Bu gün, iyulun 30-da Azərbaycan Xalq Cəbhəsi Partiyasının (AXCP) daha 5 fəalı, – Sabunçu rayon şöbəsinin üzvü Babək Muradov, Qaradağ rayon şöbəsinin üzvləri Elnur Cabbarlı, Feyruz Rəhimov, Abşeron rayon şöbəsinin üzvləri Elnur Quliyev və Müşfiq Quliyev saxlanılıb.
Bu barədə AXCP məlumat yayıb.
Məlumatda bildirilir ki, bundan öncə, iyulun 27-də bu partiyanın Sabunçu rayon şöbəsinin üzvləri Yaşar Kərimov və Emin Fərhadov da saxlanılıb.
Hazırda AXCP-nin son saxlanılan 7 fəalının taleyi məlum deyil.
AXCP-nin məlumatına görə, Azərbaycanın dövlət sərhədinin Tovuz rayonu istiqamətində döyüşlərdə iştirak edən Azərbaycan Ordusunu dəstəkləmək məqsədi ilə iyulun 14-də keçirilən aksiya zamanı yaranan insident faktı üzrə qaldırılmış cinayət işi üzrə AXCP-nin 45 nəfər fəalı həbs edilib.
“Onlardan 15 nəfərinə qarşı ağır ittihamlar irəli sürülüb. 10 nəfər hazırda inzibati həbsdədir, 10 nəfər şahid qismində dindirilərək sərbəst buraxılıb. AXCP-nin 10 üzvü isə öncədən siyasi məhbusdur. Beləliklə hazırda AXCP-nin 35 fəalı siyasi sifarişlə həbsədədir,” məlumatda qeyd edilir.
Amerikanın səsi