Amerikadan və Avropadan kifayət qədər ciddi siyasi çevrələr repressiyalara və işgəncələrə görə Azərbaycan məmurlarına qarşı sanksiyaların tətbiq edilməsi ilə bağlı çağırışlar gəlir. Xüsusilə son həbslər bu çağırışları daha da aktuallaşdırıb. AND Azərbaycanda çirkli pulların dövriyyəsindən tutmuş qanunsuz həbslərə və işgəncələrə görə sanksiya altına düşə biləcək məmurların mümkün siyahısını və əsaslandırmasını hazırlamağa cəhd edib. Belə təşəbbüslər yəqin ki, çox olacaq, amma görünən budur ki, işlər oraya doğru gedir.
Siyahı yarımçıq ola bilər, başqa təşəbbüslərlə onu tamamlamaq mümkündür.
***
Azərbaycan müstəqillik qazandıqdan sonra SSRİ dövründə baş verən siyasi təqiblər, həbslər, təzyiqlər və qətllər dayanmadı.
Bu proses 2003-cü ildə İlham Əliyevin Prezident seçilməsindən sonra daha da şiddətləndi.
2013-cü ildə baş verən Prezdident seçkilərindən sonra ölkədə jurnalistlər, siyasətçilər və fəallarla yanaşı qeyri-hökumət təşkilatı üzvlərinə qarşı da basqılar artdı.
2013-cü il seçkilərindəki insan haqları pozuntuları:
- Sərbəst toplaşmaq azadlığı
2013-cü ildə baş verən Prezident seçkilərindən əvvəl siyasi təqiblər və həbslər reallaşdı.
Seçki ili başladıqdan sonra Azərbaycanda siyasi azadlıqlar və ədalətli mühakimə hüququnun təmin olunması üzrə vəziyyəti Avropa Şurası Parlament Assambleyasının qış sessiyasında almaniyalı deputat Kristof Ştrasserin “Azərbaycanda siyasi məhbus məsələlərinin izlənilməsi” hesabatının müzakirəsi çərçivəsində aktuallıq qazandı. Bu hesabat üzrə qətnamə layihəsi 125 nəfər AŞPA üzvünün əleyhinə səsverməsi nəticəsində qəbul edilməsə də, sənəd siyasi azadlıqların durumuna dair beynəlxalq təşkilatların və ictimaiyyətin diqqətinə çəkdi. Təəssüf ki, Ştrasserin hazırladığı sənədin qəbul edilməməsi üçün diplomatik fəallıq nümayiş etdirən Azərbaycan hökuməti AŞPA-nın sözügedən sessiyasından sonra ölkədə siyasi təqiblərin dayandırmasına səylər göstərmədi. Əksinə prezident seçkisi ili başladıqdan sonra siyasi fəallara qarşı həbslər artdı.
23 yanvar 2013-cü ildə İsmayıllı rayonunda vətəndaşlar yerli hakimiyyətin idarəçiliyinə etiraz edərək kütləvi etiraz aksiyaları keçirdilər. Hadisə icra başçısının qohumu ilə yerli sakin arasında mübahisə zəminində başlasa da, sonradan yüzlərlə insanın qatıldığı iğtişaş nəticəsində icra hakmiyyətinin başçısı Nizami Ələkbərovun evi və ona məxsus olan otel yandırıldı. Bir neçə gün davam edən aksiyanın qarşısını daxili qoşun qüvvələri əməkdaşları aldı. Baş vermiş hadisə ilə bağlı İsmayıllıya Bakıdan hüquq müdafiəçiləri, jurnalistlər və siyasi fəallar səfər edərək, olayları araşdırmağa cəhd etdilər. Bu hadisələrlə bağlı 12 nəfər şəxs, o cümlədən Respublikaçı Alternativ (REAL) Hərəkatının (red- hazırda siyasi partiya) sədri, prezident seçkilərində namizədliyini irəli sürəcəyini elan etmiş İlqar Məmmədov və Müsavat Partiyası başqanın müavini Tofiq Yaqublu həbs edildi.
Hər iki şəxs ictimai qaydanın pozulmasına səbəb olan hərəkətləri təşkil etmə, bu cür hərəkətlərdə fəal iştirak etmə və hakimiyyət nümayəndəsinə qarşı müqavimət göstərmə və ya zor tətbiq etməkdə ittiham edilsələr də, İsmayıllıya hadisədən 2 gün sonra səfər etmişdilər.
Göründüyü kimi burada sərbəst toplaşmaq azadlığı pozuldu. Bundan əlavə bu azadlığı tələb edən şəxslər və siyasətçilər də həbs olundular.
Hadisələr bununla da yekunlaşmadı.
2013-cü il martın 7-də Milli Təhlükəsizlik Nazirliyi və Baş Prokurorluğun əməkdaşlarının birgə həyata keçirdikləri axtarış tədbirləri nəticəsində, əsasən gənc fəallardan ibarət olan NİDA vətəndaş hərəkatının 3 üzvü – Məmməd Əzizov, Bəxtiyar Quliyev, Şahin Novruzlu narkotik və qanunsuz silah əldə etmək və daşımaq maddəsi ilə ittiham edilərək həbs edildilər.
Sonradan Hərakatın idarə heyətinin 4 üzvü – Rəşad Həsənov, Rəşadət Axundov, Üzeyir Məmmədli və Zaur Qurbanlı da eyni ittihamlar üzrə həbs edildilər.
2013-cü ilin sentyabrın 12-də NiDA hərəkatının 7 üzvünə və Azad Gənclik təşkilatının üzvü İlkin Rüstəmzadəyə Cinayət Məcəlləsinin 220. 1 (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) maddəsi ilə əlavə ittiham elan edildi. Yetərincə ağır cinayət məsuliyyəti yaradan bu ittihama etiraz əlaməti olaraq, həbsdə olan gənclərdən Rəşadət Axundovun babası etiraz əlaməti olaraq damarlarını kəsərək, intihar etdi.
Bu gənclər daima hökuməti tənqid edən açıqlamalar verir və aksiyalar keçirirdilər.
Göründüyü kimi burada da əsasən sərbəst toplaşmaq azadlığı pozulurdu. Hakimiyyət əlində gücdən istifadə edərək onu tənqid edən gəncləri və fəalları həbs edir və insan haqlarına hörmət etmirdi.
- Söz azadlığı
2010-cu parlament seçkilərindən sonra jurnalistlər həbsləri daha da artıb. “Xural” qəzetinin baş redaktoru Əvəz Zeynallı, müstəqil jurnalist Fərəməz Novruzoğlu, müstəqil jurnalist Fuad Hüseynov, internet portalının redaktoru Araz Quliyev, “Talışi Sədo” qəzetinin baş redaktoru Hilal Məmmədov, www.azadxeber.org saytının baş redaktoru Nicat Əliyev, “Yeni Müsavat” qəzetinin yazarı Tofiq Yaqublu, “Nota Bene” qəzetinin və “Psnota.com” xəbər saytının baş redaktoru Sərdar Əlibəyli şübhəli narkotik vasitələrin saxlanması, xuliqanlıq, dini, irqi ayrıseçkilik salma, ictimai qaydanın pozulması, hakimiyyət nümayəndəsinə müqavimət ittihamları ilə həbs ediliblər. “Gündəm Xəbər” qəzetinin təsisçisi Şirin Cəfərli, Qubadakı regional “Xəyal” televiziyasının əməkdaşları Vüqar Qonaqov və Zaur Quliyevə isə şərti azadlıqdan məhrum ediliblər.
2012-ci ilin martında Azadlıq radiosunun əməkdaşı, araşdırmaçı jurnalist Xədicə İsmayılova şantaj məktubu alıb və bundan sonra onun özəl həyatı haqqında video yayılıb. Jurnalist bunu ölkə prezidentinin ailə üzvlərinin biznes layihələrini üzə çıxaran araşdırmaları ilə əlaqələndirir. İsmayilova İlham Əliyevin və onun ailə üzvlərinin gizli biznesi və şirkətləri haqda bir neçə araşdırmanın həmmüəllifidir. Seçki ərəfəsində hakimiyyət mediasında İsmayılovaya qarşı mənəvi təzyiq kampaniyası daha da artıb.
2013-cü il ərzində jurnalistlərə qarşı basqılar artaraq, məhkəmə iddiaların sayı 36-ya yüksəlib. Həmin iddialarla mediadan 4,5 milyon manat cərimə tələb olunub. Təkcə “Azadlıq” və “Yeni Müsavat” qəzetləri 18 dəfə məhkəməyə çəkiliblər. İki qəzet 125 min manatdan artıq cərimə edilib. Son 6 ay ərzində 4 jurnalistin yazılarına görə həbs olunması tələb olunub, ancaq məhkəmələr həmin şikayətləri təmin etməyiblər. 2013-cü ilin ilk yarısında jurnalistlər ən azı 47 dəfə basqıya məruz qalıblar. Jurnalistlər peşə fəaliyyətlərinə görə döyülmə, qanunsuz saxlama, peşə alətlərinin (diktofon, video-foto kamera) əllərindən alınması, lentə alınan materialların məhv edilməsi, telefonla ölümlə hədələnmə ilə üzləşiblər. Basqılara məruz qalan jurnalistlərin böyük hissəsi tənqidçi xəbər mediasının nümayəndələri olublar.
2014-cü ildə baş verən insan haqları pozuntuları
Human Rights Watch İnsan haqları təşkilatının 2015-cü il üzrə Dünya Hesabatının Azərbaycana dair hissəsində deyilir:
“2014-cü il ərzində hökumət “ən azı 33 hüquq müdafiəçisini, siyasi və ictimai fəalı, jurnalisti və bloqqeri siyasi motivli ittihamlar əsasında” həbs edib, bəzi fəallar ölkəni tərk etməyə və ya gizlənməyə məcbur olub”.
2013-cü ilin dekabr ayında Anar Məmədli, 2014-cü il ərzində Azərbaycanın nüfuzlu insan haqları müdafiəçiləri olan Leyla Yunus, İntiqam Əliyev, Arif Yunus və Rəsul Cəfərov həbs olunublar.
Bu repressiv addımlar istiqamətində QHT-lər barəsində cinayət işi açılıb.
Sözügedən şəxslər 2014-cü ilin müxtəlif vaxtlarında bu iş çərçivəsində fərqli ittihamlarla həbs olunublar.
Amma əsasən hər birində eyni maddə daha çox önə çıxıb. Yəni QHT-lərin maliyyələşdirilməsi.
Hüquq müdafiəçilərinin hamısının bank hesabları dondurulub və istintaqa cəlb olunublar. Bəzilərinin ölkədən çıxışına qadağa qoyulub (vəkil Əsabəli Mustafayev, hüquqşünas Ənnağı Hacıbəyli).
2014-cü ilin avqust ayında AXCP sədrinin müavini, Azadlıq qəzetinin redaktoru və Azərbaycan Saatı televiziya verilişinin əməkdaşı Seymur Həzi qondarma ittihamla saxlanılıb.
Belə ki, günorta saatlarında tanımadığı şəxs Seymur Həziyə hücum edib.
Hadisəyə polis müdaxilə edib və Seymur Həzini saxlayıb.
Saxlanılmış journalist ona qarşı xuliqanlıq maddəsilə irəli sürülən ittihamı qəbul etməyib.
Öz həbsinin ictimai fəaliyyətlə bağlı olduğunu hesab edən jurnalist Ceyranbatan qəsəbəsində ona yaxınlaşıb sosial şəbəkədə göndərdiyi mesaja cavab verməməsinin səbəbini soruşan şəxsin hücumuna məruz qaldılğını bildirib.
Hadisə ilə bağlı Abşeron Rayon Polis Şöbəsinin istintaq bölməsində Cinayət Məcəlləsinin 221.3-cü (Xuliqanlıq, silah qismində istifadə edilən əşyaları tətbiq etməklə törədildikdə) maddəsi ilə cinayət işi başlanıb.
29 yanvar 2015-ci ildə isə xuliqanlıqda ittiham edilən jurnalist Seymur Həzi Abşeron rayon məhkəməsinin hörmü ilə beş il müddətinə azadlıqdan məhrum edilib.
2014-cü ilin dekabr ayının 5-də araşdırmaçı jurnalist, “Azadlıq” radiosunun əməkdaşı Xədicə İsmayılın məhkəməsi keçirilib. O, Səbail rayon məhkəməsinin qərarı ilə Xədicə İsmayıl barəsində 2 aylıq həbs-qətimkan tədbiri seçilib.
Hakim Elşad Şamayevin sədrliyiylə keçirilən prosesdə Xədicə İsmayıl həbsinin qanunsuz olduğunu bildirib.
Xədicə İsmayıla qarşı CM-nin 125-ci maddəsi (özünüöldürmə həddinə çatdırma) ilə ittiham irəli sürülüb. Ona qarşı bu iddianı “Azadlıq” radiosunun və “Meydan TV”nin keçmiş əməkdaşı Tural Mustafayev qaldırıb.
İstintaq belə qənaətə gəlib ki, Xədicə İsmayıl Tural Mustafayevi özünü öldürmə həddinə çatdırıb. Tural Mustafayev bu il oktyabrın 21-də Dənizkənarı bulvarda intihar etmək məqsədi ilə siçan dərmanı içib. Daha sonra ağır vəziyyətdə xəstəxanaya aparılıb.
Jurnalist Nərimanov rayon Polis İdarəsinin Müvəqqəti Saxlanma Təcridxanasına aparılıb, dekabrın 6-da Kürdəxanı İstintaq Təcridxanasına köçürüləcək.
Fevralın 13-də isə ona qarşı daha 4 maddə ilə – cinayyət məcəlləsinin (CM) 179.3.2 (mənimsəmə və israf etmə – külli miqdarda törədildikdə), 192.2.2 (qanunsuz sahibkarlıq), 213.1 (vergi ödəməkdən yayınma) və 308.2-ci (vəzifə səlahiyyətlərindən sui istifadə) maddələri ilə yeni ittihamlar elan edilib. Fevralın 24-də bütün ittihamlar bir icraatda birləşdirilib.
Xədicə İsmayıl bu ittihamları rədd edərək, həbsini sifariş sayıb. Müxtəlif insan hüquqları təşkilatları və AzadlıqRadiosunun rəhbərliyi bəyan edib ki, Xədicənin həbsi onun ölkə məmurlarının gizli biznesi haqda araşdırmalarına görə hakimiyyətin qisasıdır.
2015-ci ilin sentyabr ayının 1-də Bakı Ağır Cinayətlər Məhkəməsinin hökmü ilə araşdırmaçı-jurnalist Xədicə İsmayıl 7 il 6 ay müddətinə azadlıqdan məhrum edilib. Bundan başqa o, 3 il müddətinə vəzifə tutmaq hüququndan məhrum edilib. 25 may 2016-cı ildə Ali Məhkəmənin qərarı ilə hökm dəyişdirilib və Xədicə İsmayılın cəzası 3 il 6 ay müddətinə şərti cəza ilə əvəz olunub.
2015-ci ildə baş verən insan haqları pozuntuları
Parlament seçkiləri və seçki hüquqlarının pozulması
1 noyabr 2015-ci il Milli Məclisə seçkilər ərəfəsində əvvəllər keçirilmiş seçkilərdən sonra siyasi hüquqlar sahəsində yaranmış böhran aradan qalxmayıb.
6 noyabr 2005-ci ildən sonra ölkədə keçirilən seçkilərdə müxalif siyasi qüvvələrin iştirakı məhdudlaşdırılaraq, seçkilərdə iştirakları məqsədli şəkildə zəiflədilib.
2015-ci ildə keçirilən Milli Məclisə seçkilərdə bütün muxalifət partiyaları fəal iştirak etsələr də, nəticələr saxtalaşdırılaraq müxalifətin parlamentdə təmsilçiliyinə imkan verilməyib.
2013-cü il prezident seçkilərində əsas müxalif partiyalar, QHT-lər və fəalların da təmsil olunduğu Milli Şura seçkilərdə vahid namizədlə iştirak edib. Lakin seçkilər kütləvi şəkildə saxtalaşıdırılıb. Seçkidən sonra ATƏT DTŞHB seçki ilə bağlı mənfi qiymət verib. Prezident seçkilərindən sonra ölkədə qərblə əməkdaşlıqda meylli olan QHT-lərə və fəallara qarşı basqılar şiddətlənib. 20-dən artıq QHT-yə qarşı saxta ittihamlarla cinayət işi açılıb. Hakimiyyəti tənqid edən hüquq müdafiəçiləri həbs edilib və ya ölkəni tərk etməyə məcbur edilib. 2015-ci ilin sentyabr ayının 30-da AXCP sədrinin müşaviri Məmməd İbrahimə qarşı xuliqanlıqla bağlı maddə üzrə ittiham irəli sürülüb və o, həbs edilib.
1 noyabr 2015-cu ildə keçiriləcək Milli Məclisə seçkilər öncəsi söz və mətbuat azadlığının vəziyyətində müsbətə doğru dəyişikliklər baş verməyib, əksinə azad fikirə qarşı basqılar çoxalıb.
2013-cü il prezident seçikisindən sonra ifadə azadlığına qarşı basqılar şiddətlənib. Xeyli sayda jurnalist, blogger və onların qohumları həbs olunub. Bir çoxlarının qohumları idən çıxarılıb. Bir sıra müstəqil KİV öz fəaliyyətini dayandırmaq məcburiyyətində qalıb.
Demokratik Təşəbbüslər İnstitutu (DTİ) 1 noyabr Milli Məclisə seçkilər ərəfəsində mətbuat monitorinqinin nəticələrini açıqlayıb. Hesabata əsasən bildirilir ki, Azərbaycan telekanallarında alternativ fikir yoxdur.
Sentyabrın 17-də “Meydan TV” ilə əməkdaşlıq edən Şirin Abbasov Baş Mütəşəkkil Cinayətkarlıqla Mübarizə İdarəsi tərəfindən saxlanıldan sonra, ona 30 sutka azadlıqdan məhrumetmə cəzası verilib. Sentyabrın 20-də “Meydan TV”-nin daha 3 əməkdaşı DİN Baş Mütəşəkkil Cinayətkarlıqla Mübarizə İdarəsinə aparılıblar.
Sentyabrın 28-də jurnalist İslam Şıxəli Baş Prokurorluğunun Ağır Cinayətlər üzrə İstintaq İdarəsində dindirilib. Bir gün əvvəl onun kirayə qaldığı mənzildə axtarış aparılıb və onun şəxsi əşyaları müsadirə edilib.
İnanclılara qarşı həbs dalğası
2015-ci ilin noyabr ayının 5-də Müsəlman Birliyi Hərəkatının İdarə Heyətinin sədri Elçin Qasımlı yaşadığı evin qarşısında (Maştağa qəsəbəsi) mülki geyimli polislər tərəfindən saxlanıldı.
Hadisə axşam saatlarında baş verdiyi üçün çox sayda insan Sabunçu Rayon Polis İdarəsinin qarşısında toplaşmağa və Elçin Qasımlının həbsinin səbəbini aydınlaşdırmağa çalışırdılar.
Polis etiraza gələnlərə qarşı sonradan güc tətbiq etməyə başladı.
Bununla da onlarla insan saxlanılaraq Polis İdarəsinə aparıldı.
Sonradan bəziləri azadlığa buraxılsalar da 6 nəfər barəsində sutkalıq inzibati həbs cəzaları verildi.
Sonradan aşağıda qeyd edəcəyimiz şəxslər müxtəlif illər müddətində həbs olundular:
1. Rzayev Sahil Xalid oğlu 6 il 5 ay 15 gün
2. Vəliyev Niftəli Əşrəf oğlu 5 il 11 ay 10 gün
3. Əliyev Anar Yusif oğlu 5 il 11 ay
4. Bünyadov Elvin Hatif oğlu 6 il 1 ay 15 gün
5. Əhmədov Lətif Süleyman oğlu-5 il 11 ay 20 gün
6. Osmanov Teymur Adilxan oğlu 5 il 11 ay 15 gün azadlıqdan məhrum ediliblər.
26 noyabar 2015-ci il tarixində Baş Mütəşəkkil Cinayətkarlıqla Mübarizə İdarəsinin xüsusi təyinatlı polisləri Bakının Nardaran qəsəbəsində əməliyyat keçirdi.
Əməliyyat nəticəsində Müsəlman Birliyi Hərəkatının sədri Taleh Bağırzadə də daxil olmaqla 17 nəfər saxlanıldı.
Polis əməliyyat zamanı xüsusi qəddarlıq etdi.
Belə ki, 4 nəfər inanclı şəxs (Sarvan Səfərov, Fərail Bünyadov, Rəfael Bünyadov və Əkbər Babayev) polis tərəfindən öldürülüb.
Taleh Bağırzadə məhkəmə iclaslarınını birində ifadə verərkən vurğulayıb ki, polis əməliyyatçısı Şahlar Cəfərov xüsusi amansızlıqla saxlanılan Fərail Bünyadovu əməliyyatçıların maşınında onun gözləri qarşısında döyərək öldürüb.
Bundan əlavə əməliyyat zamanı 2 nəfər polis işçisi də öldürülüb (Vüqar Nəsibov, İsmayıl Tağıyev).
Lakin keçirilən məhkəmə iclaslarında polislərin kimlər tərəfindən öldürüldüyü faktiki olaraq sübut olunmadı və istintaq orqanının ittihamları faktiki olaraq öz təsdiqini tapmadı.
Polis və təhlükəsizlik orqanları 26 noyabr əməliyyatı da daxil olmaqla həbs olunanlara müxtəlif illər müddətinə azadlıqdan məhrum etdi.
Sabunçu rayon məhkəməsində haqqında məhkəmə qərarı çıxarılmış Nardaran kənd sakinləri 1 il 6 aydan, 2 il 6 aya kimi azadlıqdan məhrum ediliblər:
Onların siyahısını təqdim edirik;
1. Rəhimov Nohbala Bəhrəm oğlu- 1 il, 6 ay (Nardarandakı Rəhimə xanım ziyarətgahının Hüseyniyyə məscidinin axundu)
2. Nəbizadə Urfan Fəyyaz oğlu- 2 il, 6 ay
3. Nəbizadə Hüseynbala Məmmədəli oğlu- 2 il, 6 ay
4. Zəkiyev Zahid Faiq oğlu- 2 il
5. Babayev Razi Abbasəli oğlu- 2 il
6. Əlizadə Vasif Vaqif oğlu- 2 il, 6 ay.
7. Rüstəmov Əlizöhrab Əmirhüseyn oğlu- 2 il, 6 ay.
8. Məmmədov İntiqam Həmdi oğlu -2 il 6 ay
9. Qasımov Əliağa Mahmud oğlu- 2 il, 6 ay
10. Bünyatov Rasim Sərvər oğlu- 2 il, 6 ay
11. Ağarzayev Mübariz Hasir oğlu- 2 il.
12. Ağayev Seyyidəli Ağakərim oğlu- 2 il, 6 ay.
13. Əliyev Əli İsməli oğlu- 4 il.
14. Qurbanov Ələkbər Tofik oğlu- 2 il, 6 ay
15. Cabbarov Hilal Babaəli oğlu- 2 il, 6 ay
16. Cəbrayılov Ağasəlim Salman oğlu- 2 il
17. Nuriyev Akif Arif oğlu – 2 il, 6 ay
18. Əliyev Sahib Hüseynağa oğlu- 2 il
19. Quliyev Rahil Qulməmməd oğlu- 2 il, 6 ay
20. Tağıyev Savanşir Məlik oğlu- 2 il, 6 ay
21. Quliyev Həsən Əhməd oğlu- 1 il, 10 ay
22. Həsənov Ələsgər Qəzənfər oğlu- 1 il, 6 ay
23. Qədirov Nadir Əbdülağa oğlu- 2 il, 6 ay
24. Alxasov Vidadi Şirinbala oğlu- 2 il,6 ay
25.Quliyev Məmmədhənifə Əbdülrəhman oğlu- 2 il, 6 ay
26. Şahbazov Atabala Şahbaz oğlu- 2 il, 6 ay
26 noyabr Nardaran hadisələrindən sonra da həbslər davam edib. Bakıda və regionlarda MBH-nın tərəfarları hesab olunan, eləcə də hakimiyyətin uzun müddət nəzarət altında saxladığı bir çox dindar şəxslər həbs olunub:
1. Ağayev Elman Seydəmir oğlu (29 noyabr 2015- ci ildə Lənkəranda həbs olunub)
2. Aslanov Seymur Tərlan oğlu
3. Babayev Mötəbər Qılman oğlu
4. Cabbarov Elnur Nazim oğlu
5. Əliyev Cabir Sabir oğlu
6. Həbibov Sahib Firudin oğlu
7. Həsənov Elxan Heydər oğlu
8. Hüseynov Əli Hümət oğlu
9. İbrahimov Mübariz Eyyub oğlu (01 dekabr 2015- ci ildə Gəncədə həbs olunub)
10. İsmayılov Ruzi Xaliq oğlu
11. Mikayılov Zülfüqar Sədrəddin oğlu
12. Seyfullayev Ramil Suliddin oğlu
13. Yəhyayev Ağa-Əli Eldar oğlu
14. Şahbazov Əli Atabala oğlu
15. Məmmədov Həsən Məmməd oğlu
16. Bünyatov Eldar Əliağa oğlu
17. Quliyev Mehman Əbülfəz oğlu
18. Məmmədov Mehman Balahüseyn oğlu.
19. Əliyev Əmirəli İsmayıl oğlu
20. H.Əli Gülhüseyn oğlu
21. Bəhramov Nahid Nəsib oğlu (Cəbrayıl sakini, 23 dekabr 2015 ci ildə həbs olunub)