မြောက်ကိုရီးယားက လောင်စာ အခဲတောင့် အသုံးပြုပြီး တွန်းအားမြင့်မြင့် ထုတ်လွှတ်နိုင်တဲ့ အင်ဂျင်တစ်မျိုးကို စမ်းသပ် အောင်မြင်ခဲ့ကြောင်း ကြေညာခဲ့ပါတယ်။
ဒီဇင်ဘာ ၁၅ ရက်က ပြုလုပ်ခဲ့တဲ့ အဲဒီ အင်ဂျင် စမ်းသပ်မှုကို နိုင်ငံခေါင်းဆောင် ကင်မ်ဂျုံအန်းကိုယ်တိုင် ကွပ်ကဲ စောင့်ကြည့်ခဲ့တယ်လို့ အစိုးရပိုင် KCNA သတင်းဌာနက နောက်တစ်နေ့မှာ ဖော်ပြခဲ့ပါတယ်။ နိုင်ငံတကာ စစ်လက်နက် ပါရဂူတွေကတော့ အဲဒီ အင်ဂျင် နည်းပညာဟာ တိုက်ချင်းပစ် ဒုံးကျည်တွေရဲ့ မြန်နှုန်းနဲ့ လမ်းကြောင်းပြောင်း ကွေ့ဝိုက်ပျံသန်းနိုင်စွမ်းတွေကို သိသိသာသာ မြှင့်တင်ပေးနိုင်လိမ့်မယ်လို့ သုံးသပ်ကြပါတယ်။
အင်ဂျင်သစ် စမ်းသပ်မှုကို မြောက်ကိုရီးယားရဲ့ ဒုံးကျည်နည်းပညာ အစိတ်အပိုင်းတွေ စမ်းသပ်လေ့ရှိတဲ့ ဆိုဟေး ဂြိုဟ်တု လွှတ်တင်ရေး စခန်းမှာ ပြုလုပ်ခဲ့တာလို့ KCNAက ထုတ်ပြန်ပါတယ်။ မြောက်ကိုရီးယားဟာ နိုင်ငံရဲ့ နျူကလီးယားနဲ့ ဒုံးကျည်လက်နက် နည်းပညာတွေကို မြှင့်တင်ဖို့ အသည်းအသန် အားထုတ် ကြိုးစားနေချိန်မှာ အခုစမ်းသပ်မှုက အရေးကြီးတဲ့ ခြေလှမ်းသစ်တစ်ခု ဖြစ်လာနိုင်ပါတယ်။
မြောက်ကိုရီးယားဟာ လောင်စာ အခဲတောင့်ကို အသုံးပြုတဲ့ ဒုံးကျည် အင်ဂျင်မျိုး တီထွင်နိုင်ဖို့ ကာလရှည်ကြာ ကြိုးပမ်းနေခဲ့ပါတယ်။ လောင်စာ အခဲကို သုံးထားတဲ့အခါ ကြိုတင် ပြင်ဆင်ချိန် လုံးဝနီးပါး မလိုအပ်ဘဲ ဒုံးကျည်ကို လက်ဦးမှုယူ ပစ်ခတ်နိုင်မှာ ဖြစ်တဲ့အပြင် ဒုံးကျည်ရဲ့ မြန်နှုန်းနဲ့ ကွေ့ဝိုက် ပျံသန်းနိုင်တဲ့ စစ်ကစားမှု စွမ်းရည်တွေကိုပါ မြှင့်တင်နိုင်လိမ့်မယ်လို့ တောင်ကိုရီးယားနိုင်ငံ၊ ဆိုးလ်မြို့တော်က အူဟာ တက္ကသိုလ်ရဲ့ နိုင်ငံတကာ လေ့လာရေး ဘာသာရပ် ပါမောက္ခ လိုင်ဖ်အဲရစ် အီစလေက ပြောပါတယ်။
မနှစ်တုန်းက မြောက်ကိုရီးယားရဲ့ အာဏာရပါတီ အထူးအစည်းအဝေးမှာ စစ်ရေး နည်းပညာ မဟာဗျူဟာ ရည်မှန်းချက် ၅ ရပ်ကို သတ်မှတ် ကြေညာခဲ့ရာမှာ လောင်စာခဲ နည်းပညာသုံး ဒုံးကျည်တွေ ပိုင်ဆိုင်ရေးဟာလည်း အဓိက အချက်တစ်ခု ဖြစ်ခဲ့ပါတယ်။
မြောက်ကိုရီးယားဟာ အခုနှစ်အတွင်း ဒုံးကျည် အမျိုးအစား ပေါင်းစုံကို စံချိန်တင် အရေအတွက်ထိ စမ်းသပ် ပစ်လွှတ်ခဲ့သလို နျူကလီးယားဗုံး တစ်လုံးကို စမ်းသပ် ဖောက်ခွဲဖို့လည်း စီစဉ်နေကြောင်း အမေရိကန်နဲ့ တောင်ကိုရီးယား အစိုးရတွေက စွပ်စွဲ ပြောဆိုထားပါတယ်။
