Milli Şuranın sədri Cəmil Həsənli
Bu gün daha 6 nəfər cəbhəçi həbs edilib: Ayaz Məhərrəmli, Nicat Abdullazadə, Baba Süleyman, Ceyhun Novruzov, Süleyman Məhərrəmov, Mahir Namazov. İlham Əliyevin iyulun 15-dəki nifrət çıxışından sonra həbs olunan cəbhəçilərin sayı 20 nəfərə yaxınlaşır. Onların yarıya qədəri AXCP-nin rəhbər orqanlarında təmsil olunan partiya funksyanerləridir. Bəlkə də mən bu sətirləri yazarkən daha kimlərsə “Banndotdelə” aparılır. Əli Kərimlinin Milli Məclisi tutması kimi sərsəm ittihamı “doğrultmaq” üçün cəbhəçilər “Bandotdeldə” qurulmuş modul elektrik stansiyasından keçirilirlər.
İlham Əliyev 12 nəfər yüksək rütbəli hərbçilərin şəhid olması ilə nəticələnmiş Tovuz “əməliyyatından” sonra “tarixi” atəşkəsi bərpa edən kimi ölkə daxilində xalqa qarşı, Xalq Cəbhəsinə qarşı savaş açdı. O, 15 iyulda Nazirlər Kabinetinin toplantısındakı çıxışı ilə daxili savaşa start verdi. İlham Əliyev açıq bəyan etdi ki, Milli Şura və Xalq Cəbhəsi ermənilərdən də pis düşməndirlər. Əslində bu savaşın anonsu mart ayının 19-da verilmişdi. Amma proseslərin gedişi onu təmin etmirdi. Tovuzdakı ağır itkilərdən sonra o, daxili savaşda qələbə qazanmaq qərarına gəldi. Milli Məclisin DTX tərəfindən “tutulması”, polis maşınlarının təxribatçı qruplar tərəfindən çevrilməsi “çevriliş” şousu yaratmağa hesablanmışdı.
İndi o, Türkmənbaşı Saparmuradın, Yurdbaşı İslam Karimovun taktikasını Azərbaycanda tətbiq edir. Karimovun Erk (Birik) hərəkatının başına gətirdiyiklərini Xalq Cəbhəsinin başına gətirir. Çünki İlham Əliyev də Karimov kimi bir neçə dəfə referendum keçirərək hakimiyyəti bir ailənin əlində saxlamağın natəmiz yollarını planlayır. Amma lap bu yaxınlarda Gülnara Karimova həbsxanadan bəyanat verdi ki, onun ölkədən oğurlayıb xarici banklarda, ofşor hesablarda yerləşdirdiyi 860 milyon dollar korrupsiya pullarını özbək xalqına qaytarmağa hazırdır.
Əliyevin cəbhəçiləri təqib etməsinin çox səbəbləri var. Lakin ən ümdəsi ölkədə böhranın dərinləşməsidir. Onun “optimist” açıqlamalarına baxmayaraq ölkə 2015-2016-cı illərin sarsıdıcı böhranından çıxa bilmədi.
Covid-19 Əliyev üçün göydəndüşmə olmuşdu. O, ölkəni iflasa gətirib çıxarmağını “təbii” fors-majorla əlaqələndirmək istəyirdi. Lakin Covid böhranının neft qiymətlərinin kəskin düşməsi fonunda baş verməsi yalnız kleptokratik rejimi deyil, ölkəni də çökürtdü. Covid-karantin, sosial-iqtisadi və idarəçilik böhranı ortadadır. Heç bir anti-böhran proqramı olmayan korrupsioner rejim böhranın önlənməsini Xalq Cəbhəsinin strukturlarını dağıtmaqda görür. Absurddur! 1990-cı ilin yanvarında Yazov da bu iddia ilə Bakı əməliyyatını keçirmişdi. Lakin ondan sonra AXC hakimiyyətə gəldi. Süni şəkildə nə vaxta qədər karantini uzadacaqlar. Divar qurtarmaq üzrədir. Ali baş komandan Əliyevin Cəbhə üzərində “qələbəsi” onun “pirr qələbəsi” ola bilər.
Ölkə çöküb. Bizim ölkəni öz yarıtmaz, korrupsiya və kleptokratiya siyasəti ilə Əliyev çökdürüb. SMS cərimələrin xalqın belinə yükləməklə büdcə doldurmaq olmaz. Aylarla evdə oturmağa məcbur edilmiş insanlara iş, çörək, minimum dolanışıq imkanı vermək lazımdır. Əliyev elə bilir “zəhmətkeşlərin” ona yazdığı təşəkkür məktubları nəyisə dəyişir. Halbuki, o, məktubların cümləsin həbs olunarkən kabinetindən rüşvət siyahıları, evindən dollar bağlamaları çıxan icra başçıları, digər korrupsiya zümrəsi yazdırır. Əliyev ölkəni xaricdəki və daxildəki öz korrupsiya ortaqları ilə birgə çökdürüb. Ali baş komandan kimi, prezident kimi o, ölkənin müdafiə xərclərin ailə ofşor hesablarına ötürüb, Rusiya ilə silah alverindən “otkat” alıb. Bütün bu rüsvayçı əməlləri Milli Şura və Xalq Cəbhəsi onun üzünə deyir. Korrupsiyanı bitirmək əvəzinə, o, Xalq Cəbhəsini bitirməyə qərar verib, cəbhə sədri Əli Kərimli ilə “haqq-hesab” çəkməyə qərar verib.
Nədir cəbhəçilərin günahı, Milli Şuranın suçu? Milli Şura və Xalq Cəbhəsi tələb edir ki, korrupsiya kimi natəmiz əməldən çəkin, 20 faiz torpaqları işğal altında olan ölkəni rüşvət və korrupsiya yuvasına çevirmə. Xalq Cəbhəsi tələb edir ki, tibbi sığortadan mərhum etdiyi xalqa bioloji böhran şəraitində normal sosial paket ver. Biz tələb edirik ki, 5 faiz işsizlik və 5 faiz yoxsulluq kimi saxta rəqəmləri bir tərəfə qoy millət əldən gedir gözünü aç real mənzərəni gör. Xalq Cəbhəsi Azərbaycan uşaqlarının haqq etdiyi uşaq pulunu vermək lazımdır. Xalq Cəbhəsi tələb edir ki, 117 min ailənin ünvanlı sosial yardımdan məhrum edilməsinin ağlabatan izahını vermək lazımdır. Xalq Cəbhəsi tələb edir ki, ölkənin müdafiə xərclərinin oğurlanması və Rusiya ilə silah müamiləsindən daldalanan “otkatın” hesabatın vermək lazımdır. İlham Əliyev isə bu məsələlərə aydınlıq gətirmək əvəzinə Xalq Cəbhəsini bitirməyə, Əli Kərimlini xarici pasportdan, kommunikasiya imkanından məhrum edib səsini start verir, 90 günün blokadasını qanunsuz həbslə tamamlamaq istəyir.
1933-cü ildə nasistlər reyxstaqı yandırıb öz əleyhdarlarını qanundankənar elan etdikləri kimi, bunlar da Milli Məclisi yandırıb Əli Kərimlini həbs etmək, Xalq Cəbhəsini qanundankənar elan etmək fikrinə düşüblər. Anlamaq istəmirlər ki, artıq bunlar Xalq Cəbhəsi ilə yox, xalqın müxalifəti ilə üz-üzə dayanıblar. Və elə bilərlər ki, Əli Kərimlini həbs etməklə, cəbhəçilərin kütləvi həbsi ilə, “Bandotdelin” işgəncə metodları ilə xalqın müxalifətindən yaxalarını qurtara biləcəklər. Su çanağı suda sınar. Necə Qaddafi sındı, necə Mubarak sındı, necə Mugabe sındı xalqın müxalifəti Əliyev rejimini də sındıracaq.