စစ်ကိုင်းတိုင်း၊ ဝက်လက်မြို့နယ် ဟံလင်းမြို့ဟောင်း၌ တပ်စွဲထားသော စစ်ကောင်စီတပ်စခန်းအား တော်လှန်ရေးအဖွဲ့များ သွားရောက်တိုက်ခိုက်ခဲ့ရာ ထိခိုက်သေဆုံးမှုများရှိကြောင်း 96 Soldiers-PDF အဖွဲ့မှ ကိုဇေယျာလွင်က ပြောသည်။
ဇွန်လ ၁၂ ရက် နံနက် ၅နာရီခွဲခန့်က ဝက်လက်မြို့နယ်၊ ဟံလင်းမြို့ဟောင်း၌ တပ်စွဲထားသော စစ်ကောင်စီ စခန်းအား တော်လှန်ရေးအဖွဲ့ သုံးဖွဲ့ပေါင်းကာ တိုက်ခိုက်ခဲ့ခြင်းဖြစ်သည်။
![(စစ်ဆင်ရေးတွင်တွေ့ရသည့် ပြည်သူ့ရဲဘော်များ။ ဓာတ်ပုံ - 96 Soldiers)](https://i0.wp.com/www.ludunwayoo.com/wp-content/uploads/2023/06/353672015_598522892346507_2706293576181262790_n.jpg?resize=720%2C479&ssl=1)
“စခန်းနားအထိကပ်ပြီး ပစ်ကြတာ။ ဒါပေမယ့် စခန်းကိုအရမ်းကြီးနီးကပ်စွာ ကပ်တာမျိုးတော့မဟုတ်ဘူး။ စခန်းနားမှာ ကန္တာရပင်တွေရှိတော့ အခုအခံအကာအကွယ်မရှိဘူး။ ဟံလင်းမှာ ဒီကောင်တွေတပ်စွဲတာ ၇လ သို့မဟုတ် ၈ လလောက်ရှိပြီ။ အဲကာလအတွင်းမှာ လက်နက်ငယ်နဲ့တိုက်ခိုက်တာမျိုး မရှိဘူး။ ဒါပထမဆုံးပဲ။”ဟု 96 Soldiers-PDF အဖွဲ့မှ ကိုဇေယျာလွင်က ပြောသည်။
![(စစ်ဆင်ရေးတွင်တွေ့ရသည့် ပြည်သူ့ရဲဘော်များ။ ဓာတ်ပုံ - 96 Soldiers)](https://i0.wp.com/www.ludunwayoo.com/wp-content/uploads/2023/06/354032473_598522962346500_6328955367432849639_n.jpg?resize=720%2C479&ssl=1)
ဟံလင်းမြို့ဟောင်းရှိ စစ်ကောင်စီစခန်းအား တိုက်ခိုက်ရာတွင် ထိတွေ့တိုက်ပွဲ မိနစ် ၂၀ခန့် ဖြစ်ပွားခဲ့ရာ စစ်ကောင်စီဘက်မှ လေးဦးသေဆုံးပြီး နှစ်ဦးဒဏ်ရာများရရှိခဲ့ကြောင်း ကျေးရွာဒေသခံများ၏ ပြောစကားကိုကိုးကားကာ 96 Soldiers-PDF အဖွဲ့က ပြောသည်။
အဆိုပါ စစ်ဆင်ရေးအား MDF-Shwebo တပ်ဖွဲ့၊ ဒုံးပျံတပ်ဖွဲ့တို့နှင့် 96 Soldiers-PDF တို့ ပူးပေါင်းတိုက်ခိုက်ခဲ့ပြီး ပူးပေါင်းအဖွဲ့များဘက်က အထိခိုက်အကျဆုံးမရှိ ဆုတ်ခွာနိုင်ခဲ့ကြောင်း အသိပေးထားသည်။
![(စစ်ဆင်ရေးတွင်တွေ့ရသည့် ပြည်သူ့ရဲဘော်များ။ ဓာတ်ပုံ - 96 Soldiers)](https://i0.wp.com/www.ludunwayoo.com/wp-content/uploads/2023/06/354026171_598523029013160_8551635405002647772_n.jpg?resize=720%2C479&ssl=1)
ဟံလင်းမြို့ဟောင်း၌ တပ်စွဲထားသော စစ်ကောင်စီတပ်သည် ဝက်လက်နယ်အတွင်း ကျေးရွာများအား မကြာခဏစစ်ကြောင်းထိုးဖျက်ဆီးမှုများ ပြုလုပ်လေ့ရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)