ယူကရိန်း စစ်ပွဲမှာ ရုရှား အနေနဲ့ စစ်လက်နက် အသစ်တွေ တိုးမြှင့် ထုတ်လုပ်ဖို့ ဘက်ပေါင်းစုံက အကျပ်တွေ့လာနေပေမယ့် စစ်လက်နက် အဟောင်းတွေကို ပြန်ထုတ်သုံးလာဖွယ် ရှိတယ်လို့ နိုင်ငံတကာရေးရာ လေ့လာသူတွေက သုံးသပ်ထားကြပါတယ်။
မဟာဗျူဟာနဲ့ နိုင်ငံတကာ လေ့လာရေး စင်တာ (CSIS)က ရုရှားဟာ စစ်မြေပြင်မှာ ဆုံးရှုံးခဲ့တာတွေနဲ့ အနောက်မဟာမိတ် နိုင်ငံတွေဆီက တင်းကျပ်တဲ့ အရေးယူ ပိတ်ဆို့မှုတွေကြောင့် နည်းပညာမြင့် စစ်လက်နက် အသစ်တွေ စဉ်ဆက်မပြတ် ထုတ်လုပ်ရေးမှာ အကြီးအကျယ် ရုန်းကန်နေရတယ်လို့ မှတ်ချက် ပေးထားပါတယ်။
ဒါပေမဲ့ ရုရှားအနေနဲ့ ဂိုဒေါင်ထဲ ထည့်သိမ်းထားတဲ့ စစ်လက်နက် အဟောင်းတွေကို ပြန်ထုတ်ယူလာပြီး ယူကရိန်း စစ်မြေပြင်မှာ ရေရှည် ဆက်လက် သုံးစွဲဖို့တော့ ဖူဖူလုံလုံ ရှိလိမ့်မယ်လို့ CSISက ဆိုပါတယ်။ အဲဒီ စစ်လက်နက် အဟောင်းတွေက ခေတ်မမီတော့ဘူး ဆိုရင်တောင် စစ်ပွဲရဲ့ သက်တမ်းကို ဆွဲဆန့်ဖို့ လုံလောက်တဲ့ ဖျက်ဆီးအား၊ ပစ်အားမျိုး ရှိနေနိုင်ပါတယ်။
ရှေ့လာမယ့် လပိုင်းတွေအတွင်း ရုရှားတပ်တွေက စစ်အေးခေတ်လက်ကျန် စစ်လက်နက် အဟောင်းအနွမ်းတွေကို ရှေ့တန်း စစ်မြေပြင်ဆီ ယူထုတ်လာမယ် ဆိုရင်လည်း မထူးဆန်းကြောင်း၊ တစ်ဖက်မှာတော့ ဒီအခြေအနေကြောင့် ရုရှားဟာ နည်းပညာပိုင်း အရေးနိမ့်တဲ့ အခြေအနေ ရင်ဆိုင်ရနိုင်ကြောင်း CSISရဲ့ အစီရင်ခံစာမှာ ဖော်ပြထားပါတယ်။
အစောပိုင်းမှာ ကတည်းက ရုရှား စစ်သုံးရထားတွေဟာ စစ်အေးခေတ် အစောပိုင်းက အသုံးပြုခဲ့ဖူးတဲ့ တိုက်ပွဲဝင် တင့်ကားတွေကို ရှေ့တန်းစစ်မြေပြင်ဆီ ပို့ဆောင်နေတဲ့ ဓာတ်ပုံ မှတ်တမ်းတွေ ထွက်ပေါ်ခဲ့ဖူးပါတယ်။ ရုရှား အစိုးရကတော့ စစ်တပ်အတွက် ခေတ်မီ စစ်လက်နက် အသစ်တွေ ထုတ်လုပ်ဖို့ ရုန်းကန်နေရတယ်ဆိုတဲ့ ခန့်မှန်း ပြောဆိုမှုတွေကို အစဉ်တစိုက် ငြင်းဆန်ထားပါတယ်။
