Milli Şuranın sədri Cəmil Həsənli
Fuad Qəhrəmanlı haqqında həyəcanlı xəbərlər gəlir. Prokurorluğun ağır cinayətlər idarəsində və “Bandotdeldə” ona ölümcül işgəncələr verilir. Doğrusu, adamlara işgəncə verilməsi Əliyevin “Bandotdelinin” peşə kodeksidir. Dövlət adına ittihamı müdafiə edən Prokurorluğun ağır cinayətlər idarəsinin işgəncə verilməsi kimi ağır cinayətə qurşanması dövlət adına həqarət, daha dəqiq desək dövləti rəzil etmək cəhdidir.
Alınan xəbərlərdə göstərilir ki, Fuad Qəhrəmanlı Xalq Cəbhəsi sədri Əli Kərimliyə qarşı Prokurorluğun ağır cinayətlər idarəsində əvvəlcədən hazırlanan və imza üçün ona təqdim edilən ifadəni təsdiq etmədiyi üçün ona bu zülm verilir. Prokurorluq orqanlarında ona verilən işgəncədən adam ölümcül hala salınıb və insan bədəni üzərində bu anti-insani əməllərdən sonra Fuad bəyi ixtisaslaşdırılmış işgəncə orqanı olan “Bandotdelə” gətiriblər.
İçəridən verilən məlumata görə Əliyevin işgəncə idarəsində Fuad Qəhrəmanlı huşun itirib, təzyiqi kəskin şəkildə aşağı düşüb və hətta onu öldü biliblər. Əslində, Fuad bəyin dəhşətli işgəncə altında həyatını itirdiyi və yaxud nəfəsinin gedib gəldiyi məlum deyil. Ombustman idarəsinin bir bosmanı vəkil Bəhruz Bayramova onun sağ olduğun deyib. Amma işgəncə altında həyatını itirən Mehman Qələndərov gecə ikən dəfn olundandan sonra da dövlət orqanları onun sağ olduğu haqqında yalan məlumatlar yayırdı. Nə qədər ki, Fuad bəy vəkili, yaxın qohumları, etibarlı hüquq müdafiəçisi ilə görüşməyib, onun haqqında verilən məlumatlara inandırıcı deyil.
Son iki həftədə saxta dövlət çevrilişi ittihamə ilə həbs edilən cəbhəçilərə, xüsusiylə Fuad Qəhrəmanlıya bu ağır işgəncələr bilavasitə prezident İlham Əliyevin və vitse-prezident Mehriban Əliyeavanın göstərişi ilə verilir. Məhz onların göstərişi və təlimatları ilə prokurorluğun ağır cinayət idarəsində insanlığa qarşı ağır cinayət törədilir, “Bandotdeldə” insan taleləri məhv edilir, bədənlərinə elektrik cərəyanı buraxmaqla törətmədiyi əməllərə görə cəbhəçilərdən özlərinə və mübarizə yoldaşlarına, partiya rəhbərliyinə qarşı saxta ifadələr tələb edilir. Bu məqsədlə Fuad Qəhrəmanlı ağır işgəncələr altında əgər hələ sağdırsa, şübhəsiz ki, şikəst edilib.
AXCP üzvü Seymur Əhmədov işgəncəyə, ləyaqəti alçaldan davranışa, qeyri-insani rəftara məruz qalması barədə həbs yerindən göndərdiyi məktubda yazır ki, özümü “Osvensim” həbs düşərgəsinin müdafiəsiz, ümidsiz əsiri kimi hiss edirəm. Bəli, XXI əsrdə bizim ölkə “Osvensimi” xatırladır. Azərbaycanı “Osvensimə” çevirən ölkəni korrupsiya girdabına yuvarlatmış, kleptokratiya üsulunu bərqərar etmiş və ailə-klan votçinasına döndərmiş İlham Əliyev və Mehriban Əliyevanın hakimiyyət hərisliyi və siyasi təkəbbürlədir.
Fuad Qəhrəmanlı artıq 10 gündür saxlanılıb. O, nə mitinqdə olub, nə yürüşdə. Digər yardımçı ittihamlarla yanaşı ona dövlət hakimiyyətini zor gücünə ələ keçirmək ittihamı irəli sürülüb. Ona verilən ölümcül işgəncə də məhz bu ittihamı sübuta yetirmək məqsədi daşıyır. Məqsəd Əli Kərimliyə çıxmaqdır. Ən dəhşətlisi odur ki, hakimiyyət Əli Kərimlinin həbsinə “qanuni” əsaslar yaratmaq üçün bu qədər qanunsuluğa, işgəncələrə, zorakılığa əl atır. İlham Əliyev üçün Əli Kərimlinin “qanuni” hüquqi proseduralarla həbsi Fuad Qəhrəmanlı, Seymur, Əhmədov, Niyaməddin Əhmədov, Məmməd İbrahim və digər günahsız cəbhəçilərin işgəncə altında məhv edilməsindən, onların bədənindəki qançırlarından, həmin qançırlardan İlham Əliyevin vicdanına sızan qan izlərindən keçir.