Milli Şuranın sədri Cəmil Həsənli
Mehdi Ibrahimovla bağlı baş verənlər əsl cinayətdir. Covid testi edilməmiş bir gənci virus yaymaqda ittiham edib bu maddə ilə cinayət işi açıblar, haqqında 3 aylıq həbs qəti imkan tədbiri seçiblər. Sonra da test ediləndə məlum olub ki, Mehdi ümumiyyətlə virus daşıyıcısı deyil. İttiham təsdiq edilməsə də, Mehdini evinə buraxmırlar. Onu tubdispanserə aparıb xəstə məhbusların içərisində saxlayırlar, sağlam adamın həyatı üçün ağır təhlükə yaradırlar. Mehdinin tubdispanserə salınması az əvvəl Aqil Hümbətovu ruhi xəstəxanaya məhkum etmək kimi bir şeydir. Hər ikisindən vaxtı ilə Sovet DTK namuslu adamlara qarşı istifadə edirdi.
Burada dəhşətli olan bilirsiniz nədir? Deməli bunlar pandemiya şəraitindən istifadə edib istənilən adamı virus yayma ittihamı ilə saxlaya, haqqında saxta cinayət işi aça bılərlər. Heç kəs bundan sığortalanmayıb. Mehdi Xalq Cəbhəsinin üzvü deyil, öz kasıbkarlığı ilə dolanan namuslu bir gəncdir. Onun nağıl kimi körpə bir qızı var. O, qızcığaz hər gün atasını gözləyir. Amma “öz üzərində nəzarəti itirmiş” İlham “əmisi” onun heç bir günah sahibi olmayan atasını saxta virus yaymaq ittihamı ilə həbs etdirib və cəza çəkmə yerində onu infeksiyaya yoluxdurur. Belə natəmiz əməlləri ilə İlham Əliyev yalnız böyüklərin deyil, uşaq pulundan məhrum etdiyi uşaqların da həyatını iztiraba düçar edir, bu körpələrə ağır sarsıntılar yaşadır.
Hakimiyyət nəinki öz əleyhdarlarına, ölkənin aparıcı müxalifət fəallarına, eyni zamanda onların müxalifətə aidiyyəti olmayan övladlarına və qohum-əqrəbasına qarşı da belə namussuz cinayət əməlindən istifadə edir. Hər kəsə aydındır ki, Mehdini atası Məmməd İbrahimə görə tutublar. Onun həbsindən 2 gün sonra atasını da daha ağır ittihamla saxladılar. Sən demə 14 iyul mitinq-yürüşü zamanı evində oturmuş Məmməd İbrahim xəyalən Milli Məclisə girib dövləti çevirirmiş. Sən demə Məmməd bəy ötən saxta həbsi zamanı azadlığa çıxmasına bir neçə saat qalmış yastığının altına qoyulmuş xəncərlə İlham Əliyevin dövlətini “çevirəcəkmiş”. Ölkə konstitusiyasını ələ salan, qanunları özləri kimi abırsızlaşdıran, hüququ gülünc günə qoyan necə utanmaz dövlət “kişilərimiz” var.