတပ်ကလက်နက်ပြခြိမ်းခြောက်မောင်းထုတ်ပြီး ပြည်သူပိုင်ပစ္စည်းများကိုလုယက်ယူဆောင်၍ ရေနံမှော်ကို မီးရှို့နေကြောင်း ဒေသခံအလုပ်သမားကပြောသည်။
စစ်ကောင်စီတပ်သားများက ရေနံမှော်အတွင်း မေ ၂၅ ရက်က ရောက်ရှိလာပြီး မေ ၂၇ ရက်နောက်ဆုံးဖယ်ရှားကြရန် သေနတ်ပြခြိမ်းခြောက်ခဲ့သည်။ထိုနောက် မေ ၃၁ရက်မှစ၍ မှော်အတွင်းရှိ ပြည်သူပိုင်ပစ္စည်းများကို စိတ်ကြိုက်လုယူကာ ရေနံမှော်ကို မီးရှို့ခဲ့ခြင်းဖြစ်သည်။ မေ ၂၈ ရက် မည်သူကိုမျှ မမြင်ချင်ကြောင်း ခြိမ်းခြောက်မောင်းထုတ်ခဲ့ခြင်းဖြစ်သည်ဟု ဒေသခံအလုပ်သမားတစ်ဦးကပြောသည်။
![(တပ်မရေနံမှော် မပိတ်ရသေးခင်ပုံနှင့် စစ်ကောင်စီတပ်က ဖျက်ဆီးပြီးနောက်တွေ့ရသောပုံ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2023/06/350977303_2798387593628999_7235027229226986155_n.jpg?resize=720%2C960&ssl=1)
![(တပ်မရေနံမှော် မပိတ်ရသေးခင်ပုံနှင့် စစ်ကောင်စီတပ်က ဖျက်ဆီးပြီးနောက်တွေ့ရသောပုံ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2023/06/350861346_632523435461585_903863642985926418_n.jpg?resize=720%2C960&ssl=1)
![(တပ်မရေနံမှော် မပိတ်ရသေးခင်ပုံနှင့် စစ်ကောင်စီတပ်က ဖျက်ဆီးပြီးနောက်တွေ့ရသောပုံ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2023/06/350927393_227794583295806_8451497850655669013_n.jpg?resize=720%2C960&ssl=1)
“စစ်သားတွေရောက်လာတော့ လူတွေလည်း ကြောက်လန့်ပြီး တပိုင်တနိုင်လေးတွေသယ်ပြီး ထွက်သွားကြတာ။ ကျန်တဲ့ ပစ္စည်းတွေကို သူတို့က စိတ်ကြိုက်ခိုးကြတာပဲ။အခုတော့မီးပါရှို့လိုက်ကြပြီ”ဟု ၎င်းကဆက်ပြောသည်။
ထိုရေနံမြေမှ ရေနံများသည် ဒေသတွင်းကာကွယ်ရေးအဖွဲ့များကို ရန်ပုံငွေထောက်ပံ့သည်ဟု စွပ်စွဲချက်ဖြင့် မေ ၂၁ ရက် ညနေ ၆နာရီမှစ၍ ရေနံတူးဖော်ခြင်းများ ရပ်ဆိုင်းရန် စစ်ကောင်စီက ခြိမ်းခြောက်တားမြစ်ခဲ့သည်။
![(တပ်မရေနံမှော် မပိတ်ရသေးခင်ပုံနှင့် စစ်ကောင်စီတပ်က ဖျက်ဆီးပြီးနောက်တွေ့ရသောပုံ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2023/06/350835908_267122459146446_6617110081412793093_n.jpg?resize=880%2C406&ssl=1)
တက်မရေနံမှော်သည် ဒေသတွင်းနာမည်ကြီးရေနံမှော်ဖြစ်ပြီး အလုပ်သမားတစ်သိန်းကျော်မှီလုပ်ကိုင်နေခြင်းဖြစ်သည်။ လက်ရှိတွင်ရေနံမှော်ကို စစ်တပ်က အင်အားသုံးအကြမ်းဖက် ပိတ်လိုက်သောကြောင့်အလုပ်သမား အလုပ်လက်မဲ့ဖြစ်ကုန်ကြသည်ဟုလည်း အလုပ်သမားများကပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)