နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အဂတိအမှုနဲ့ တရားစွဲရာမှာ အဓိကသက်သေအဖြစ် ထွက်ဆိုရသူ စီးပွားရေးလုပ်ငန်းရှင် ဦးမောင်ဝိတ် ကို စစ်ကောင်စီက ဒီနေ့မှာ ပြန်လွှတ်ပေးလိုက်ပါတယ်။
ကာယကံရှင် ဦးမောင်ဝိတ်ကလည်း နေအိမ်ပြန်ရောက်ပြီလို့ သူရဲ့ဖေ့ဘွတ်ခ်စာမျက်နှာကနေ ဓာတ်ပုံနဲ့တကွအသိပေးထားတာတွေ့ရပါတယ်။
စစ်တပ်အာဏာသိမ်းပြီး ၃ ရက်အကြာ မှာ စစ်တပ်က ဦးမောင်ဝိတ်ကို ဖမ်းဆီးပါတယ်။
![စီးပွားရေးလုပ်ငန်းရှင်ဦးမောင်ဝိတ်ပြန်လွတ်လာ](https://i0.wp.com/www.ludunwayoo.com/wp-content/uploads/2023/06/357117062_606634138202049_6154079987290393154_n.jpg?resize=578%2C960&ssl=1)
အဲဒီနောက် ဒေါ်ခင်ကြည်ဖောင်ဒေးရှင်းအတွက် အမေရိကန် ဒေါ်လာ ၅ သိန်းခွဲကို ဒေါ်အောင်ဆန်းစုကြည်ထံ ပေးအပ်ခဲ့တယ်လို့ ဦးမောင်ဝိတ်ထွက်ဆိုတဲ့ ရုပ်သံဖိုင်ကို စစ်ကောင်စီက ဖြန့်ဝေပါတယ်။
အဲဒီ ထွက်ဆိုချက်ကိုအသုံးချပြီး စစ်ကောင်စီက ဒေါ်အောင်ဆန်းစုကြည် လာဘ်ယူတယ်ဆိုကာ အဂတိပုဒ်မနဲ့ တရားစွဲခဲ့ပါတယ်။
![စီးပွားရေးလုပ်ငန်းရှင်ဦးမောင်ဝိတ်ပြန်လွတ်လာ](https://i0.wp.com/www.ludunwayoo.com/wp-content/uploads/2023/06/357069574_606634151535381_951807806885168709_n.jpg?resize=880%2C660&ssl=1)
စစ်ကောင်စီရဲ့တရားရုံးမှာ အမှုစစ်ဆေးချိန် သက်သေအဖြစ် လာရောက်ထွက်ဆိုတဲ့ ဦးမောင်ဝိတ်ဟာ ဒေါ်အောင်ဆန်းစုကြည်ကို ထိုင်ရှိခိုးခဲ့တယ်ဆိုတဲ့သတင်းတွေလည်းကျယ်ကျယ်လောင်လောင်ထွက်ခဲ့ပါသေးတယ်။
ဦးမောင်ဝိတ်ကို ဖမ်းဆီးထားတဲ့ ၂ နှစ်ကျော်ကာလအတွင်း မည်သည့်နေရာမှာထားရှိတယ်ဆိုတာကိုတော့ ရှင်းရှင်းလင်းလင်းမသိရပါဘူး။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)