ယာဉ်တစ်စီး ဖျက်ဆီးနိုင်ခဲ့ပြီး လက်နက်ငယ် ၆လက်နှင့် ကျည်အချို့ရဟု အသိပေး
ကရင်နီပြည်နယ် ဒီးမော့ဆိုမြို့နယ်နှင့် ဘောလခဲကြား၌ ယမန်နေ့ (ဧပြီ ၁၉ရက်)က တိုက်ပွဲဖြစ်ပွားခဲ့ပြီး စစ်ကောင်စီတပ်မှ ရှစ်ဦးသေဆုံးကာ တစ်ဦး အရှင်ဖမ်းမိခဲ့သည်ဟု ကရင်နီအမျိုးသားတိုးတက်ရေးပါတီ(KNPP) ဗဟို သတင်းပြန်ကြားရေးဌာနက ယနေ့ ထုတ်ပြန်သည်။
ယမန်နေ့ နေ့လည် ၁နာရီမှစ၍ စစ်ကောင်စီတပ် ခလရ(၈၀)နှင့် ကရင်နီ ပူးပေါင်းတပ်အကြား တိုက်ပွဲဖြစ်ခဲ့သည်ဟုဆိုသည်။ ကရင်နီတပ်မတော် (KA)နှင့် ကရင်နီ အမျိုးသားများကာကွယ်ရေးတပ်(KNDF) တပ်ရင်း (၂၁)တို့ ပူးပေါင်း တိုက်ခိုက်ခဲ့ခြင်းဖြစ်သည်။
“ခလရ ၈၀ က တပ်မ ၆၆ လက်အောက်ခံ။သူတို့တပ်က ဒီလ ပထမ ပတ်လောက်ကစပြီးဒီးမော့ဆိုအရှေ့ခြမ်းစစ်ဆင်ရေးထဲဝင်လာတာ။စကစ ရဲ့ ထပ်တိုးအင်အားပေါ့။အခုက သူတို့ စစ်ကြောင်းကိုဖြတ်တိုက်တာလို့ပြောလို့ရတယ်”ဟု KNDFတာဝန်ရှိသူက People’s Spring သို့ ပြောသည်။
အဆိုပါတိုက်ပွဲတွင် စစ်ကောင်စီတပ်မှ ရှစ်ဦးသေဆုံးခဲ့ပြီးတစ်ဦးကို အရှင်ဖမ်းမိခဲ့ကြောင်း ထုတ်ပြန်သည်။
ထို့ပြင် စစ်ကားတစ်စီး ဖျက်ဆီးနိုင်ခဲ့ပြီး လက်နက်ငယ် ၆လက်နှင့် ကျည်အချို့ သိမ်းဆည်းရရှိခဲ့ကြောင်း ဖော်ပြထားသည်။
ဒေါညေးခူဒေသတွင် ဧပြီ ၁၆ရက်မှစ၍ ကရင်နီပူးပေါင်းတပ်နှင့် စစ်ကောင်စီတပ်အကြား တိုက်ပွဲများ ပြင်းထန်ခဲ့ခြင်းဖြစ်သည်။ ဧပြီ ၁၆ရက်မှ ၁၈ရက်နေ့အတွင်း တိုက်ပွဲမှား၌ စစ်ကောင်စီတပ်က အနည်းဆုံး ၃၀ခန့်သေဆုံးခဲ့သည်ဟု ကရင်နီစစ်ဘက် တာဝန်ရှိသူတစ်ဦးက ပြောကြားထားပြီး လက်နက် ၂၀ခန့် သိမ်းဆည်းရရှိခဲ့သည်ဟုဆိုသည်။ ကရင်နီပူးပေါင်းတပ်ကလည်း ကျဆုံးသူအချို့ရှိခဲ့ပြီး ဒဏ်ရာရသူ ၁၀ဦးခန့်ရှိခဲ့သည်ဟုဆိုသည်။
ဒေါညေးခူနှင့် ဒေသချင်းစပ်ဆက်နေသည့် ဒေါတမကြီးရွာတွင်လည်း မတ်လအတွင်းက တိုက်ပွဲပြင်းထန်ခဲ့ရာ စစ်ကောင်စီတပ်က ၉၀ ကျော်သေဆုံးပြီး လက်နက်မျိုးစုံ ၄၂လက်ကျော် သိမ်းဆည်းရရှိခဲ့ကြောင်း KNDFက ထုတ်ပြန်ထားသည်။
