Elçin Məmməd öz həbsini yaydığı hesabatlara hakimiyyətin cavabı hesab edir
“Sumqayıt Gənclərinin Hüququ Maarifləndirilməsi” ictimai birliyinin prezidenti , hüquq müdafiəçisi Elçin Məmmədə qarşı açılmış cinayət işi üzrə Sumqayıt şəhər məhkəməsində hazırlıq iclası keçirilib. Hakim Pərviz Hacıyevin sədrliyi ilə baş tutan prosesdə hüquq müdafiəçisinin vəkili Fariz Namazlı vəsatətlər verib.
Vəkil Elçin Məmmədin cinayət prosesində iştirak edən şəxslərə təsir göstərmək , məhkəmədən gizlənmək, cinayət təqibi üzrə əhəmiyyət kəsb edən şəxslərə təsir göstərmək və ya saxtalaşdırmaq imkanlarının olmadığı səbəbindən onun barəsindəki həbs qətimkan tədbirinin dəyişdirilməsini istəyib.
Açılmış şinayət işi üzrə hüquq müdafiəçisinin özünü təqsirli bilməməsi , cinayət işi üzrə oğurlandığı iddia olunan əşyaların polis tərəfindən şikayətçiyə təqdim olunması, sonuncunun işə əlavə olunmuş ərizəsində Elçin Məmmədlə bağlı hər hansı şikayətinin olmamasını əsas göstərib.
Növbəti vəsatətdə isə vəkil bildirib ki, ofisdən tapılan patronlar odlu silahın komplekt hissəsi hesab edilə bilməz. Çünki silahın özü yoxdur və bu epizod üzrə cinayət işinə xitam verilməlidir. Fariz Namazlı bununla bağlı Avropa İnsan Haqqları məhkəməsinin Eynulla Fətullayevin işi üzrə qərarında göstərilənləri prisident kimi məhkəmənin nəzərinə çatdırıb.
Məhkəmədə çıxış edən Elçin Məmməd qeyd edib ki , məhkəmə baxışının normal gedişinə mane olmaqda maraqlı deyil , çünki onunla bağlı yaranmış vəziyyətdə ədalətin bərpasını istəyir.
Hüquq müdafiəçisi əlavə edib ki , cəmiyyətdəki nüfuzu , bu il keçirilmiş seçkilərdə deputatlığa namizəd olması və hüquq müdafiəçisi kimi fəailliyəti cəmiyyət üçün təhlükə yarada biləcək əməllərə yol verə bilməz.
Hakim hər iki vəsatəti təmin etməyib.
Məhkəmə baxışı avqustun 14-ə təyin edilib.
Xatırladaq ki , Elçin Məmməd bu ilin martında həbs edilib və ona qarşı Cinayət Məcəlləsinin 177-ci (oğurluq ) və 228-ci (qanunsuz silah saxlama) maddələri ilə cinayət işi açılıb. Hüquq müdafiəçisi ittihamları qəbul etmir , həbsini ölkədəki insan haqqlarının vəziyyəti ilə bağlı yaydığı tənqidi hesabatlara qarşı bəzi qurumların adekvat cavabı hesab edir.
Qeyd edək ki , bir sıra beynəlxalq və yerli hüquq müdafiə təşkilatları Elçin Məmmədin həbsinin sifarişli olduğunu bildirib və onu siyasi məhbus hesab edib.
azadliq.info