ဟန်နွေ/People’s Spring
ကရင်အမျိုးသားအစည်းအရုံး(KNU)အနေဖြင့် တော်လှန်ရေး အောင်မြင်မှုရရှိအောင် ကြိုးစားနေပြီး ထိုသို့ ကြိုးစားနေမှုကို ပေါ်လွင်အောင် လိုက်လံရှင်းပြနေ၍ မရကြောင်း KNU၏ ဝါရင့်တော်လှန်ရေး ခေါင်းဆောင်တစ်ဦးဖြစ်သည့် ပဒိုစောသမိန်ထွန်းက ပြောသည်။
ယမန်နေ့ (ဩဂုတ် ၁၂ရက်)က ကျရောက်သည့် ကရင်အာဇာနည်နေ့ အခမ်းအနားတွင် KNUဗဟို အမြဲတမ်း ကော်မတီဝင်လည်းဖြစ်သည့် ပဒိုစောသမိန်ထွန်းက ယခုကဲ့သို့ ပြောဆိုခဲ့ခြင်းဖြစ်သည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
တော်လှန်ရေးအောင်မြင်မှုရရှိအောင် အားလုံးနားလည်အောင် ရှင်းပြလိုက်ပါက ရန်သူ မင်းအောင်လှိုင်၏ စစ်ကောင်စီဘက်က သိရှိမည်ဖြစ်၍ လုပ်ဆောင်နေသည့် အရာအားလုံးကို ပြောပြ၍မရဟု ပဒိုစောသမိန်ထွန်းက ပြောသည်။
” ကျနော်တို့ အစီအစဉ် ကျနော်တို့ လုပ်မယ်။ အဲဒါကို ခင်ဗျားက ဖထီးက အိပ်ငိုက်နေတုန်းလို့၊ ကွမ်းကြီးဝါးနေတုန်းလို့ ၊ ဖားရှာထွက်နေတုန်းလို့ ဒါမျိုးတွေတော့ မပြောနဲ့ ဒါကလေးစကားတွေ။ကျနော်တို့ရဲ့ တော်လှန်ရေးကြီးကို တပြည်လုံးရဲ့ တော်လှန်ရေးကို အမြန်ဆုံးအောင်မြင်အောင် ကျနော်တို့ လုပ်ဖို့နော်”ဟု ပဒိုစောသမိန်ထွန်းက ပြောသည်။
ထိုသို့ အော်လှန်ရေးအောင်မြင်အောင် ကြိုးပမ်းရာတွင် KNU အပါအဝင် လူပုဂ္ဂိုလ်အဖွဲ့အစည်းအားလုံး၌ တာဝန်ရှိကြောင်း ၎င်းက ပြောသည်။
” အဲဒီလိုသာ ဟိုဝေဖန်တာ ဒီဝေဖန်တာတွေများပြီးမှ ရှေ့မကြည့် နောက်မကြည့်နဲ့ ကိုယ့်ခြေထောက်နဲ့ကိုယ် ခလုတ်တိုက်တာတွေဖြစ်နေရင်တော့ ဒီကြားထဲမှာ စားသွားမှာပဲ မင်းအောင်လှိုင်။အဲဒါကို အထူးသတိပြုရမယ်။ သူလည်း သူ့ဘက်က သူကြိုးစားနေတယ်။ ဘာမှ မရတော့ လေယာဉ်ပျံသုံးတယ်။ အဲဒီ လေယာဉ်ပျံမရတော့ ကိုယ့်အတွင်းမှာ လှိုက်လှဲဖြိုခွဲအောင် သပ်ရှိုတွေလုပ်တာ။ အဲဒါကို ကျနော်တို့က လေ့လာမှု မရှိရင် သူ့ဘက်ကို ပါသွားရော့။ ဒါကြောင့် ဒါသိပ်အရေးကြီးပါတယ်။ ဒီကနေ့ကာလက”ဟု ပဒိုစောသမိန်ထွန်းက ပြောသည်။
တိုင်းရင်းသားပြည်သူ၊ နိုင်ငံရေးပါတီ၊ လက်နက် ကိုင်အဖွဲ့အစည်းအားလုံးက တက်ညီလက်ညီ စုစည်းညီညွတ်စွာ လုပ်ဆောင်ကြရမည်ဟုလည်း ၎င်းက ဆိုသည်။
” ဒီစစ်အာဏာရှင်စနစ်ကို အပြုတ်တိုက်မှ ကျနော်တို့ ရချင်တဲ့ဖက်ဒရယ် ဒီမိုကရေစီ ရမှာ။စစ်အာဏာရှင်စနစ်ရှိနေသမျှ အုပ်စုရှိနေသမျှ ဘယ်တော့မှ ဖက်ဒရယ်ဒီမိုကရေစီဆိုတာ ရမှာ မဟုတ်ဘူး”ဟုလည်း ပဒိုစောသမိန်ထွန်းက ပြောသည်။
KNUသည် စစ်တပ်အာဏာသိမ်းစကတည်းက စစ်ကောင်စီကို ခုခံတော်လှန်တိုက်ခိုက်နေသည့် တိုင်းရင်းသားလက်နက်ကိုင်တပ်ဖြစ်ပြီး သုံးနှစ်ခွဲကျော် ကာလအတွင်း တိုက်ပွဲကြီးငယ် သောင်းချီပြီး စစ်ကောင်စီတပ်ကို တိုက်ခိုက်ခဲ့သည်။
ထို့ပြင် စစ်အာဏာရှင်ဆန့်ကျင်တိုက်ပွဲဝင်မည့်သူများကို စစ်ပညာ သင်ကြားပေးမှု အပါအဝင် ကူညီပံ့ပိုးမှုများ လုပ်ဆောင်ပေးခဲ့ပြီး လက်ရှိ KNU ခရိုင်တပ်မဟာအသီးသီးတွင် PDFများနှင့်အတူ လက်တွဲကာ တိုက်ပွဲဝင်လျက်ရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)