ပဲခူးရိုးမအတွင်းသစ်ခိုးထုတ်မှုများပိုများလာပြီး ၊သစ်ခိုးထုတ်မှုနှင့်အတူ စစ်ကောင်စီတပ်က စစ်ကြောင်းလှုပ်ရှားလာသောကြောင်း သစ်ခိုးထုတ်မှုများကို ပြင်းပြင်းထန်ထန်အရေးယူတော့မည်ဟု ပြည်သူ့ကာကွယ်ရေးတပ်မတော် ၊အမှတ်(၂)စစ်ဒေသခွဲ(ပဲခူးတိုင်း) ဒုတိယစစ်ဒေသခွဲမှူး ရဲဘော်တင်ဦးက ပြောကြားသည်။
သစ်ခိုးထုတ်မှုများမှာ စစ်တပ်အာဏာသိမ်းပြီးနောက်ပိုင်းပိုများလာကြောင်းသိရသည်။
“ရိုးမထဲက သစ်ထုတ်လုပ်တာကို အရင် တိုင်းအစိုးရ(ရွေးကောက်ခံ အရပ်သားတိုင်းအစိုးရ) လက်ထက်ကထဲက သဘာဝပတ်ဝန်းကျင် ထိခိုက်မှုများနေလို့ တားမြစ်မိန့်ထုတ်ထားပြီးသားပါ။ဒါကို အာဏာသိမ်းပြီးနောက်ပိုင်း စကစနဲ့ပေါင်းပြီး သစ်ခိုးထုတ်တာတွေ ပြန်များလာလို့ပါ။ဒါတွေနဲ့ အတူ စကစလှုပ်ရှားမှုတွေကိုပါ တားဆီးဖို့ပါ” ဟု ရဲဘော်တင်ဦးက ပြောသည်။
ထိုကြောင့် ပဲခူးတိုင်း၊လက်ပံတန်း၊မင်းလှနှင့် အုတ်ဖိုမြို့နယ်တို့နှင့် ထိစပ်နေသည့် ပဲခူးရိုးမအတွင်း သစ်ခိုးထုတ်မှုများကိုလည်း ပြင်းထန်စွာအရေးယူမည်ဟု ပဲခူးစစ်ဒေသခွဲက သတိပေးချက်ထုတ်ပြန်ထားသည်။
အထက်ပါ သုံးမြို့နယ်သည် သာယာဝတီခရိုင်ပြည်သူ့ကာကွယ်ရေးတပ်ရင်း ၃၈၀၂ ၏ စစ်ဆင်ရေးနယ်မြေတွင်ပါဝင်သည်။ ထိုဒေသတခုလုံးကို ဩဂုတ်လ ၆ရက်မှစ၍ မော်တော်ယာဉ်များတက်ရောက်ခွင့် ပိတ်ပင်လိုက်ပြီး လိုအပ်သည့် အရေးယူမှုများကို ပြင်းပြင်းထန်ထန်ပြုလုပ်မည်ဟု ပဲခူးစစ်ဒေသခွဲက ဩဂုတ်လ ၇ရက်တွင် သတင်းထုတ်ပြန်သည်။
ယခုထုတ်ပြန်ချက်သည် ကားများဖြင့် နေ့စဉ် သစ် သယ်ထုတ်နေသူများကိုသာ အဓိကရည်ရွယ်ခြင်းဖြစ်ပြီး ပဲခူးရိုးမအားအမှီပြု၍ လုပ်ကိုင်စားသောက်နေသော ပြည်သူများကိုထိခိုက်စေမည်မဟုတ်ကြောင်း ပဲခူးစစ်ဒေသခွဲက အသိပေးသည်။
ပဲခူးရိုးမအတွင်း သစ်ခိုးထုတ်လုပ်မှု ဆိုးရွားနေသည့် မင်းလှမြို့နယ်ရှိ ရိုးမဖြတ်ကျော်လမ်း(စိန်ကန့်လန့်−မြို့ချောင်းလမ်း)ကို ပြည်သူ့ကာကွယ်ရေးတပ်ဖွဲ့က ဇူလိုင်လမှစတင်ကာ နယ်မြေစိုးမိုးရေးဆောင်ရွက်ခဲ့သည်။ ယခုအခါ သုံးမြို့နယ်နှင့် ဆက်စပ်သည့် ပဲခူးရိုးမဧရိယာကိုနယ်မြေစိုးမိုးရေးဆောင်ရွက်မည်ဟု သတိပေးခြင်းဖြစ်သည်။
သစ်ခိုးထုတ်သူများသည် စစ်ကောင်စီတပ်နှင့် ပူးပေါင်း၍ သစ်များ အကြီးအကျယ်ခုတ်နေကြောင်း၊ စစ်ကောင်စီက ငွေကြေးယူ၍ ခွင့်ပြုထားကြောင်းဒေသခံများကပြောသည်။
သစ်တောပြုန်းတီးမှုများကို ကာကွယ်ရန် ရွေးကောက်ခံ အရပ်သားအစိုးရလက်ထက်တွင် ပဲခူးရိုးမအတွင်းမှ သစ်ထုတ်လုပ်မှုကို ၂၀၁၇−၂၀၁၈ခုနှစ်မှ ၂၀၂၇ ခုနှစ်အထိ ရပ်ဆိုင်းခဲ့သည်။စစ်တပ်က နိုင်ငံတော်အာဏာသိမ်းယူပြီးနောက် ပဲခူးရိုးမအတွင်း သစ်ခိုးထုတ်မှုများ ပိုမို ဆိုးရွားနေကြောင်း ဒေသခံများနှင့် ပြည်သူ့ကာကွယ်ရေးတပ်ဖွဲ့များကပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)