Xəqani Cəfərli
Onu illər öncəsi tanıdım. Və ilk qənaətim də bu günə kimi dəyişmədi. Əksinə zamanla bu qənaətim daha da gücləndi.
2014-cü ilin noyabrında ədalətsiz bir məhkəmə hökmü ilə 7 il 6 ay müddətinə azadlıqdan məhrum edilən, 2016-cı ildə Ali Məhkəmə tərəfindən cəzası 6 ilə, qanunvericiliyə edilən dəyişikliklə bağlı isə 2017-ci ildə isə 5 ilə endirilən Asif Yusifli ötən ilin noyabrında ona verilən cəzanı tam şəkildə, necə deyərlər günə-gün çəkdikdən sonra azadlığana qovuşmuşdu. Azadlığa çıxdıqdan sonra bir neçə dəfə görüşüb, dərdləşmişdik. Bir dəfə də olsun beş il ədalətsizliklə azadlıqdan məhrum edilməsinə, ömrünün beş ilini həbsxanada keçirməsinə görə kimsənin ünvanına nifrət, qəzəb ifadə etdiyinin şahidi olmadım. Məruz qaldığı ədalətsizlik onda nifrət, qəzəb, intiqam hissi yaratmamışdı.
Bəşər tarixi məruz qaldığı ədalətsizliyə görə vətəninə, dövlətinə, doğma ailəsinə düşmən kəsilənlərin hekayəsi ilə doludur. Ancaq Asif ömürün beş ilini ədalətsiz hesab etdiyi məhkəmə hökümünə görə həbsxanada keçirməsinə görə kimsəyə düşmən olmamışdı. Azərbaycan ictimai mühitinin siyasətə intiqam məqsədlə gələnlərin meydan silamağa başladığı bir zamanda Asif Yusifli kimi şəxslərin siyasətdə varlığı iqtidarlı müxalifətli hər kəs üçün qənimət hesab olunmalıdır.
İllərlə müxalifət partiyasında fəaaliyyət göstərməsinin səbəbi özgürlüyə, hürriyyətə bütün qəlbi ilə bağlı olmasıdır. Onun davası vəzifə, hakimiyyət davası deyil. Asif Yusifli “Hürriyyət olan yerdə insanlıq da olur” fəlsəfəsinə ürəkdən inan, bunu həyatın mənasına çevirən azsaylı şəxslərdəndir.
Bir çoxlarının Qarabağ davasını biznesə çevirdiyi ölkədə sağlamlığını vətənin müdafiəsi yolunda itirmiş Asif Yusifli təvəzökarlığından qanuni və mənəvi haqqını da dilə gətirməyən gerçək bir vətənpərvərdir. Belə şəxslər cəmiyyətin gerçək fenomeniləridir.
Asif Yusifli iyulun 14-dən 15-nə keçən gecə Orduya dəstək yürüşündə iştirakdan sonra yenidən həbs olunub.
Buradan iqtidara səslənərək kerçək hürriyyət tərəfdarlarının həbsxanaya atılmasının siyasi meydanın qisas hissi ilə yaşayanların nəzarətinə keçməsinə səbəb ola biləcəyi ilə bağlı narahatlığımı ifadə edir, Asif Yusiflini və Orduya dəstək yürüşündə iştiraka görə həbs olunanları azad etməyə çağırıram.