မန္တလေးတိုင်းနှင့် စစ်ကိုင်းတိုင်းအစပ်ရှိ တကောင်းမြို့မှ စစ်ကောင်စီတပ်စခန်းများကို ပြည်သူ့ကာကွယ်ရေးပူးပေါင်းတပ်ဖွဲ့များက တိုက်ခိုက်ရာ စခန်းတခုသာ ကျန်ရှိတော့ကြောင်းနှင့် စစ်ကောင်စီက လေကြောင်းမှပစ်ကူပေးခုခံတိုက်ခိုက်နေကြောင်း သတင်းရရှိသည်။
တကောင်းမြို့မှ စစ်ကောင်စီစခန်းများကို ယနေ့(ဩဂုတ်လ ၁၁ရက်) နံနက် ၅နာရီခန့်မှ စတင်၍ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၁)စစ်ဒေသလက်အောက်ခံ ပြည်သူ့ကာကွယ်ရေးတပ်ဖွဲ့များကတိုက်ခိုက်နေခြင်းဖြစ်သည်။
“တကောင်းမှာက ရဲစခန်းရယ်၊ ဆေးရုံရယ်၊ လေးမျက်နှာဘုရားဝင်းထဲရယ် စစ်တပ်ကတပ်စွဲထားတာ။ ရဲစခန်းနဲ့ဆေးရုံကရပြီ။ လေးမျက်နှာကျန်နေတာ။ စစ်တပ်ကလေကြောင်းပစ်ကူနဲ့ တိုက်နေတယ်”ဟု မြို့ခံတဦးကပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
တစ်ကောင်မြို့မရဲစခန်းနှင့် တိုက်နယ်ဆေးရုံတွင်တပ်စွဲထားသည့်စစ်ကောင်စီတပ်ဖွဲ့ဝင်များသည် လက်နက်ချခြင်းဖြစ်ရာ သုံ့ပန်းအဖြစ်ဖမ်းမိထားသည်ဟုစုံစမ်းသိရသည်။ အသေးစိတ်အခြေအနေကို စစ်ဒေသ(၁)က မကြာမီထုတ်ပြန်မည်ဟု သတင်းရရှိသည်။
တကောင်းမြို့အား မြို့သိမ်းတိုက်ပွဲအဖြစ် တိုက်ခိုက်နေခြင်းဖြစ်ပြီး မနက်ပိုင်းက တိုက်ပွဲတွင် စစ်ကောင်စီကလက်နက်ကြီးဖြင့်ပစ်၍ အရပ်သားတစ်ဦးသေဆုံးကာတဦးဒဏ်ရာရခဲ့သည်။ မြို့ခံအများအပြားသည် လွန်ခဲ့သည့်ရန်အနည်းငယ်မှစ၍ ဘေးလုပ်ရာသို့တိမ်းရှောင်နေခြင်းဖြစ်ပြီး စစ်ကောင်စီက ကျေးရွာများဘက်သို့ လက်နက်ကြီးဖြင့်ပစ်ခတ်သောကြောင့် အရပ်သားထိခိုက်ခြင်းဖြစ်ကြောင်း မြို့ခံအချို့ကပြောသည်။
တကောင်းမြို့ပေါ်တွင် ဖုန်းလိုင်းများဖြတ်တောက်ထားပြီး MPTဖိုင်းလိုင်းတမျိုးသာ ရံဖန်ရံခါ လိုင်းမိသည်ဟု သိရသည်။
သြဂုတ် ၁၁ ရက်ညနေအထိတိုက်ပွဲများပြင်းထန်နေပြီး စစ်ကောင်စီက Y12 လေယာဉ်ဖြင့် ဗုံးကြဲတိုက်ခိုက်ခဲ့ကြောင်း သိရှိရသည်။
တကောင်းမြို့သည်ဧရာဝတီမြစ်ကမ်းဘေးမြို့ဖြစ်ပြီး မြောက်ဘက်တွင် ထီးချိုင့် ၊တောင်ဘက်တွင် သပိတ်ကျင်း ၊အနောက်မြောက်ဘက်တွင် ကောလင်းမြို့ ၊အနောက်တောင်ဘက်တွင် ကျွန်းလှမြို့ ၊အရှေ့ဘက်တွင် မဘိမ်းမြို့တို့တည်ရှိသည်။ ၂၀၁၄ သန်းခေါင်စာရင်းအရ မြို့ပေါ်တွင် လူဦးရေ ၈၁၀၀ ကျော် ၊ ကျေားလက်တွင် လူဦးရေ ၂၇,၇၀၀ကျော်နေထိုင်သည်။
တကောင်းမြို့တွင် ပြီးခဲ့သည့် ဇူလိုင်လ ၂၀ရက်ကလည်းအင်းနက်ကျေရွာရှိ စစ်ကောင်စီ၏ ဆက်သွယ်ရေး တာဝါတိုင်ကုန်း စခန်းကို ကချင်လွတ်လပ်ရေးတပ်မတော်(KIA) နှင့် PDF ပူးပေါင်းတပ်ဖွဲ့က တိုက်ခိုက်သိမ်းယူခဲ့သည်။
တကောင်းမြို့သည် စစ်ကိုင်းတိုင်း၊ ထီးချိူင့်မြို့နှင့် မန္တလေးတိုင်းသပိတ်ကျင်းမြို့ကြား၌တည်ရှိသည်။ အင်းနက်ကျေးရွာသည် ထီးချိူင့်မြို့နှင့် ပိုနီးပြီး တရုတ်စီမံကိန်းတခုဖြစ်သည့် တကောင်းနီကယ်စက်ရုံအနီး၌ တည်ရှိသည်။
ထီးချိူင့်မြို့နယ်ရှိ တကောင်းနီကယ်စက်ရုံကိုလည်း KIAနှင့် PDF ပူးပေါင်းတပ်ဖွဲ့များက ထိန်းချုပ်ထားသည်။ ထို့အပြင် သပိတ်ကျင်းမြို့ရှိစစ်ကောင်စီစခန်းများအပြားကိုလည်း မန္တလေး-PDFအပါအဝင် ပြည်သူ့ကာကွယ်ရေးပူးပေါင်းတပ်ဖွဲ့များက ထိုးစစ်စင်တိုက်ခိုက်နေပြီး စခန်းအများအပြား သိမ်းယူထားသည်။
![](https://i0.wp.com/www.ludunwayoo.com/wp-content/uploads/2024/08/454964587_832466605618800_757897765992839747_n.jpg?resize=720%2C480&ssl=1)
![](https://i0.wp.com/www.ludunwayoo.com/wp-content/uploads/2024/08/454964846_832466572285470_424505412064473105_n.jpg?resize=720%2C480&ssl=1)
![](https://i0.wp.com/www.ludunwayoo.com/wp-content/uploads/2024/08/454964595_832466545618806_3808555654815242843_n.jpg?resize=720%2C480&ssl=1)
(သပိတ်ကျင်းမြို့နယ်ရှိတွင်းငယ်ရဲစခန်းကို PDFများတိုက်ခိုက်သိမ်းပိုက်ခဲ့စဥ်။ဓါတ်ပုံ-TBK)
![](https://i1.wp.com/ludunwayoo.com/wp-content/uploads/2021/08/banner-logo1-50px.png)