မွန်ပြည်နယ်၊ ကျိုက်ထိုနှင့် ဘီးလင်းမြို့နယ်တို့တွင် စစ်ကောင်စီတပ်စခန်းနှင့် ယာဥ်တန်း တိုက်ခိုက်ခံရကြောင်း ဒေသခံသတင်းရင်းမြစ်များက ပြောသည်။
ယနေ့(ဇွန်လ ၃၀ရက်) နံနက် ၇နာရီခန့်ကစ၍ ဘီးလင်းတိုးဂိတ်ဟောင်းတွင် တပ်စွဲထားသည့် စစ်ကောင်စီတပ် ဒရုန်းဖြင့် ကနဦးတိုက်ခိုက်ခံရပြီးနောက် နံနက် ၈နာရီတွင် ကျိုက်ထိုမြို့မှ ဘီးလင်းမြို့ဘက်သို့ မောင်းလာသည့် စစ်ကောင်စီယာဥ်တန်း ကြားဖြတ်တိုက်ခိုက်ခံရသည်ဟုဆိုသည်။
“စကစ ယာဥ်တန်းက လေးစီးပါတာ။မိုင်းဆွဲခံရပြီး နှစ်စီးက ပက်လက်တောင်လန်သွားတယ်လို့ သိရတယ်။နောက်ပြီး သံတံတားဂိတ်က စကစ စခန်းလည်း ဗုံးသီး ချတိုက်ခံရတယ်”ဟု ဒေသခံသတင်းရင်းမြစ်က ပြောသည်။
ထိုတိုက်ခိုက်မှုများအနက် စစ်ကောင်စီတပ်သားများ ထိခိုက်သေဆုံးမှု အသေးစိတ်ကို မသိရသေးပေ။
“မနေ့က ဘီးလင်းတံတား ကျိုးသွားတော့ ကျိုက်ထို ဘက်ကနေ စစ်သားတွေအင်အားဖြည့်နေတာရှိတယ်။ ကြားဖြတ်တိုက်တာတွေတော့ရှိတယ်။အသေးစိတ်တော့ သက်ဆိုင်ရာ တပ်ရင်းတွေက ထုတ်ပြန်ပါလိမ့်မယ်”ဟု မွန်ပြည်နယ် စစ်ရေးသတင်းရင်းမြစ်က ပြောသည်။
ကျိုက်ထို နှင့်ဘီးလင်းမြို့နယ်ကြားရှိ စစ်ကောင်စီ၏ သံတံတားဂိတ်ကို စစ်ရေးပစ်မှတ်အဖြစ် သတ်မှတ်ကာ ယနေ့ နေ့လယ် ၁၂ နာရီခွဲခန့်က တိုက်ခိုက်ခဲ့ကြောင်း ကျိုက်ထိုတော်လှန်ရေးအင်အားစု(KRF)က အသိပေးသည်။
KNLA၊ ကျိုက်ထို (ပကဖ)၊TPDF-KD နှင့် Yangon Eagle Force အဖွဲ့တို့နှင့်အတူ ပူးပေါင်း၍ ဗုံးသီး လေးလုံးအသုံးပြုတိုက်ခိုက်ခဲ့ပြီး စစ်ကောင်စီတပ်၏ ထိခိုက်မှုကို စုံစမ်းဆဲဖြစ်ကြောင်း KRF က ထုတ်ပြန်ထားသည်။
