ကရင်နီပြည်နယ်မှာ စတားလင့် အင်တာနက်စသုံး
ကရင်နီပြည်နယ်မှာ ကမ္ဘာကျော်နည်းပညာသူဌေးကြီး အီလွန်မာ့စ်ရဲ့ စတားလင့်(Starlink)အင်တာနက်ကို စတင်အသုံးပြုနေပြီလို့ စစ်ဘေးရှောင်များကို ကူညီပေးနေတဲ့ Free Burma Ranger (FBR) အဖွဲ့တည်ထောင်သူ David Eubank က ပြောပါတယ်။ Starlink အင်တာနက် ရရှိဖို့ ကူညီဆောင်ရွက်ပေးတဲ့ နည်းပညာသူဌေးကြီး အီလွန်မာစ်နဲ့ ၎င်းရဲ့ ကုမ္ပဏီကို ကျေးဇူးတင်ကြောင်း ပြောဆိုထားပါတယ်။ ကရင်နီဒေသမှာ စတားလင့်ကို အသုံးပြုခွင့်ရတဲ့ အတွက်ကျေးဇူးတင်ပြီး အခုထက်ပိုမို လုပ်ပေးနိုင်ဖို့နဲ့ ဘုရားသခင်ကောင်းချီပေးပါစေလို့ Elon Musk ကို David Eubank က ဆုတောင်းပေးပါတယ်။
သထုံမှာ ပူးပေါင်းတပ်တိုက်ခိုက်မှုကြောင့် အမတ(၄၀၂) အမြောက်တပ်မှ တပ်ရင်းမှူး ဒဏ်ရာရဟု KNLA တပ်မှူးပြော
ကရင်အမျိုးသားအစည်းအရုံး(KNU) သထုံခရိုင် တပ်မဟာ(၁)နယ်မြေအတွင်းရှိ စစ်ကောင်စီရဲ့ အမှတ် (၄၀၂) အမြောက်တပ်မှ စစ်ကောင်စီတပ်ရင်းမှူး ဒဏ်ရာရရှိခဲ့တယ်လို့ နယ်မြေခံ ကရင်အမျိုးသားလွတ်မြောက်ရေးတပ်မတော်(KNLA)တပ်မှူးက ဒီနေ့ ပြောပါတယ်။ ဇွန်လ ၇ ရက်က KNLAနဲ့ PDFပူးပေါင်းတပ်ဖွဲ့များက သထုံမြို့နယ်အခြေစိုက် စစ်ကောင်စီတပ်များကို တိုက်ခိုက်ခဲ့တာလို့ ဆိုပါတယ်။ မြေပြင်တပ်ဖွဲ့ဝင်များ၊ ဒရုန်းတပ်ဖွဲ့များပူးပေါင်းတပ်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများ ရှိခဲ့ပြီး ဒဏ်ရာရသူတွေထဲ အမတ(၄၀၂)မှ တပ်ရင်းမှူး ပါဝင်တယ်လို့ ဆိုပါတယ်။ မနေ့ညပိုင်းကလည်း ဝီယော်စခန်းအနီးရှိ လမ်းပိုင်းကို ဖျက်ဆီးခဲ့တယ်လို့ KNLA တပ်မှူးက ပြောပါတယ်။
ကျောက်ကြီးမြို့နယ်မှာ စစ်တပ်က လက်နက်ကြီးပစ်ခတ်လို့ ပြည်သူနှစ်ဦး သေဆုံး
ကျောက်ကြီးမြို့နယ် နတ်သံကွင်းအနီး ကျေးရွာများသို့ စစ်ကောင်စီတပ်က လက်နက်ကြီးများနဲ့ ရမ်းသမ်းပစ်ခတ်ခြင်းကြောင့် ပြည်သူနှစ်ဦးလက်နက်ကြီးထိမှန် သေဆုံးခဲ့ရတယ်လို့ ဒေသခံပြည်သူများကပြောပါတယ်။
မနေ့ညနေပိုင်းက ကျောက်တံခါးမြို့နယ် အနန်းဘော်အုပ်စုအတွင်းရောက်ရှိနေတဲ့ စစ်ကောင်စီတပ်များက ကျောက်ကြီးမြို့နယ်ဘက်ရှိ နတ်သံကွင်းအနီး ကျေးရွာများသို့ လက်နက်ကြီးများနဲ့ အဆက်မပြတ်ပစ်ခတ်ခဲ့တာပါ။ လက်နက်ကြီးပစ်ခတ်မှုများကြောင့် နတ်သံကွင်းအနီး အုန်းပင်အုပ်စုမှ ဒေသခံပြည်သူတစ်ဦး လက်နက်ကြီးကျည်ထိမှန်သေဆုံးခဲ့ရပြီး ဗောဓိကုန်ကျေးရွာဘက်မှ ပြည်သူတစ်ဦးလည်း အသက်ဆုံးရှုံးခဲ့ရကာ ၎င်းတို့နှစ်ဦးရဲ့ ကိုယ်ရေးအချက်အလက်များကို အသေးစိပ် မသိရသေးပါဘူး။
ရှားတောမြို့နယ်ရှိ စစ်ကောင်စီတပ်စခန်းကို ဒရုန်းစစ်ဆင်ရေးပြုလုပ်
ကရင်နီပြည်နယ်၊ ရှားတောမြို့နယ်ရှိ စစ်ကောင်စီတပ်စခန်းကို ဒရုန်းစစ်ဆင်ရေးနဲ့ နှစ်ကြိမ်တိုက်ခိုက်ခဲ့ပြီး စစ်ကောင်စီဘက်က ထိခိုက်သေဆုံးမှုရှိတယ်လို့ ကရင်နီအမျိုးသားများကာကွယ်ရေးတပ်(KNDF)တပ်ရင်း-၁၇က ပြောပါတယ်။ မနေ့ မနက်ပိုင်းမှာ KNDF တပ်ရင်း(၁၇)ရဲ့ ဒရုန်းတပ်ဖွဲ့ နဲ့ ဗျူဟာ (၂)ဒရုန်းတပ်ဖွဲ့တို့က အန္တရာယ်ကွေ့ စစ်ကောင်စီစခန်းကို နှစ်ကြိမ် တိုက်ခိုက်ခဲ့တယ်လို့ ဆိုပါတယ်။ ဒရုန်းစစ်ဆင်ရေးများမှာ ပစ်မှတ်တိကျမှုရှိခဲ့ပြီး စစ်ကောင်စီရဲ့ ထိခိုက်သေဆုံးမှုကို အတည်ပြုနေဆဲလို့ အသိပေးပါတယ်။
မြင်းမူနယ် တောချောင်းဦးနယ်မြေရဲစခန်းကို မဟာမိတ်များ တိုက်ခိုက်
စစ်ကိုင်းတိုင်း၊ မြင်းမူမြို့နယ်ရှိ တောချောင်းဦးနယ်မြေရဲစခန်းကို မဟာမိတ်(၁၃)ဖွဲ့ ပူးပေါင်းတိုက်ခိုက်ရာ စစ်ကောင်စီရဲ့ စစ်သားနဲ့ ရဲ ၉ ဦးသေဆုံးတယ်လို့ Youth Revolution AttackForce (YRAF)အဖွဲ့က ပြောပါတယ်။ ဇွန်လ ၆ ရက် နေ့ခင်းက မြင်းမူမြို့နယ်၊ တောချောင်းဦးကျေးရွာ နယ်မြေရဲစခန်းကို ညီနောင်မဟာမိတ် (၁၃)ဖွဲ့က ဝေဟင်၊ မြေပြင်ပူးပေါင်းကာ ဒရုန်းဗုံးသီးများ၊ လက်နက်ငယ်၊ လက်နက်ကြီးများအသုံးပြုကာ စခန်းသိမ်းတိုက်ပွဲဖော်ဆောင်ခဲ့တယ်လို့ သိရပါတယ်။ စခန်းအတွင်းရှိ ဘန်ကာ (၉)ခုအနက် (၅)ခု ဖြိုချပြီးနောက် စခန်းကို အပြီးသတ် ဝင်ရောက်သိမ်းပိုက်နိုင်တဲ့အခြေအနေ ရောက်ရှိခဲ့ပေမယ့် တံတားဦးလေတပ်မှ MIG-29 Jet Fighterနဲ့ ဗုံးသုံးလုံး ကြဲချကာ လေကြာင်းတိုက်ခိုက်မှုပြုလုပ်ခဲ့လို့ ရဲဘော်များ ပြန်လည်ဆုတ်ခွာခဲ့တယ်လို့ ဆိုပါတယ်။
ညောင်ပင်ကြီးရဲစခန်းသိမ်းတိုက်ပွဲအတွင်း ဖမ်းဆီးခံထားရတဲ့ ဗိုလ်နဂါးရဲ့မိတ်ဆွေများကိုပါ ကယ်ထုတ်နိုင်ခဲ့
စစ်ကိုင်းတိုင်း၊ ဆားလင်းကြီးမြို့နယ် ညောင်ပင်ကြီးကျေးရွာ ညောင်ပင်ကြီးရဲစခန်းသိမ်းတိုက်ပွဲအတွင်း စခန်းမှာ ဖမ်းဆီးခံထားရတဲ့ ဗိုလ်နဂါးရဲ့ မိတ်ဆွေတွေကိုပါ ကယ်တင်နိုင်ခဲ့တယ်လို့ သိရပါတယ်။ ညောင်ပင်ကြီးရဲစခန်း တစ်နာရီကျော်ကြာတိုက်ပွဲအတွင်း စစ်သား ၁၀ ဦးထက်မနည်းသေဆုံးပြီး စခန်းတစ်ခုလုံးကိုလည်း မီးရှို့ဖျက်ဆီးနိုင်ခဲ့ကာ စခန်းတွင်းဖမ်းဆီးခံထားရတဲ့ ဗိုလ်နဂါးရဲ့ မိတ်ဆွေတွေကိုပါ ကယ်ထုတ်နိုင်တယ်လို့ ပြည်ထောင်စုလွတ်မြောက်ရေးတပ်ဦး(ULF)က ထုတ်ပြန်ပါတယ်။ ဒ့ါအပြင် အဲဒီစခန်းသိမ်းတိုက်ပွဲအတွင်း စစ်ကောင်စီရဲ့ G-3 လေးလက်၊ MA -1 တစ်လက်၊ ၇၉ တစ်လက် အပါအဝင် လက်နက် ခဲယမ်းအမြောက်အများသိမ်းဆည်းရရှိတယ်လို့ Buffalo PDF တာဝန်ရှိသူက ပြောပါတယ်။
ရခိုင်ပြည်သူများ သည်းခံဖို့ ၊စည်းလုံးဖို့ AA ခေါင်းဆောင်တိုက်တွန်း
ရခိုင်ဒေသ မုန်တိုင်းသင့် ပြည်သူများအတွက် ကူညီကယ်ဆယ်ရေးလုပ်ဆောင်မယ့် ပြည်တွင်း ပြည်ပ အဖွဲ့အစည်းများ အားလုံးကို ရခိုင်ပြည်နယ်အတွင်း သွားလာခွင့်၊ ကူညီခွင့် စစ်ကောင်စီက ရပ်ဆိုင်းလိုက်ပြီးနောက် ရက္ခိုင်တပ်တော် (AA )ခေါင်းဆောင် ဗိုလ်ချုပ်ထွန်းမြတ်နိုင်က လူမှုကွန်ရက်မှတဆင့် သည်းခံကြဖို့၊ စည်းလုံးကြဖို့ တိုက်တွန်းခဲ့ပါတယ်။ မနေ့က ရခိုင်ဘာသာနဲ့ ရေးသားထားတဲ့ AA ခေါင်းဆောင်ရဲ့ စာမှာ ဝှေးစေ့ကို ခြင်ကိုက်ခံရတဲ့ အခြေအနေမှာ အင်အားသုံးပါက ပိုဆိုးမယ်လို့ ဖော်ပြထားပါတယ်။ ကုလသမဂ္ဂ လူသားချင်းစာနာမှုဆိုင်ရာညှိနှိုင်းရေးမှူးရုံး(UNOCHA)ကတော့ ရခိုင်ပြည်နယ်အတွင်း ခရီးသွားလာခွင့်ကို စစ်ကောင်စီက ပိတ်ပင်လိုက်တဲ့အတွက် မုန်တိုင်းဒဏ်သင့်ဒေသများသို့ အကူအညီပေးနိုင်ဖို့ အခြေအနေဆိုးရွားသွားပြီလို့ ပြောပါတယ်။
