အာဏာသိမ်းစစ်တပ်နဲ့ ပူးပေါင်းတပ်ဖွဲ့တွေဟာ မြဝတီမြို့တောင်ပိုင်းကို ပြန်လည်ထိန်းချုပ်ဖို့ ထိုးစစ်အရှိန်မြှင့်နေပြီး လက်ရှိမှာ မဲကနယ်–ဖလူးလေးတောင်ခြေအထိ ရောက်ရှိနေတယ်လို့ မြေပြင်စစ်ရေးသတင်းရင်းမြစ်တွေက ပြောပါတယ်။ KNU ဘက်ကတော့ စစ်ကြောင်းကို BGF တပ်နယ် (၄) နဲ့ ခွဲထွက် DKBA အဖွဲ့တွေက လမ်းပြကူညီနေတယ်လို့ ဆိုပါတယ်။
KNLA ဦးဆောင်တဲ့ တော်လှန်ရေးပူးပေါင်းတပ်ဖွဲ့တွေက စစ်တပ်စစ်ကြောင်းကို ခုခံတိုက်ခိုက်နေပြီး နှစ်ဖက်တိုက်ပွဲတွေ ဆက်လက်ပြင်းထန်နေပါတယ်။ စစ်တပ်ဘက်ကလည်း ဒရုန်းနဲ့ တိုက်လေယာဉ်အသုံးပြုကာ လေကြောင်းတိုက်ခိုက်မှုတွေ ဆက်တိုက်ပြုလုပ်နေပြီး ဇူလိုင် ၂၈ ရက်က ဝါဆိုသင်္ကန်းကပ်ဖို့ ပြင်ဆင်နေတဲ့ ဘုန်းကြီးကျောင်းတစ်ကျောင်းကိုလည်း ဗုံးကြဲခဲ့တယ်လို့ KNU က ပြောပါတယ်။
မြန်မာ–ထိုင်းနယ်စပ်တလျှောက် တိုက်ပွဲပြင်းထန်နေမှုကြောင့် ထိုင်းဘက်ခြမ်းကျေးရွာတွေထဲအထိ ကျည်ဆန်နဲ့ လက်နက်ကြီးစတွေ ကျရောက်တာတွေ ရှိနေသလို ထိုင်းစစ်တပ်ကလည်း နယ်စပ်လုံခြုံရေးကို တိုးမြှင့်ဆောင်ရွက်နေပါတယ်။ စစ်တပ်ဟာ မြဝတီ–ဝေါ်လေလမ်းပိုင်းကို ပြန်လည်ထိန်းချုပ်နိုင်ဖို့ ကြိုးပမ်းနေတာကြောင့် နယ်စပ်ဒေသ စစ်ရေးအခြေအနေဟာ ဆက်လက်တင်းမာနေဆဲ ဖြစ်ပါတယ်။
ကိုလှိုင်း/ Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
