ဟန်နွေ/People’s Spring
ရှမ်းပြည်နယ်မြောက်ပိုင်း၊ လားရှိုးမြို့သိမ်းတိုက်ပွဲအတွင်းဖမ်းမိ စစ်ကောင်စီတပ်ဖွဲ့ဝင်များနှင့် မိသားစုဝင်များအနက် စစ်သုံ့ပန်းနှင့်မိသားစုဝင်များကို ကိုးကန့်တပ်မတော်(MNDAA)က ပြန်လွှတ်ပေးလျက်ရှိရာ ဩဂုတ် ၁၃ရက်အထိ လူဦးရေ ၂,၀၀၀ကျော် ပြန်လွှတ်ပေးပြီးဖြစ်သည်ဟု MNDAAက ထုတ်ပြန်သည်။
လားရှိုးမြို့အရှေ့မြောက်ပိုင်းတိုင်းစစ်ဌာနချုပ် သိမ်းပိုက်မှုအပါအဝင် တိုက်ပွဲကာလအတွင်း လက်နက်ချသူ ထောင်ချီရှိခဲ့ရာ ဩဂုတ် ၆ရက်မှစ၍ MNDAAက အသုတ်လိုက် ပြန်လွှတ်ပေးနေခြင်းဖြစ်သည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
ထိုသို့ လွှတ်ပေးခဲ့ရာ ဩဂုတ် ၁၃ရက်တွင် စစ်ကောင်စီတပ်မိသားစုဝင် ၁၈၅ဦးကို ထပ်မံလွှတ်ပေးခဲ့ကြောင်း အသိပေးပြီး စစ်သုံပမ်းနှင့် တပ်မိသားစုများ ခုနစ်သုတ်လွှတ်ပေးခဲ့ပြီးဖြစ်ကြောင်း အသိပေးသည်။
ထိုသို့ လွှတ်ပေးရာတွင် စစ်ကောင်စီတပ်မိသားစုဝင်များကို MNDAA ရဲဘော်များက ခရီးစရိတ်ပေးအပ်ခဲ့မှု ရုပ်သံကို ဖော်ပြထားသည်။
ယခု သတင်းထုတ်ပြန်ချက်တွင် လမ်းခရီးစိတ် ပေးအပ်ခဲ့မှုကို ဖော်ပြထားခြင်းမရှိသော်လည်း ယခင် ထုတ်ပြန်ချက်များအရ စစ်ကောင်စီတပ်မိသားစု တစ်ခုလျင် ကျပ် ၅သောင်းစီ ထောက်ပံ့ပေးအပ်ခဲ့ဟု MNDAAက အသိပေးသည်။
ထိုသို့ လမ်းစရိတ်ပေးခြင်းအပါအဝင် ဒဏ်ရာရသူများအား ဆေးကုသမှုပေးခြင်း၊ စားနပ်ရိက္ခာများ ထောက်ပံ့ပေးခြင်း၊ သွားလာရာတွင် ကားများဖြင့်ပို့ဆောင်ပေးခြင်းများ ပြုလုပ်ခဲ့ဟု MNDAAက ဆိုသည်။
MNDAA အနေဖြင့် စစ်သုံ့ပန်းများစွာ ဖမ်းမိထားရာ ပြန်လွှတ်ပေးခြင်းမရှိသေးသူများအား ကယ်ဆယ်ရေးစခန်းများ ဖွင့်လှစ်ထားရှိကြောင်းလည်း MNDAAက ထုတ်ပြန်သည်။
MNDAAသည် လက်နက်ချအလင်းဝင်သူများကိုမူ ဆုငွေပေးအပ်မှုများ ပြုလုပ်ခဲ့ကြောင်း အသိပေးသည်။ အလင်းဝင်သူများကို အနည်းဆုံး ကျပ် ၁၀သိန်း ဆုငွေပေးအပ်ခဲ့ပြီး ရာထူးအဆင့်နှင့် လက်နက်ပါဝင်လာမှုတို့အပေါ်မူတည်ပြီး ထပ်မံ ပေးအပ်လေ့ရှိသည်။ လက်နက်ချအလင်းဝင်သူများကို MNDAA ထိန်းချုပ်နယ်မြေအတွင်း နေရာချထားပေးကြောင်းလည်း အသိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)