“အတွေ့အကြုံနဲ့ စွမ်းရည် မြင့်လာသော PDF။ ပြည်သူ့အတွက် အောင်ပွဲတွေ ပိုပြီး ရရှိနိုင်ပါစေ”
စက်တင်ဘာ-၂၁၊၂၀၂၅။People’s Spring
တော်လှန်ရေးတပ်များ ဗန်းမောက်မြို့သိမ်းအောင်ပွဲရရှိခဲ့မှုအပေါ် ကချင်လွတ်လပ်ရေးအဖွဲ့(KIO/KIA) ခေါင်းဆောင်တဦးဖြစ်သည့် ကချင်လွတ်လပ်ရေးကောင်စီ(KIC) ဒုတိယ ဥက္ကဋ္ဌ ဒုတိယ ဗိုလ်ချုပ်ကြီး ဂွန်မော်က ဂုဏ်ပြုလိုက်သည်။
ဗန်းမောက်မြို့ကိုတော်လှန်ရေးတပ်များက သိမ်းပိုက်ပြီးနောက် မြို့အဝင် ဆိုင်းဘုတ်ရှေ့၌ PDF အလံလွှင့်ထူအောင်ပွဲခံခဲ့သည့် ရုပ်သံမှတ်တမ်း ကို People’s Spring က ယနေ့ည၌ သတင်းဖော်ပြခဲ့ရာ ဒုဗိုလ်ချုပ်ကြီးဂွန်မော်က မှတ်ချက်ရေးသားဂုဏ်ပြုခဲ့ခြင်းဖြစ်သည်။
“အတွေ့အကြုံနဲ့ စွမ်းရည်မြင့်လာသော PDF။ ပြည်သူ့အတွက် အောင်ပွဲတွေ ပိုပြီး ရရှိနိုင်ပါစေ” ဟု ဒုဗိုလ်ချုပ်ကြီးဂွန်မော်က ဗန်းမောက်မြို့၌ PDF အလံလွှင့်အောင်ပွဲခံသည့် သတင်းတွင် ဝင်ရောက်မှတ်ချက်ရေးသားခဲ့သည်။
Public Service Announcement
ဒုဗိုလ်ချုပ်ကြီး ဂွန်မော်က ထိုသို့ မှတ်ချက်ဝင်ရောက်ရေးသားမှုအပေါ် လူမှုကွန်ယက်အသုံးပြုသောပြည်သူများက ကျေးဇူးတင်လေးစားကြောင်း တုန့်ပြန်မှတ်ချက်ရေးသားခဲ့ကြသည်ကိုလည်းတွေ့ရသည်။
“ ဗိုလ်ချုပ်တို့ရဲ့ လေ့ကျင့်/ပျိုးထောင်ပေးမှုကြောင့် အောင်ပွဲရနေတာပါ” ဟုပြည်သူတဦးကရေးသားမှတ်ချက်ပြုသည်။
စစ်ကောင်စီနှင့် လက်အောက်ခံ ရှမ်းနီ SNA တို့ တပ်စွဲထားသည့် ဗန်းမောက်မြို့ကို တိုက်ခိုက်သိမ်းပိုက်ရန် စစ်ဆင်ရေးကို တော်လှန်ရေးပူးပေါင်းတပ်က စက်တင်ဘာ ၁၅ရက်တွင် စတင်ခဲ့ရာ တိုက်ပွဲ ၆ရက်မြောက်နေ့တွင် မြို့ကိုသိမ်းနိုင်ခဲ့သည်။
အဆိုပါ ဗန်းမောက်မြို့သိမ်းစစ်ဆင်ရေးကို အမျိုးသားညီညွတ်ရေးအစိုးရ(NUG) ၊ကာကွယ်ရေးဝန်ကြီးဌာန၊ အမှတ်(၁)စစ်ဒေသကွပ်ကဲမှုဖြင့် စစ်ရေးဖော်ဆောင်ခြင်းဖြစ်ကြောင်း KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက စက်တင်ဘာ ၁၉ရက်တွင် ပြောပြထားသည်။
တော်လှန်ရေးတပ်များက ဗန်းမောက်မြို့ကိုသိမ်းယူခဲ့သဖြင့် ယခုအခါ စစ်ကိုင်းတိုင်း၌ တော်လှန်ရေးတပ်များသိမ်းပိုက်ထားသော မြို့ ၇ မြို့ရှိလာပြီဖြစ်သည်။
