Milli Şuranın sədri Cəmil Həsənli
Deməli iki gün əvvəl Bakının Nəsimi rayon Məhkəməsinin hakimi Ramin Xəlilovun sədrliyi ilə Azərbaycan Xalq Cəbhəsi Partiyasının (AXCP) Rəyasət Heyətinin üzvü Məmməd İbrahim barəsində 4 aylıq həbs qətimkan tədbiri seçilib. 14-15 iyul mitinq-yürüşü olan axşam evindən kənara bircə addım belə atmayan Məmməd İbrahim özgə əmlakına ziyan vurulma, ictimai qaydanın pozulma, hakimiyyət nümayəndəsinə tabe olmama, Azərbaycan Respublikasının Konstitusiyasına zidd olaraq hakimiyyətin zorla ələ keçirilməsi, dövlətin konstitusiya quruluşunun zorla dəyişdirilməsi ittihamı ilə təqsirli bilinib barəsində 4 aylıq həbs qəti imkan tədbiri seçilmişdir.
Möcüzədir vallah, adam evində otura-otura necə özgə əmlakına ziyan vurub, ictimai qaydanın pozub, hakimiyyət nümayəndəsinə tabe olmayıb, hakimiyyətin necə zorla ələ keçirilməsinə və dövlətin konstitusiya quruluşunun zorla dəyişdirilməsinə cəhd edib. Sənin hakim başın batsın. Həmin axşam evindən kənara bir addım belə atmayan adam haqqında belə hökmü necə çıxarmısan? Bu Məmməd İbrahimin 3-cü, ya 4-cü həbsidir. Sonuncu dəfə onun həbsdən çıxmasına bir necə saat qalmış yastığının altına “xəncər” qoymuşdular. Adam həbsdə xəncəri neynəməli idi? Bu xəncəri “nazorlardan” başqa quşun belə səkə bilmədiyi cəzaçəkmə müəssisəsinə kim keçirə bilərdi?
Hər nə qədər qurama, saxta, qərəzli olsa da onda xəncər əşyayi-dəlil kimi ortada idi. Buna istinadən Məmməd İbrahimin azadlığa çıxmasın daha 6 ay uzada bilmişdilər. İndi axı bircə dənə dəlil yoxdur ortada. Vəkilin iştirakı olmadan Məmməd bəyin evində öz muzdlu hal şahidlərinin iştirakı ilə axtarış aparıblar. Görünür ssenarinin tərkib hissəsi olan “dövlət çevrilişinin” plan və prospektini bu axtarış zamanı onun evindən “tapıblar”.
Bu dəfə Məmməd İbrahim 37-ci il qaydalarına uyğun olaraq ailəvi həbs ediliblər. Oğlu Mehdi özündən əvvəl həbs edilmişdi. Onu saxlamağa ayrı bir maddə tapa bilmədikləri üçün test edilməmiş adama qarşı virus yayma saxta ittihamı elan edilmişdi. Əliyev hüququn başına belə daş salıb, onu belə gülünc vəziyyətə salıb.
İndi bütün ölkə İlham Əliyevin yeni “hüquq təcavüzünün” əsirinə çevrilib. Dəfələrlə demişəm DİN və digər hüquq mühafizə orqanları Konstitusyon nəzarətdən çıxıb, ailə-klan hakimiyyətinin, korrupsiya içində boğulan kleptokrat rejimin keşikçisinə çevrilib. Məmməd İbrahim kimi fədakar vətən keşikçilərinin üzərinə 4 saxta maddənin qoyulması “Washington Post” yazdığı kimi “nəzarətdən kənar” qalmış İlham Əliyev kimi tiranın “hüquqi təcavüzünün” və “hüquqa təcavüzünün” aydın ifadəsidir.