နိုင်ပကောင်း /People’s Spring
ကရင်အမျိုးသားအစည်းအရုံး(KNU) ထိန်းချုပ်ထားတဲ့ ဖာပွန်မြို့ အနီးကစစ်ဗျုဟာ ဆီ စစ်ကူပို့ ဖို့ ကြိုးပမ်းနေတဲ့ စစ်ကောင်စီတပ်စခန်းကို KNU တပ်မဟာ (၅) နဲ့ ပူးပေါင်းတပ်တွေကဝန်းရံပိတ်ဆို့ထား တယ်လို့ တပ်မဟာ (၅) ပြောရေးဆိုခွင့်ရှိသူ ဗိုလ်မှုးကြီး စောကလယ်ဒိုက ပြောပါတယ်။
ဖာပွန်မြို့အခြေချစစ်ဗျုဟာနဲ့ မိုင် ၃၀ ခန့်အကွာမှာရှိပြီး အင်အား ရာဂဏန်း ရှိတဲ့ ခေါပုတ်စခန်းကို KNU နဲ့ ပူးပေါင်းတပ်တွေက ပိတ်ဆို့ထားတာလို့သိရပါတယ် ။
Public Service Announcement
“ ခုထိ သူတို့စခန်းကနေ ထွက်လို့မရသေးဘူး၊ အပြင်ကနေ ပိတ်ဆို့ခံထားရလို့နော်” လို့ KNU တပ်မဟာ (၅) ပြောရေးဆိုခွင့်ရှိသူ ဗိုလ်မှူးကြီးစောကလယ်ဒိုက ပြောပါတယ်။
ပြီးခဲ့တဲ့ မေလအတွင်း KNU တပ်မဟာ( ၅) နယ် မြေ ဖာပွန်ခရိုင် ထဲက ထိုင်း – မြန်မာ နယ်စပ်အနီးမှာရှိတဲ့
ပါဟက်၊ ကဟီးကျိုး၊ လယ်တိုး၊ ကျောက်ညှက်(၀လူ)၊ မော်ဖိုးကျိုး စတဲ့ တပ်စခန်းတွေက နေ ဆုတ်ခွာလာတဲ့ စစ်ကောင်စီတပ်ဖွဲ့ ဝင်တွေဟာ ခေါပုတ် တပ်စခန်းမှာ စုစည်းခဲ့ကြတာပါ။
အင်အားရာဂဏန်း ခန့် စုမိတဲ့အခါ ဖာပွန်မြို့အနီး ပိတ်ဆို့ခံထားရတဲ့ ဖာပွန်ဗျုဟာ ဆီ စစ်ကူပို့ ဖို့ ကြိုးပမ်းနေတာလို့ သိရပါတယ်။
ဒါပေမယ့် KNU နဲ့ ပူးပေါင်းတပ်တွေရဲ့ ပိတ်ဆို့မှုကြောင့် စခန်းပြင်ထွက်မရသလို ဖာပွန်ဗျုဟာ ကို လည်း ဝန်းရံထားတယ်လို့KNU တပ်မဟာ (၅) ပြောရေးဆိုခွင့်ရှိသူ ဗိုလ်မှူးကြီးစောကလယ်ဒိုက ဆိုပါတယ်။
“ဖာပွန်ဗျူဟာစခန်းလည်း တော်လှန်ရေးတပ်ဘက်က ၀ိုင်းရံပိတ်ဆို့နေတုန်းပဲ၊ တိုက်သိမ်းတာတော့ မရှိသေးဘူး၊ စကစတပ်ဘက်ကလည်း တောင့်ခံတုန်းပဲ” လို့ ဗိုလ်မှူးကြီးစောကလယ်ဒိုက ဆိုပါတယ်။
ဖာပွန်စစ်ဗျုဟာကို ဝန်းရံပိတ်ဆို့ထားချိန်မှာ စစ်ကောင်စီတပ်နဲ့ ကရင်နယ်ခြားစောင့်တပ်ဖွဲ့ ဝင်တွေကမမောင်းဘက်က နေဖာပွန်ဆီ စစ်ကူတက်လာတယ်ဆိုတဲ့ သတင်းကိုလည်းကြားရ ကြောင်း ဗိုလ်မှူးကြီးစောကလယ်ဒိုရဲ့ ပြောပြချက်အရသိရပါတယ်။
ပြီးခဲ့တဲ့ မတ်လပိုင်းကစတင်ပြီး ဖာပွန်မြို့ ကို KNU တပ်မဟာ (၅) ကထိန်းချုပ်လိုက်ပြီး မြို့အနီးက စစ်ကောင်စီရဲ့ အခြေချစစ်ဗျုဟာ ၊ ခြေလျင်နဲ့ ခြေမြန်တပ်ရင်းတွေကို တိုက်ခိုက်ရာမှာ တပ်ရင်း ဌာနချုပ် ၃ ခုကို သိမ်းယူနိုင်ခဲ့ပါတယ်။
လက်ရှိမှာတော့ ဖာပွန်အခြေချ စစ်ဗျုဟာ ၊ စစ်ဗျုဟာနဲ့ ကပ်လျက်မှာ ရှိတဲ့ အမှတ် (၃၄၀) ခြေမြန်တပ်ရင်း၊ အမှတ် (၃၄၁) ခြေမြန်တပ်ရင်း တို့ ကျန်ရှိနေပါတယ်။
ဖာပွန်က လက်ကျန် တပ်စခန်းတွေ လက်မလွတ်ရဖို့ စစ်ကောင်စီဟာ လေကြောင်းကနေ မကြာခဏဆိုသလို ပစ်ကူပေးတိုက်ခိုက်နေတယ်လို့သိရပါတယ်။
