စက်တင်ဘာ−၂၃၊ ၂၀၂၅။ ထားမြတ်/People’s Spring
ကချင်ပြည်နယ် ဆော့လော်မြို့နယ် လန်ဆယ်ဒေသမှာ ဒီကနေ့ (စက်တင်ဘာ ၂၃ရက်)မှာ တိုက်ပွဲဆက်လက်ဖြစ်ပွားခဲ့ရာ စစ်ကောင်စီတပ်နဲ့ ပြည်သူ့စစ်ပူးပေါင်းတပ် သေဆုံးထိခိုက်မှုများပြားခဲ့တယ်လို့ ကချင်စစ်ရေး သတင်းရင်းမြစ်က ပြောပါတယ်။
စစ်ကောင်စီတပ်နဲ့ ပြည်သူ့စစ်ပူးပေါင်းတပ်ဟာ စက်တင်ဘာ ၁၉ရက်မှာ KIA သိမ်းထားတဲ့ လန်ဆယ်ဒေသကို ပြန်လည်ရယူနိုင်ရေး ထိုးစစ်ဆင်ခဲ့ရာ ၅ရက်ဆက်တိုက်ပွဲတွေ ဖြစ်ခဲ့တာဖြစ်ပါတယ်။
လန်ဆယ်ဒေသက လာဟီဆယ်စခန်း မြောက်ဘက်နေရာ ဝင်ရောက်နေရာယူထားတဲ့ စစ်ကောင်စီ ပြည်သူ့စစ်ပူးပေါင်းတပ်ကို စက်တင်ဘာ ၂၃ရက် နေ့လည်မှာ တိုက်ခိုက်ခဲ့ပြီး တောင်ကြောကို ဆက်လက်ရှင်းလင်းနေတယ်လို့ ကချင်စစ်ရေး သတင်းရင်းမြစ်က အသိပေးထားပါတယ်။
Public Service Announcement
အခြားစစ်ရေးသတင်းရင်းမြစ်တဦးကလည်း “ ငါတို့ စခန်း ပြန်ရပြီ။ စခတွေ သေတာအများကြီး။ ကာကင်းကုန်းတခုပါ။ စခန်းကြီးတော့ မဟုတ်ဘူး။ အခုတော့ အကုန်ပြရပါပြီ”လို့ လန်ဆယ်ကို ထိုးစစ်ဆင်လာတဲ့ စစ်ကောင်စီတပ်နဲ့ ပြည်သူ့စစ်တပ်တွေ ထိုးစစ်အစမှာ ဝင်ရောက်ထားနိုင်ခဲ့တဲ့ နေရာတွေမှာ ပြန်လည်ဆုတ်ခွာပေးရမှုပေါ် မှတ်ချက်ပြုပါတယ်။
စစ်ကောင်စီဟာ လန်ဆယ် အပါအဝင် KIA သိမ်းပိုက်ထားတဲ့ နယ်မြေတွေ ပြန်လည်ရရှိဖို့အတွက် ကချင်ဒေသက ပြည်သူ့စစ်အင်အားတွေအသုံးပြု ထိုးစစ်ဆင်နေရာ ၀ိုင်းမော်မြို့နယ် လမြန်ဒေသမှာလည်း တိုက်ပွဲတွေ ဆက်တိုက်ဖြစ်ပွားနေပါတယ်။
