သမ္မတရာထူးရယူပြီး ရက် ၁၀၀ ပြည့် အဖြစ် ယနေ့ (ဇူလိုင်လ ၃၁ ရက်) စစ်အုပ်စု၏ ပြည်ထောင်စုလွှတ်တော်တွင် မိန့်ခွန်းပြောကြားရာ၌ အရပ်သားအရေခြုံစစ်ခေါင်းဆောင် ဦးမင်းအောင်လှိုင်က အာဆီယံ၏ မြန်မာနိုင်ငံဆိုင်ရာ ဘုံသဘောတူညီချက် (၅) ချက် (Five-Point Consensus) သည် အာဆီယံအဖွဲ့ဝင်နိုင်ငံအားလုံး၏ သဘောတူညီချက် မဟုတ်ကြောင်း ပြောဆိုလိုက်သည်။
“Five-Point Consensus က အာဆီယံနိုင်ငံအားလုံးရဲ့ Consensus မဟုတ်ဘူး။ အဲဒီအချိန်က အာဆီယံဥက္ကဋ္ဌ (ဘရူနိုင်း)ရဲ့ နောက်ဆက်တွဲ ထုတ်ပြန်ချက်ပဲဖြစ်တယ်” ဟု ဦးမင်းအောင်လှိုင်က ပြောသည်။
ထို့အပြင် အာဆီယံအဖွဲ့ဝင်နိုင်ငံအချို့သည် ၎င်း၏အစိုးရအပေါ်ကို ခွဲခြားဆက်ဆံမှုများ ပြုလုပ်နေကြောင်း စွပ်စွဲကာ “အာဆီယံအဖွဲ့ဝင်နိုင်ငံအချို့ရဲ့ ခွဲခြားဆက်ဆံတဲ့ သဘောထားတွေကို ကျွန်တော်တို့ သည်းခံခဲ့တယ်” ဟုလည်း ပြောဆိုခဲ့သည်။
ဘုံသဘောတူညီချက် (၅) ချက် အား ၂၀၂၁ ခုနှစ် ဧပြီလ ၂၄ ရက်က အင်ဒိုနီးရှားနိုင်ငံ ဂျကာတာမြို့၌ ကျင်းပသည့် အာဆီယံခေါင်းဆောင်များ အထူးအစည်းအဝေးတွင် သဘောတူခဲ့ခြင်းဖြစ်ပြီး၊ အာဏာသိမ်းပြီး သုံးလမပြည့်မီ အစည်းအဝေးသို့ ဦးမင်းအောင်လှိုင်ကိုယ်တိုင် တက်ရောက်ခဲ့သည်။ ထိုအစည်းအဝေးအပြီး ဘရူနိုင်း၏ အာဆီယံဥက္ကဋ္ဌအဖြစ် ထုတ်ပြန်ချက်တွင် အာဆီယံခေါင်းဆောင်များသည် အကြမ်းဖက်မှု ချက်ချင်းရပ်တန့်ရေး၊ သက်ဆိုင်သူအားလုံးနှင့် ဆွေးနွေးရေး၊ အာဆီယံ အထူးကိုယ်စားလှယ် ခန့်အပ်ရေး၊ လူသားချင်းစာနာမှုအကူအညီပေးရေးနှင့် အထူးကိုယ်စားလှယ်၏ မြန်မာနိုင်ငံခရီးစဉ်တို့ ပါဝင်သည့် အချက်ငါးချက်နှင့်ပတ်သက်သည့် သဘောတူညီမှု ရရှိခဲ့ကြောင်း ဖော်ပြထားသည်။
စစ်ကောင်စီသည် ဘုံသဘောတူညီချက် (၅) ချက် ကို အကောင်အထည်မဖော်နိုင်ခြင်းကြောင့် အာဆီယံက စစ်တပ်၏ နိုင်ငံရေးခန့်အပ်ခံ ကိုယ်စားလှယ်များကို ထိပ်သီးအစည်းအဝေးများနှင့် နိုင်ငံခြားရေးဝန်ကြီးများ အစည်းအဝေးများသို့ တက်ရောက်ခွင့် မပြုသည့် မူဝါဒကို ဆက်လက်ကျင့်သုံးလျက်ရှိသည်။ ထိုင်းနိုင်ငံက မြန်မာကို အာဆီယံ၏ ပုံမှန်အဖွဲ့ဝင်အဖြစ် ပြန်လည်လက်ခံရေးကို မကြာသေးမီက တွန်းအားပေးခဲ့သော်လည်း အာဆီယံသည် နောက်ဆုံးကျင်းပခဲ့သည့် နိုင်ငံခြားရေးဝန်ကြီးများ အစည်းအဝေးတွင် ယင်းမူဝါဒကို မပြောင်းလဲဘဲ ဆက်လက်ကျင့်သုံးခဲ့သည်။
