စက်တင်ဘာ – ၁၁ ၊၂၀၂၅ ၊ နိုင်ပကောင်း/People’s Spring
ထိုင်း – မြန်မာနယ်စပ် မြ၀တီမြို့မှာ စစ်ကောင်စီတပ်ကပြန်လည်ဝင်ရောက်နေရာယူလိုက်ပြီးနောက် BGF တပ်ဖွဲ့ဝင်တွေကို မြဝတီမြို့ တံတားအောက်ကနေ ဖယ်ရှားလိုက်တယ်လို့ ကရင့် လက်နက်ကိုင်အဖွဲ့အစည်းတွေနဲ့ နီးစပ်တဲ့ သတင်းရင်းမြစ်က ပြောပါတယ်။
စက်တင်ဘာ ၆ ရက်ကစပြီး မြဝတီမြို့ဝင်ပေါက်ဖြစ်တဲ့ သင်္ဃန်းညီနောင်တပ်နယ် ကို စစ်ကောင်စီတပ်က ပြန်လည်သိမ်းယူလိုက်ပြီးတဲ့နောက် မြဝတီမြို့ထဲမှာလည်းစစ်ကောင်စီတပ်က အင်အားဖြန့်ကျက်ပြီးတပ်စွဲနေရာယူတာတွေရှိလာတာပါ။
မြ၀တီမြို့ပေါ်မှာ မြို့လုံခြုံရေးကို အဓိကယူထားတဲ့ ကရင်နယ်ခြားစောင့်တပ်(BGF) တပ်ဖွဲ့ဝင်တွေ ရှိသလို အခြားကရင်လက်နက်ကိုင်အဖွဲ့အစည်းတွေဖြစ်ကြတဲ့ အပစ်ရပ်အဖွဲ့ ဒီမိုကရေစီအကျိုးပြုကရင်တပ်မတော် (DKBA)နဲ့ ကရင်ငြိမ်းချမ်းရေးကောင်စီ(KNU/KNLA PC)အဖွဲ့တို့လည်း ရှိကြပြီး သွားလာလှုပ်ရှားလျက်ရှိကြပါတယ်။
Public Service Announcement
ဒီရက်ပိုင်းအတွင်း ကရင်နယ်ခြားစောင့်တပ်(BGF) လုံခြုံရေးယူထားတဲ့ ထိုင်း-မြန်မာ အမှတ်(၁)ချစ်ကြည်ရေးတံတားအောက် ကို စစ်ကောင်စီတပ်က ဝင်ရောက်နေရာယူလိုက်ပြီးတဲ့နောက် BGF တပ်ဖွဲ့ဝင်တွေကို ဖယ်ရှားခိုင်းလိုက်တာ လို့ လက်နက်ကိုင်အဖွဲ့အစည်းနဲ့ နီးစပ်တဲ့ သတင်းရင်းမြစ်တစ်ဦးက ပြောပါတယ်။
မြ၀တီမြို့ပေါ်မှာ လည်း လက်နက်ကိုင်အဖွဲ့အစည်းတွေကို စစ်ကောင်စီတပ်က သွားလာခွင့်ကန့်သတ်လိုက်ပြီလို့ သတင်းတွေထွက်ပေါ်နေပေမယ့် လက်ရှိမှာတော့ DKBA ၊ KNU/KNLA PC ၊ BGF အဖွဲ့တို့က လက်နက်ကိုင်ဆောင်ပြီး ယူနီဖောင်းဝတ်တွေနဲ့ ပုံမှန်သွားလာလှုပ်ရှားနေလျက်ရှိတယ်လို့ မြ၀တီမြို့ခံသတင်းရင်းမြစ်တစ်ဦးက ပြောပါတယ်။
“ဒီလိုပဲပြောအသံထွက်တယ် သွားနေကြတာပဲလေ BGF လည်းသွားတယ်၊ DKBA လည်းသွားတယ်” လို့ သူကပြောပါတယ်။
စစ်ကောင်စီတပ်ဟာ သင်္ဃန်းညီနောင်ကို ပြန်လည်သိမ်းယူနိုင်ခဲ့ပြီးတဲ့နောက် မြ၀တီမြို့ တောင်ဘက်ခြမ်းမှာရှိတဲ့ လေးကေကော်မြို့သစ်ကို ပြန်သိမ်းပိုက်နိုင်ဖို့အတွက် မြေပြင်ကနေ စစ်ရေးလှုပ်ရှားဆောင်ရွက်မှုတွေ ပြုလုပ်နေသလို ဝေဟင်ကနေလည်း လေကြောင်းတိုက်ခိုက်မှုတွေ ပြုလုပ်ခဲ့တာပါ။
ဒါ့အပြင် တော်လှန်ရေးပူးပေါင်းတပ်တွေ သိမ်းယူထားခဲ့တဲ့မြဝတီမြို့တောင်ဘက်က လက်ခတ်တောင်စခန်းကို ပြန်လည်သိမ်းယူတပ်စွဲလိုက်တယ်လို့ စစ်ရေးသတင်းရင်းမြစ်က ပြောပါတယ်။
မြ၀တီ-ကော့ကရိတ် အာရှလမ်းပိုင်းတလျှောက်ကို ပြန်လည်ထိန်းချုပ်နိုင်ပြီလို့ စစ်ကောင်စီက ကြေညာပေမယ့် မြေပြင်မှာတော့ လမ်းပိုင်းနေရာတချို့မှာ စစ်ကောင်စီတပ်နဲ့ တော်လှန်ရေးပူးပေါင်းတပ်တို့အကြား နှစ်ဖက်တိုက်ပွဲတွေ ဆက်ဖြစ်နေဆဲဖြစ်တယ်လို့ စစ်ရေးသတင်းရင်းမြစ်က ပြောပါတယ်။
