Milli Şuranın sədri Cəmil Həsənli
Şərqdə diktaturaya gedən yol diktatorun “sapoqlarını” yalamaqdan keçir. Bir dəstə yaltaq Məhəmməd Rza şahın, Səddam Hüseynin, Qəddafinin “sapoqların” yalaya-yalaya onları diktator etmişdilər. İndi Azərbaycanda da belə yalaqların sayı artıb. Son hadisələr ölkənin yalaq şəbəkəsinin tam mənzərəsini ortaya qoydu. Heç kimin yayınmasına, heç kimin daldalanmasına imkan vermədilər. Stalin demişkən “sosializm quruculuğu dərinləşdikcə sinfi mübarizə də kəskinləşir.” Kleptokratik rejim ölkənin içində və xaricində olan bütün yalaq şəbəkəsini səfərbər etmişdi. Qaragünlük belə kimsəni saxlamadı. Sən demə mirşahinlərin, eynullaların, raufların murdarladığı cəmiyyətdə “papaq” altında yalaqlar yatırmış. Yeri gəlmişkən İlham Əliyevin “sapoqlarını” yalamaq (bəziləri hətta bir az yuxarı da qalxdılar) prosesində onun cəmiyyətə sırımaq istədiyi bəzi “Troya atları” Xudayar bəyin dəyər-dəyməzinə satdığı Məhəmməd Həsən əminin ulağına çevrildilər.
Mənzərə o, qədər də ümidsiz deyil. Sən demə İlham Əliyev bu qədər “top-tüfənglə”, hədə, qoxu, təhdidlə cəmiyyəti sındıra bilməyib. Xalq Cəbhəsi və Milli Şuraya qarşı başlanmış quduz kampaniya nə qədər namuslu adamı ortaya çıxardı, bu rejimin murdar xislətinə qarşı nə qədər dəyərlərə tapınan adamlar mövqe qoydu ortaya. Washington Postun nəzarətsiz tiran adlandərdğı Əliyev müstəbidliyinə etiraz edən böyük bir dairə bu prosesdə vicdan testindən keçdi. Repressiyalara qarşı Azərbaycan ziyalılarının etiraz səsi, bir qrup müstəqil ədəbiyyat, söz, sənət adamlarının həyəcan zəngi, ayrı-ayrı rəy sahiblərinin, hüquq müdafiəçilərinin, namuslu peşə etikasına sədaqətli olan vəkilləri, qələmin müqəddəs vəzifəsini millətə xidmətdə görən jurnalistlərin, vətəndaş cəmiyyəti öncüllərinin, blogerlərin baş verənlərə səssiz qalmaması cəmiyyətin potensialının nəinki tükənmədiyin, əksinə, bu potensialın daha qabarıq ifadə olunduğu, seçim anında büdrəmədiyi, hətta açıq mövqe nümayişi müşahidə edildi. Son illərin ağır prosesində əldə edilmiş ən uğurlu nəticədir bu. Əslində, təkcə Bəxtiyar Hacıyevin baş verən proseslərə münasibətdə ilk gündən sərgilədiyi sağlam mövqe cəmiyyət üçün maraqlı bir örnəyə, milli dirilik örnəyinə çevrildi.
İyulun ortalarından başlayaraq cərəyan edən olayların və ona münasibətdə hakimiyyətin cəmiyyəti “hərəkətə” gətirmək cəhdləri, 40-dan artıq partiya liderinin “ali baş komandanın əmrinə hazırıq” təzimi nədənsə Qarabağ cəbhəsindən yan keçdi və əvəzində Xalq Cəbhəsinin 40-dan artıq vətənsevər, fədakar fəallarının, partiya rəhbərliyinə daxil olan şəxslərin şərlənərək həbsi ilə, həmin “ali baş komandanın” işgəncə laboratoriyasından keçirilməsi ilə nəticələndi. Tovuzdan Bakıya, oradan da Brüsselə və Los Angelese qədər uzanan müəmmanın, ritorikanın ən dəhşətli tərəfi hakimiyyətin Qarabağ mövzusunu spekulyasiya predmetinə çevirməsi oldu, başda general olmaqla 11 yüksək hərbçinin şəhid olmasını cəmiyyətə qələbə kimi təqdim etmək və xalqın hiddətin “bizim qələbəbizə” dəstək kimi ümumiləşdirmək kleptokratik rejimin sərsəmliyinin açıq ifadəsi idi. Ona görə bu müstəvidə bütün təbliğat kampaniyası Qarabağ kartı üzərində qurulmuş, insanların ülvi hisləəri “vətənşüvənlik” ritorikasına endirilmişdi. Əliyev rejiminin uzun müddət spekulyasiya predmetinə çevirdiyi “İslam radikalizmi” tezisi iflasa uğradıqdan sonra öz məqsədlərinə nail olmaq üçün “Qarabağ kartı” üzərində çirkli oyunlar qurması mənəvi düşkünlüyün ailə-klan projesi idi.
Son hadisələr göstərdi ki, anlaqlı və anlaqsız Əliyevin “vətən təəssübkeşliyinə” qoşulmuş böyük bir dairə necə də vicdansızcasına “Milli Maraqlar”, “Qarabağ”, “Dövlətçilik” istilahların istismar edir, bu kəlmələr arxasında gizlənir, öz natəmiz niyyətlərinə “vətənpərvərlik” donu geyindirməyə çalışırlar. Çoxları hətta nəzəri cəhətdən dövlətçiliklə hakimiyyətçilik (oxu əliyevçilik) arşında süni sədd çəkməklə özlərini sığortalamaq istəyir. Dövlətçilik başqa, hakimiyyət başqa deyib adamları səhv yola yönəldirlər. Bizdə dövlətçiliklə hakimiyyətçiliyin bir vəhdəti vardır və bu da nəzəri, hüquqi, siyasi və sosial baxımdan “əliyevçilik” deməkdir. Əliyev nəzarətdən çıxmış öz avtoritar, kleptokratik, korrupsioner mahiyyəti ilə artıq çoxdan sübut edib ki, “dövlət mənəm”!?
Amma nədəsə Əliyev öz həyat yoldaşını ölkənin birinci vitse-prezidenti təyin etməklə bu “dövlətçiliyin” anasını ağladanda, respublika dəyərlərini ələ salanda, hər dəfə konstitusiyanı referendum adı altında öz ailə maraqlarına uyğunlaşdıranda, Qarabağı deyil, korrupsiya pulları ilə Dubay mülklərini alanda, işğal altında olan əraziləri deyil, dünyanın ekzotik ofşor adalarını fəth edəndə, bu ölkənin halal pullarını çirkə çıxardıb Malta və London camaşırxanalarında “təmizə” çıxaranda bizim dövlətçilərin səsi çıxmırdı. Ərazisi işğal olunmuş ölkənin müdafiə xərcləri hakim ailə və hakim elita tərəfindən oğurlananda, silah alverindən “otqat” qatlayanda görünür dövlətçiliyimiz zərərdidə olmurmuş. Çox sağ olsun Sevinc xanım Osmanqızı ki, Əliyevlərin ailə-klan maraqlarına xidmət edən bu “dövlətçilik” nəzəriyyəsinin daşıı daş üstündə qoymadı.
Onu da etiraf etmək lazımdır ki, hökumət keçmiş ANS-in yolu ilə gedərək xeyli adamı öz natəmiz şəbəkəsinə cəlb edib ictimai rəyə sırıya bilmişmiş. Bu icazəli sandıq tulaları hakimiyyət daxilindən ötürülmüş mətbəx məlumatları ilə çoxlarını öz cazibələrinə sala bilmiş, “prinsipial” müxalifət görüntüsü yarada bilmişdi. Son hadisələr bir acı həqiqəti də ortaya qoydu ki, Əliyev rejimi içərisində xalqın qarşısına çıxarılası bircə nəfəri belə yoxdur. Keçmiş “qaradavoy” Ramil Usubovun iyulun 14-də meydana göndərilməsi fiaskoya uğradı. Əliyevin xalqın dəstəyinə belə “nəvazişlə” yanaşması, cəmiyyətə müxalifət adı ilə yerləşdirdiyi və artıq ulağa döndərdiyi “Troya atı”nı bu həssas məqamda minməsi məhz, bununla bağlıdır. Əlbəttə bu gün Cəbhə və Milli Şuraya qarşı aparılan quduz siyasət yalnız müxalifəti silməyə, onu məhv etməyə hesablanmayıb, həm də onların yerinə “yeni müxalifət” qoymaq projesin özündə ehtiva edir. Axı, İlham yalnız tiran, diktator, kleptokrat deyil, həm də “demokratdır” və o, “müxalifətsiz” yaşaya bilməz. Onun yeni iqtidar müxalifət konfiqurasiyası “öz müxalifətinin” yolunun təmizlənməkdən, gercək müxalifətin işgəncə laboratoriyasında məhvindən keçir. Bu məqsədlə o, Qarabağ cəbhəsində deyil, xalqın cəbhəsində son döyüşə girib.