Azərbaycanda fəaliyyət göstərən 30 bankdan 17-si ötən il mənfəət vergisi ödəməyib.
Bunlar “Access Bank”, “AFB Bank”, “AGBank”, “Amrah Bank”, “Azərbaycan Beynəlxalq Bankı”, “Bank BTB”, “Bank of Baku”, “Bank Respublika”, “Express Bank”, “Günay Bank”, “Muğan Bank”, “NBC Bank”, “Nikoyl Bank”, Pakistan Milli Bankının Bakı filialı, “Rabitə Bank”, “Turan Bank” və “Unibank”dır.
Baxmayaraq ki, adı çəkilən banklardan 6-sı – “Azərbaycan Beynəlxalq Bankı”, “Bank BTB”, “Express Bank”, “Günay Bank”, “NBC Bank” və “Unibank” 2017-ci ili mənfəətlə başa vurub.
13 bank isə ötən il müxtəlif məbləğlərdə mənfəət vergisi ödəyib. Bu baxımdan ən yüksək göstərici “Kapital Bank”da (24,84 milyon manat), ən aşağı göstərici isə İran Milli Bankının Bakı filialında (257 min manat) qeydə alınıb.
7 bankın mənfəət vergisi ödəmələri azalıb
30 bankdan 7-nin ötənilki mənfəət vergisi ödəmələri əvvəlki illə müqayisədə çox olub.
Bunlar “Bank Avrasiya”, “Naxçıvan Bank”, “Xalq Bank”, “Bank Silk Vey”, “Kapital Bank”, “Atabank” və “Azərbaycan Sənaye Bankı”dır.
Ən yüksək dinamika “Bank Avrasiya”da (6,9 dəfə), ən aşağı dinamika isə “Azərbaycan Sənaye Bankı”nda (6,5%) qeydə alınıb.
7 bankın – “PAŞA Bank”, “Zıraat Bank Azərbaycan”, “Azər-Türk Bank”, “Access Bank”, “AFB Bank”, “NBC Bank” və Pakistan Milli Bankının Bakı filialında isə mənfəət vergisi ödəmələri azalıb. Ən çox azalma sonuncu 4 bankda (100%), ən az azalma isə “PAŞA Bank”da (10,3%) olub.
Qalan 16 bankın isə mənfəət vergisi ödəmələrinin dinamikasına hesablamaq mümkün olmayıb. Buna səbəb həmin bankların son 2 ildə vergi ödəməməsi və yaxud yalnız 2017-ci ildə vergi ödəməsidir.
Oxunub: 174